Cadi guiníʼ íqueluʼ nabé nuu xhiiñaluʼ
1 Nuu tu qué riná guʼndané binni Biblia purtiʼ nabé riuu xhiiñaʼ. Dxandíʼ, riquiiñeʼ tiempu para ganda gacané binni cani ruundané Biblia. Xiñee yaʼ. Purtiʼ riree tiempu para guʼndaʼ binni dede ante, naquiiñeʼ cuee binni tiempu para chiguundané laacabe ne gacané laacabe gudxiilúcabe guiráʼ ni gucueeza laacabe de gúʼndacabe Biblia. Apóstol Pablu guníʼ biquiiñeʼ tiempu stiʼ biaʼ gúndatiʼ para bisiidiʼ ca binni de Tesalónica de stiidxaʼ Dios (1 Tes. 2:7, 8). Ximodo zanda cueenu tiempu para gúʼndanenu binni Biblia.
2 Naquiiñeʼ cuee binni tiempu para ganda guni xhiiñaʼ Jiobá. Stale dxiiñaʼ nga rúninu para guni adorarnu Dios. Guiráʼ semana naquiiñeʼ cueenu tiempu para chuunu ca guendaridagulisaa stinu, chigucheechenu diidxaʼ, gúʼndanu Biblia ne guni orarnu. Quíxhenu ti ejemplu: ti binni ni maʼ bichaganáʼ, neca nuu xhiiñaʼ peru ribee tiempu para xheelaʼ purtiʼ nadxii laabe. Zacaca nga laanu, cumu nabé nadxiinu Jiobá la? laaca galán nibeenu tiempu para guni adorarnu laabe (Efes. 5:15-17; 1 Juan 5:3). Jesús guníʼ ora gacanenu binni gaca discípulo stiʼ laaca cayuni adorarnu Dios (Mat. 28:19, 20). Pa guiníʼ íquenu nga zacaneni laanu gúninu dxiiñaʼ ni nexheʼ gúninu.
3 Peru xi naquiiñeʼ gúninu pa qué ganda chigúʼndanenu tuuxa binni pur cayuniná xiixa guendahuará ni qué rianda laanu, napa xidé gúninu dxiiñaʼ o chigúninu xiixa dxiiñaʼ ni raca ndaaniʼ xquidxi Dios yaʼ. Ora huará tuuxa nuu tiru rinabaʼ cani ruundané gueedacaʼ ralidxi para gúʼndanebe laacaʼ. Xcaadxi de cani rucheeche diidxaʼ nuu tiru rinábacaʼ gúʼndanecaʼ binni Biblia pur teléfono o pur computadora purtiʼ gatigá rireecaʼ. Ne nuu xpinni Cristu riniʼné ti ni rucheeche diidxaʼ ni nánnabe zanda chiganna binni ni ruundanebe ora qué zanda chebe.
4 Nabé nayecheʼ guyuu Pablu ra biquiiñeʼ tiempu stiʼ ne stipa stiʼ para gucané xcaadxi binni guiziidiʼ ni dxandíʼ (Hech. 20:35). Ora bíʼyabe xi guiráʼ guleendú dxiiñaʼ bíʼnibe Tesalónica bicaani laabe gudiibe xquíxepeʼ Jiobá (1 Tes. 1:2). Pa quixhe chaahuinu tiempu stinu ne cueenu tiempu para chigúʼndanenu binni la? ziuʼnu jma nayecheʼ ra gúninu xhiiñaʼ Jiobá.
[Preguntas]
1. Xiñee nuu tu qué riná guʼndané binni Biblia.
2. Ximodo zaquiiñenu tiempu stinu pur nadxiinu Jiobá.
3. Ximodo zanda gúʼndanenu binni Biblia pa málasi chuʼ xiixa ni gucueeza laanu de gúninu ni.
4. Xi ribeendunu ora rúʼndanenu binni Biblia.