Ni zacané lii cadi gusaana de gápaluʼ estudiu personal stiluʼ
¿ÑEE raca nagana para lii gápaluʼ estudiu personal stiluʼ guiráʼ semana la? ¿Rireeluʼ gana la? Stale tu rizaaca zacá. Nuu stale cosa ni rúninu guiráʼ dxi ne riquiiñeʼ cueʼnu tiempu para laacani, casi gázenu. ¡Ne galán runi sentirnu despué! Zacaca nga rizaaca ora guni estudiarnu Biblia, laaca runi sentirnu galán casi ora niguiibi Dios laanu né Stiidxaʼ, «ni zeeda gaca casi nisa» (Efes. 5:26). Chiguzéʼtenu caadxi cosa ni zanda gacané lii:
Biʼniʼ ti programa stiluʼ. Tobi de ca cosa «ni jma risaca» para ti xpinni Cristu nga guundaʼ Biblia (Filip. 1:10). Para cadi guiaandaʼ lii chinándaluʼ programa ni bíʼniluʼ, gudíxheni ti lugar ra zanda gúʼyaluʼ ni, casi lu mexaʼ o lu puertaʼ stiʼ refri. O zanda quíxheluʼ alarma lu teléfono stiluʼ para xidxi ni chupa chonna minutu ante ganda ora chiguni estudiarluʼ.
Guníʼ ique modo jma galán guni estudiarluʼ. Nuu tu laa riuulaʼdxiʼ guundaʼ xadxíʼ, peru nuu xcaadxi rúnicaʼ ni huaxiéʼ tiempu ne rúʼndacaʼ ni ti ndaa ga. ¿Ñee rizaacaluʼ zacá la? Lii nga nánnaluʼ ni jma galán para lii ne yenándani ora gúniluʼ programa stiluʼ. Yanna, ¿pa ma gunda hora guni estudiarluʼ ne qué gápaluʼ gana gúniluʼ ni yaʼ? Biʼniʼ ni neca chii minutu si ne zuuyaluʼ ximodo zaziidiluʼ stale lu huaxiéʼ tiempu ca. Ne zándaca gucaa ni lii chuuláʼdxiluʼ guni estudiarluʼ jma (Filip. 2:13).
Dede ante gulí tema chiguni estudiarluʼ. Pa cuézaluʼ dede ora guzulú guni estudiarluʼ guiníʼ íqueluʼ xi chiguundaluʼ la? qué zaquiiñeluʼ tiempu stiluʼ jneza (Efes. 5:16). ¿Xiñee qué gúniluʼ ti lista de ca artículo ne ca tema ni ñuuláʼdxiluʼ ñuni estudiarlu yaʼ? Pa gápaluʼ xiixa pregunta la? Bicaa ni. Ne pa ora guni estudiarluʼ qué guiéneluʼ xiixa la? Laaca bicaa ni lu lista ca.
Zanda guchaaluʼ horariu stiluʼ. Ni jma risaca nga guni estudiarluʼ guiráʼ semana. Peru pa guizaaca xiixa la? zanda guchaaluʼ dxi ne hora maʼ gudíxheluʼ guni estudiarluʼ, ca tema ni ma guliluʼ ne pabiáʼ tiempu chigúniluʼ ni.
Gápaluʼ estudiu personal stiluʼ guiráʼ semana zabeenduluʼ stale ni galán: ziuʼluʼ jma gaxha de Jehová, zacaaluʼ decisión jneza ne zuni sentirluʼ galán (Jos. 1:8).