Ribeendunu ni galán ora rúninu stipa
DXI naguíxhenu guni adorarnu Dios né binnilídxinu, racané ni laanu gusíʼdinu ca xiiñinu ne gulídxenu laacabe modo na Jiobá (Efe. 6:4). Peru nánnanu nagueenda riree ca baʼduhuiiniʼ ca gana. Yanna xi zanda gúninu para cadi guiree ca xiiñinu gana yaʼ. Guidúʼyanu xi huayuni chupa guendaxheelaʼ de Estados Unidos.
Sicaríʼ guníʼ George, ti hombre Testigu ni nabeza California: «Naa ne xheelaʼ biyúbidu modo cadi guiree ca xiiñidu gana ora bidúʼndanedu laacaʼ Biblia dxi gúcacaʼ nahuiiniʼ. Nuu tiru rácudu lari casi gucuʼ ca binni ni ruzeeteʼ Libru stinneʼ de ca historia stiʼ Biblia para gúnidu casi biʼniʼ ca binni de dxiqué. Dede rúnidu espada, ti vara casi ti bastón, dxumi ne xcaadxi cosa. Laaca gudxítedu nácadu tobi de ca binni ni cuzeeteʼ Biblia ne xcaadxi guiníʼ tu láʼ binni ni nácadu que. Ne laaca rinabadiidxasaadu laadu de cani zeeda lu Biblia ne nuu de laacani nagana ne xcaadxi coʼ. Ne bínidu xcaadxi cosa, casi arca ni biʼniʼ Noé o ti lista ra cá padxí bizaaca caadxi cosa ni zeeda lu Biblia. Laaca bínidu dibuju stiʼ ca binni ni zeeda lu Biblia ne ca historia ni rieeteʼ luni. Ne yanna, caníʼ íquedu guni dibujardu cani riquiiñeʼ ti soldadu ora chitinde, ni zeeda gaca casi cani rudii Dios laanu para gudxíʼlunu Binidxabaʼ casi rieeteʼ lu Efesios 6:11-17. Despué cada tobi de laadu zusiene ni riníʼ cada tobi de laacani. Guiráʼ cani bizeeteʼ ca, huayacanécani binnilídxidu cadi guireecaʼ gana ora gúʼndanedu laacaʼ».
Debi, ti gunaa Testigu de guidxi Michigan guníʼ: «Guca nagana para naa ne xheelaʼ gacanedu dxaapahuiiniʼ stidu de chonna iza gucaadiaga laadu. Ti dxi laga cayuundaniáʼ laabe historia ni caníʼ de Isaac ne Rebeca ni zeeda lu Libru stinneʼ de ca historia stiʼ Biblia, málasi biquiinde naa guicaaʼ chupa muñecu ne iquiiñeʼ laacaʼ casi títere. ¡Zaquetiʼ bicaadiágabe naa! Lu xcaadxi beeu que biquiiñedu ca muñecu que para gácacaʼ xcaadxi de ca binni ni rieeteʼ lu Biblia. Ne cada guiluxe guidúʼndadu ti historia maʼ ziyúbibe xcaadxi juguete ne xcaadxi cosa para gúnibe ni bieeteʼ lu historia ca. ¡Casi ñaca nuyúbibe ti tesoro ni gaʼchiʼ! Laaca biquiiñedu ti caja ra riree zapatu ne ti doo xiñáʼ para guzadu lidxi Rahab ne doo xiñáʼ ni gunda raqué. Ne ruchéndadu ti beendaʼ de peluche ziuulaʼ de ti metru arondaʼ lu ti vara gubaʼyaʼ ne para laadu la? ngue nga beendaʼ de guibayaa ni rieeteʼ lu Números 21:4-9. Riguu chaahuidu guiráʼ ca cosa ni riquiiñedu ndaaniʼ ti bolsa naroʼbaʼ de lona. Nabé riuuláʼdxidu guidúʼyadu dxaapahuiiniʼ stidu ora maʼ zuba ra sala maʼ cuguuchaʼ guiráʼ cani nuu ndaaniʼ bolsa que ne stubi si maʼ caguixhe ximodo guca ca historia ni zeeda lu Biblia, neca qué rúnibe cásipeʼ modo zeda lu Biblia».
Nabé nagana nga gusiniisi binni xiiñiʼ. Nga runi, guiráʼ dxi caquiiñeʼ gacanenu ca xiiñinu guiale de ndaaniʼ ladxidoʼcaʼ gúnicaʼ ni na Jiobá ne guyúbinu modo gusíʼdinu ni laacabe. Pa guni adorarnu Dios né binnilídxinu guiráʼ semana la? zacaneni laacabe para gúnicabe ni na Jiobá. Pa gúninu zacá, zabeendunu ni galán.