Lachinanda ejemplu stiʼ ca profeta: Amós
1. Ximodo zanda gacané ejemplu stiʼ Amós laanu.
1 Ñee huaníʼ íqueluʼ qué zanda gucheecheluʼ diidxaʼ purtiʼ pobre lii o purtiʼ qué nizaluʼ scuela la? Pa zacá riníʼ íqueluʼ la? zanda gacané ejemplu stiʼ Amós lii. Laabe gúcabe ti pastor ni gupa dendxuʼ ne laaca bíʼnibe dxiiñaʼ lu layú ora biasa xiixa cosecha, peru bidii Jiobá laabe ti dxiiñaʼ nabé risaca: chitídxibe guidxi Israel xi chiguni Dios (Amós 1:1; 7:14, 15). Yanna riʼ laaca riquiiñeʼ Jiobá binni ni qué rudxiibaʼ laca laa (1 Cor. 1:27-29). Ximódoruʼ zanda gacané ejemplu stiʼ Amós laanu para gucheechenu diidxaʼ yaʼ.
2. Xiñee cadi naquiiñeʼ guidxíbinu ora gucaalúcabe laanu pur rucheechenu diidxaʼ.
2 Qué nidxíbibe neca bicaalúcabe laabe. Guidúʼyanu xi guca ora guyé Amós guidxi ra nuu reinu de chii tribu stiʼ Israel ni nuu ladu guiaʼ. Ora caniʼbe xi chiguizaaca reinu que, biree Amasías —sacerdote ni runi adorar yuzehuiiniʼ— ne gudxi laabe cadi guchiichibe guidxi que, purtiʼ maʼ nápacaʼ religión sticaʼ (Amós 7:12, 13). Xi biʼniʼ Amasías para gucaa Jeroboán gucueeza dxiiñaʼ cayuni Amós yaʼ. Bichéndabe ca diidxaʼ caníʼ Amós (Amós 7:7-11). Peru qué nidxibi Amós laacabe. Yanna riʼ laaca runi stale xaíque yuʼduʼ zacá, nuu tiru rieegucabe ca políticu para gucaalúcabe xquidxi Dios. Peru maʼ guníʼ Jiobá qué zabeendúcabe gastiʼ ora gacaláʼdxicabe gucaalúcabe laanu (Is. 54:17).
3. Xi chupa cosa rininu ora rucheechenu diidxaʼ.
3 Guniʼbe juiciu stiʼ Dios ne ca ndaayaʼ ni guedané. Dxandíʼ guníʼ Amós xi juiciu chigueeda luguiáʼ reinu de chii tribu stiʼ Israel, peru ra biluxe libru stibe guniʼbe zabee Jiobá xquidxi de esclavu ne zaguu ndaayaʼ laacabe (Amós 9:13-15). Laaca caninu maʼ cadxiña dxi cuidxi Dios cuenta binni, peru ngasi nga tobi de ca cosa ni zeeda lade ca diidxaʼ nacubi ne galán stiʼ Reinu (Mat. 24:14; 2 Ped. 3:7). Primeru zunitilú Jiobá guiráʼ binni malu lu Armagedón, oracaruʼ nga maʼ gúnibe Guidxilayú riʼ ti paraísu (Sal. 37:34).
4. Xiñee zanda gúninu ni racalaʼdxiʼ Jiobá.
4 Ora gucaalúcabe laanu pur rucheechenu diidxaʼ nga rusihuínninu pa dxandíʼ rúninu ni bidii stiidxanu Jiobá ora guyúʼnisanu ne pa riuuláʼdxinu gúninu ni nabe (Juan 15:19). Neca zacá, nanna dxíchinu zacanebe laanu ne zudiibe ni caquiiñenu para gúninu ni racaláʼdxibe, cásica gucanebe Amós (2 Cor. 3:5).