Cadi guidxíbiluʼ gúʼndaneluʼ binni Biblia
1. Xiñee riuuláʼdxinu gusíʼdinu binni xi chiguni Reinu stiʼ Dios.
1 Laanu, ca testigu stiʼ Jiobá, nabé riuuláʼdxinu gusíʼdinu binni xi chiguni Reinu stiʼ Dios (Pro. 3:27). Gástiruʼ sti cosa jma galán que guiziidiʼ binni de ca cosa ni chiguni Reinu stiʼ Dios. Yanna, neca nabé rucheecheluʼ diidxaʼ, rusaananeluʼ binni revista ne libru, ne riníʼneluʼ binni ratiica nuuluʼ la? zándaca riaadxaʼ lii gúniluʼ sti cosa: gúʼndaneluʼ binni Biblia. Xiñee qué guicá íqueluʼ gúniluʼ ni yaʼ.
2. Xiñee raca nagana para laanu gúʼndanenu binni Biblia.
2 Nuu biaje raca nagana para laanu gúʼndanenu binni Biblia purtiʼ ridxíbinu, riníʼ íquenu qué zanda gúninu ni jneza o qué gápanu tiempu. Ribézadu gacané cani zeeda xagueteʼ riʼ lii para cadi guidxíbiluʼ ne uguuni gana lii gúʼndaneluʼ binni Biblia (Mat. 28:19; Hech. 20:20).
3. Xiñee rininu zanda gusíʼdinu binni de Biblia.
3 Qué zanda diʼ guneʼ ni. Zándaca yanna riʼ qué ruundaneluʼ tuuxa Biblia purtiʼ riníʼ íqueluʼ qué gápapeluʼ scuela o qué zanda gúniluʼ ni. Bietenalaʼdxiʼ, ca primé xpinni Cristu que «huaxiéʼ [g]upa ca scuela ne iruti [ñ]aca ca», peru gunda bisiidicaʼ stiidxaʼ Dios. Paraa biziidicabe yaʼ. Biblia na guzanécabe Jesús (Hech. 4:13). Biziidicabe de Maestru Ni Jma Nanna Gusiidiʼ. Laanu laaca zanda guizíʼdinu de Jesús, purtiʼ guiráʼ ni bisiidibe ne modo bíʼnibe zeeda cani lu Biblia. Nga runi, neca qué gánnapenu guiʼchiʼ, peru Jiobá cusiidiʼ laanu xi naguixhe ique guni ne laacani nga ni jma risaca (Isa. 50:4; 2 Cor. 3:5).
4. Xi rizíʼdinu de Amós.
4 Guyuu biaje, Jiobá biquiiñeʼ hombre ni zeeda lade familia pobre para gudindené binni ni napa ti puestu naroʼbaʼ. Tobi de ca hombre biquiiñeʼ Jiobá nga, Amós, laabe guniʼbe: «Naa cadi nácadiaʼ ni riguixhená, ne cadi xiiñiʼ ni riguixhená diʼ naa; sínuque naa gucaʼ tobi ni gupa dendxuʼ ne ni gudxiide duʼgaʼ» (Amós 7:14). Neca qué ñaca Amós ti binni risaca qué nidxíbibe ora gúdxibe Amasías xi zazaaca, ti hombre bizaaquiʼ guʼxhuʼ ni biʼniʼ adorar yuzehuiiniʼ (Amós 7:16, 17). Zacaca nga laanu, naquiiñeʼ guietenaláʼdxinu stiʼ Dios dxiiñaʼ riʼ ne laabe zacanebe laanu para gúninu ni (2 Tim. 3:17).
5. Xiñee riquiiñeʼ gúninu stipa pur guzulú gúʼndanenu binni Biblia neca nuu xhiiñanu stale.
5 Qué gapaʼ tiempu. Dxandíʼ nga nabé nuu xhiiñaluʼ, peru laaca maʼ guleeluʼ tiempu para gucheecheluʼ diidxaʼ. Yanna maʼ caquiiñeʼ si gúʼndaneluʼ ti binni Biblia lu tiempu ni nápaluʼ para gucheecheluʼ diidxaʼ ca ti gúʼyaluʼ pabiáʼ nayecheʼ riuu binni ora maʼ cayuundané tuuxa. Nabé galán nga gúʼyanu ximodo racané Stiidxaʼ Dios binni guchaa modo nabani (Heb. 4:12). Nabé riecheʼ Jiobá ora ruuyaʼ stipa rúninu para gacanenu binni «ganna ca ni dxandíʼ» stiʼ Dios (1 Tim. 2: 3, 4). Dede ca ángel stiʼ Dios riéchecaʼ ora ti binni gaca arrepentir ne guzulú guiniisi lu stiidxaʼ Dios (Luc. 15:10).
6. Xi dxiiñaʼ risaca bidii Dios laanu.
6 Ni racalaʼdxiʼ Dios nga guilá «irá binni, ne ganna ca ni dxandíʼ» (1 Tim. 2:3, 4). Ne laanu zanda gacanenu para gaca ni naguixhe ique Dios ca. ¡Nabé galán dxiiñaʼ nápanu ca njaʼ! Nga runi, ¡cadi guidxíbiluʼ gúʼndaneluʼ binni Biblia!