Ndaa ra rinabadiidxaʼ

◼ Ñee zanda gucaa bixhoze ne jñaa binni ca hora ni ruundanecaʼ binnilídxicaʼ Biblia la?

Nécapeʼ bixhoze binni nga jma naquiiñeʼ gusiniisi xiiñiʼ, gulidxe laacabe, ne gusiidiʼ laacabe «modo na Jiobá» la? guirópacabe nga naquiiñeʼ gúnicabe ni (Efe. 6:4). Biblia cudii conseju riʼ xiiñiʼ binni: «Bicaadiaga xiiñehuiineʼ, ora uguu jneza bixhózeluʼ lii, ne cadi gusiaandaluʼ ley stiʼ jñaaluʼ» (Pro. 1:8). Ti modo jma galán gusiidiʼ binni ca xiiñiʼ nga gúʼndanecaʼ laacabe Biblia.

Dxiqué la? bixhoze si binni o jñaa nga rucaa ca hora guʼndané ca xiiñiʼ ni caʼruʼ chúʼnisa, neca guirópacabe rusiidicabe laacaʼ. Peru yanna maʼ gadxé modo chigácani. Pa guirópacabe rusiidicabe ca xiiñicabe ora ruundacabe Biblia guirácabe la? maʼ cada tobi de laacabe zucaa ti hora si lu guiʼchiʼ ni rudiicabe guiráʼ beeu. Dxandíʼ nga stale de laacabe riquiiñeʼ jma de ti hora para gusiidiʼ ca xiiñiʼ purtiʼ nadipaʼ dxiiñaʼ nga gusiniisi binni laacabe (Deu. 6:6-9). Peru lu guiʼchiʼ ni rudiicabe cada beeu ca jma nga naquiiñeʼ gucaacabe dxiiñaʼ ni rúnicabe ora rucheechecabe diidxaʼ, nga runi, ti hora si nga naquiiñeʼ gucaacabe neca gúnicabe ni jma de ti hora, o gúʼndacabe stale biaje lu ti semana o guʼndanécabe cada tobi de ca xiiñicabe. Tobi si de laacabe nga zucaa casi ora cayuundané ti binni lu guiʼchiʼ ni rudiicabe cada beeu ca ne laaca zucaa casi ora yeganna ti binni sti biaje cada semana guʼndanécabe binnilídxicabe.