Quixhe chaahuinu tiempu stiʼ binnilídxinu para gúʼndanenu iracaʼ
1 Ni jma galán zanda guni ca binni napa xiiñiʼ nga, usiidicaʼ laacabe ganaxhiicabe Jiobá cásica laacaʼ nadxiicaʼ laabe. Ti modo jma galán zanda gúniluʼ ni nga ora cuíneluʼ laacabe para gúʼndatu iráʼ semana (Deu. 6:5-7). Neca nabézaluʼ ndaaniʼ yoo ra gadxé gadxé religión laatu o huaxiéʼ racané xheelaluʼ lii, galán cadi usaana de gúʼndaneluʼ ca xiiñiluʼ, purtiʼ nga zacané chúʼcabe gaxha de lii ne de Jiobá.
2 Ximodo uzululuʼ. Primé la? riquiiñeʼ guiaatu gúʼndatu juntu. Pa qué gánnaluʼ pora nga jma galán gúniluʼ ni, xiñee qué inabadiidxaluʼ ca binnilídxiluʼ yaʼ. (Pro. 15:22.) Pa nahuiiniruʼ ca xiiñiluʼ, galán gúʼndaneluʼ laacabe chupa chonna biaje lu ti semana, peru cadi aca diʼ cani xadxí. Biiyaʼ xii nga ni jma galán para laacabe. Udixhe ti ora, ne yenanda ni.
3 Xi zanda gúʼndatu yaʼ. Nuu tu laa ruundané ca xiiñiʼ libru ni riquiiñeʼ ra rié Grupuhuiiniʼ ni Ruundaʼ Libru stiʼ ca Binni Ridagulisaa o revista La Atalaya ni chiguiuundaʼ semana ca. Stuudxi ni napa xiiñiʼ jma maʼ huaniisi la? ruundanécabe laacaʼ xiixa ni caquiiñeʼ gánnacaʼ. Bixhoze ti hombrehuiiniʼ ne ti dxaapahuiiniʼ uníʼ sicaríʼ: «Ni jma riulaʼdxiʼ ca xiiñeʼ ora maʼ chiguundaniáʼ laacaʼ iráʼ semana nga, ora gúnidu casi cá lu ca dibuju ni zeeda lu Libru stinneʼ de ca historia stiʼ Biblia. Guiene chaahuicabe ni cayuundaniáʼ laacabe ne gápacabe ni ndaaniʼ ladxidóʼcabe nga ni jma risaca que gúʼndasidu stale párrafo».
4 Laguundaʼ iráʼ semana. Ca binnilídxiluʼ riquiiñeʼ chúʼcabe nayecheʼ ora chiguundaneluʼ laacabe. Peru pa nuu tiru qué zanda chuʼ irácabe ne naquiiñeʼ ácani sti dxi ne sti ora la? ni galán nga cadi guiaanadxi de ácani. Ne nuu biaje zanda uchaatu de ni chiguiniʼtu. Cadi udiʼnu lugar intiica si cosa neca caquiiñeʼ ácani uxhaleʼ ni laanu de dxi ne ora maʼ udixhe íquenu gúʼndanenu binnilídxinu. Ndaaniʼ ti familia, ti baʼdudxaapaʼ uníʼ: «Pa chiguidxaa ora gúʼndadu la? bixhózedu maca ziucaa ti guiʼchiʼ cueʼ refri para gúʼyadu ni ne gánnadu pora gúʼndanebe laadu». Stipa runi ca binni napa xiiñiʼ pur cadi usaana de gúʼndané ca binnilidxi izáʼ galán cani. Laga cusiniisitu ca xiiñitu modo na Jiobá la? lausihuinni nadxiitu laacabe ne nadxiitu Bixhózenu ni nuu ibáʼ (Efe. 6:4).