Ni rinabadiidxaʼ cani ruundaʼ

Xiñee bidxiichiné Moisés ca xiiñiʼ Aarón, Eleazar ne Itamar, despué de guti guiropaʼ bíʼchicaʼ, Nadab ne Abihú, ne ximodo gudiʼdiʼ xiana stibe (Lev. 10:16-20).

Cadi xadxí de gudixhe Jiobá tuu nga cani naquiiñeʼ guzaaquiʼ guʼxhuʼ ndaaniʼ tabernáculo stiʼ, biitibe chupa xiiñiʼ Aarón, Nadab ne Abihú, purtiʼ bidiicabe ti ofrenda ni cadi naquiiñeʼ nudiicabe laabe (Lev. 10:1, 2). Moisés biʼniʼ mandar xhupa xiiñiʼ Aarón, Eleazar ne Itamar, cadi gusihuínnicaʼ naná nuucaʼ pur guti ca bíʼchicaʼ. Nin qué nindaa bidxiichiné Moisés laacabe, purtiʼ qué ñócabe chivu ni bidiicabe casi ofrenda pur pecadu stiʼ guidxi que (Lev. 9:3). Xiñee bidxiichi Moisés yaʼ.

Ley ni bidii Jiobá Moisés que na sacerdote ni gudii ofrenda pur pecadu stiʼ guidxi que, naquiiñeʼ gó de ofrenda ni gudii que lu patiu ni napa yoo de lari ra biʼniʼ adorar ca israelita que Jiobá. Ora gobe de laani, casi ñaca maʼ laabe nga nuabe stonda guidxi que. Peru cadi naquiiñeʼ gobe de laani pa yenécabe caadxi rini stiʼ ofrenda que lugar ni rábicabe Santu, ni nuu entrada stiʼ tabernáculo. Ora gaca nga la? ofrenda ca napa xidé chaquiʼ (Lev. 6:24-26, 30).

Pur cani bizaaca dxi que nga zándaca biiyaʼ Moisés naquiiñeʼ gaca guiráʼ ni na ca mandamientu stiʼ Dios. Ngue runi, ora gúnnabe guyaʼquiʼ ofrenda ni bidiicabe pur stonda guidxi que, bidxiichinebe Eleazar ne Itamar ne gunabadiidxabe laacaʼ xiñee qué ñocaʼ de ofrenda que ne xiñee qué ñúnicaʼ cani maʼ nexheʼ gaca, purtiʼ qué ninécabe rini que ra nuu Jiobá lugar ra rábicabe Santu (Lev. 10:17, 18).

Óraque bicabi Aarón Moisés, purtiʼ zándaca laabe nga gúdxibe Eleazar ne Itamar naquiiñeʼ gúnicaʼ zaqué. Cumu maʼ guti chupa de ca xiiñibe la? zándaca guníʼ íquebe pa zándaruʼ gó cani ruzaaquiʼ guʼxhuʼ que de ofrenda ni bidiicabe dxi que sin guchiiñaʼ xquendabiaanicaʼ laacaʼ. Zándaca guníʼ íquebe qué ziuulaʼdxiʼ Jiobá pa gúnicabe ni, neca qué gápacabe donda pur ni biʼniʼ Nadab ne Abihú (Lev. 10:19).

Zándaca guníʼ ique Aarón naquiiñeʼ gúnicabe dxiiñaʼ stícabe né stale cuidadu para gusiéchecabe Dios lu guiráʼ ni gúnicabe, purtiʼ ngue nga primé dxi cayuni binnilídxibe dxiiñaʼ casi ni ruzaaquiʼ guʼxhuʼ. Peru Nadab ne Abihú qué ñuni respetarcaʼ lá Jiobá, ngue runi bidxiichinebe laacaʼ. Guníʼ ique Aarón qué zanda gó Eleazar ne Itamar de ofrenda ni chigudiicabe Jiobá, purtiʼ binnilídxicabe nga cani bichee.

Biene Moisés razón ni bidii Aarón laa, ne nánnanu zacá ni pur ca diidxaʼ riʼ: «Ora binadiaga Moisés ca diidxaʼ que, biiyabe jneza ni guníʼ Aarón que» (Lev. 10:20). Ne laaca rihuinni jneza biiyaʼ Jiobá razón ni bidii Aarón.