Cadi gudiʼnu lugar quite cani guiníʼ íquenu laanu
«XII ndiʼ ni maʼ biʼnuʼ pue», zacá gunabadiidxaʼ Dios Eva dxi gudó cuananaxhi ni cadi naquiiñeʼ ñó. Para bicabi gunaa que laabe: «Beendaʼ ca... laame bisiguiime naa, nga runi gudahuaʼ ni» (Gén. 3:13). Binidxabaʼ biquiiñeʼ ti beenda para gudxite laabe ti gucheenebe Jiobá, nga runi Binidxabaʼ nga zeeda gaca «beenda yooxho [...] ni rusiguii irá binni» (Apo. 12:9).
Relatu ni zeeda lu Génesis ca, cusihuínnini nanna Binidxabaʼ quite ca binni ni qué gapa laa, cásica gudxítebe Eva para biaba lu nabe. Peru ca xpinni Cristu nánnacaʼ cadi Binidxabaʼ si nga zanda gucaa laacaʼ gucheecaʼ. Biblia caguixhená ca xpinni Cristu para cadi quítecaʼ laca laacaʼ né cani riníʼ íquecaʼ (Sant. 1:22).
Zándaxa quite binni laca laa. Zándaca guiníʼ íquenu qué ziuu dxi quítenu laca laanu. Peru pa caguixhená Dios laanu la? nuu xi pur cayúnibe ni. Nga runi, galán nga gánnanu ximodo riguite binni laca laa ne xii nga ca cosa ni cadi jneza riníʼ ique binni ni rucaa laacaʼ guiábacaʼ lu trampa ca. Guidúʼyanu ti ejemplu ni zeeda lu Biblia ni zanda gacané laanu.
Gudxítecabe laca laacabe
Lu iza 537 ante de ca dxi stiʼ Jesús, ti rey stiʼ Persia ni láʼ Ciro el Grande, biʼniʼ mandar guibiguetaʼ ca judíu ni nuu Babilonia Jerusalén para gucuicaʼ yuʼduʼ sticaʼ sti biaje (Esd. 1:1, 2). Casi maca bizeeteʼ Dios, lu sti iza que maʼ gundaacabe base para gucuícabe yuʼduʼ que sti biaje. Cumu nuucabe nayecheʼ la? bisisácacabe Jiobá pur guluu ndaayaʼ dxiiñaʼ risaca ni bizulúcabe que (Esd. 3:8, 10, 11). Peru nin qué nindaa bicaalú ca xhenemígucabe laacabe ne chaahuidugá bireecabe gana (Esd. 4:4). Peru cadi nga si bizaacacabe, biaʼ quince iza despué de bibiguétacabe de Babilonia, biʼniʼ mandar ca xaíque guidxi Persia gucueezacabe dxiiñaʼ ni cayaca Jerusalén que. Dede bidxiña ca binni ni nuu lu Imperiu persa ni cayuni mandar gaxha de Jerusalén que ne yenecaʼ ca soldadu sticaʼ para bicueezacaʼ laacabe de gúnicabe dxiiñaʼ que (Esd. 4:21-24).
Cumu cucueeza ca binni que laacabe la? bisaana ca judíu que de gúnicaʼ dxiiñaʼ sticaʼ, zaqué nga gudxítecabe laca laacabe. Sicaríʼ guníʼ íquecabe: «Caʼruʼ guedandá [...] dxi cuí lidxi Jiobá» (Ageo 1:2). Guníʼ íquecabe qué náʼ Dios gucuícabe yuʼduʼ que nagueenda. Ngue runi, lugar de nuyúbicabe modo ñúnicabe ni gudxi Dios laacabe, laga bisaanacabe dxiiñaʼ ni cayúnicabe ne bizulú biʼniʼ chaahuicabe lídxicabe. Pur ngue, gunabadiidxaʼ profeta Ageo laacabe sicaríʼ: «Ñee yanna nga tiempu para cuézatu ndaaniʼ yoo ni guyaʼné yaga ni jma galán ne yoo [ra runi adorartu] riʼ guirutiʼ cadi culabi la?» (Ageo 1:4).
Xi rusiidiʼ ejemplu riʼ laanu. Rusiidiʼ ni laanu nagueenda zusaananu de gúninu xhiiñaʼ Jiobá ne jma zaguixhe íquenu gúninu cani racaláʼdxisinu pa guiníʼ íquenu zandaaruʼ para gúnibe cani racaláʼdxibe. Guidúʼyanu ti ejemplu. Pa cabézanu guedandá biuuzaʼ ralídxinu, zándaca nápanu xidé gúninu stale cosa para ganda guidxaagalunu laacabe. Peru pa gánnanu zandaaruʼ para guedandácabe yaʼ. Ñee maʼ qué zúninu gastiʼ para guidxaagalunu laacabe la?
Guzéʼtenu ni bizaaca ca judíu que. Laacabe naquiiñeʼ ñánnacabe racaláʼdxiruʼ Jiobá gucuícabe yuʼduʼ que nagueenda. Dede guyuu tu bisietenalaʼdxiʼ ni laacabe: Zacarías ne Ageo. Ageo gudxi laacabe: «Lagaca nadipaʼ binni guidxilayú [...], ne laguni dxiiñaʼ» (Ageo 2:4). Cadi naquiiñeʼ nusaana de ñúnicabe dxiiñaʼ que purtiʼ cudii Jiobá laacabe espíritu santu stiʼ (Zac. 4:6, 7). Ñee cadi dxandíʼ rusiidiʼ ejemplu riʼ laanu cadi naquiiñeʼ guiníʼ íquenu zandaaruʼ dxi stiʼ Jiobá la? (1 Cor. 10:11.)
Pa guiníʼ íquenu ni jneza qué zaguítenu laca laanu
Lu guiropa carta ni bicaa Pedru, bizeetebe maʼ gudixhe Jiobá padxí chuʼ «ti guidxilayú cubi ne ti ibáʼ cubi» (2 Ped. 3:13). Pedru guníʼ guyuu caadxi binni ni guníʼ ique zándaca qué zacané Jiobá binni guidxilayú. Dede cuxídxicabe guníʼcabe gastiʼ zaca. Sicaríʼ guníʼcabe: «Ze ru guidxilayú cásica laa dxi nabani [ca bixhoze góladu] ne dede dxi uyáʼ ni» (2 Ped. 3:4). Apóstol Pedru racalaʼdxiʼ gacané laacabe guchaacabe modo riníʼ íquecabe ora bicaa ca diidxaʼ riʼ: «Cusietenaladxe laatu ti iníʼ ique tu ni jneza». Gúdxibe ca xpinni Cristu que cadi jneza nuu ca binni ni cuxidxi cani runi crécabe que. Xiñee yaʼ. Purtiʼ dxiqué maca biʼniʼ Dios xiixa pur binni guidxilayú ra biseendaʼ ti Nisaguié naroʼbaʼ lu guidubi naca Guidxilayú (2 Ped. 3:1, 5-7).
Lu iza 520 ante de ca dxi stiʼ Jesús, laaca gudixhená Ageo ca judíu para guiníʼ íquecaʼ jneza. Para uguube gana laacaʼ gúnicaʼ dxiiñaʼ sti biaje, bicaabe laacaʼ guiníʼ íquecaʼ xi cayúnicaʼ. Gúdxibe laacaʼ: «Laquixhe ladxidoʼto lu ca neza stitu» (Ageo 1:5). Para gucaa Ageo ca judíu que guiníʼ íquecaʼ jneza, gúdxibe laacaʼ maca gudixhe Dios xiixa para xquidxi ne maca bidii stiidxabe zacanebe laacaʼ (Ageo 1:8; 2:4, 5). Ca diidxaʼ que guluucani gana laacabe gucuícabe yuʼduʼ que sti biaje, neca guníʼ ca xaíque stiʼ Persia gusaanacabe dxiiñaʼ que. Ca xhenemígucabe gucaláʼdxicaʼ nusaanacabe dxiiñaʼ ni cayúnicabe que sti biaje peru qué nibeenducaʼ gastiʼ. Nin qué nindaa de ngue biasa ley ni cucueeza laacabe que ne despué de gaayuʼ iza bilúxecabe ni (Esd. 6:14, 15; Ageo 1:14, 15).
Guiníʼ íquenu ximodo nuunu
Ca binni ni bibani ca dxi stiʼ Ageo que bireecaʼ gana dxiiñaʼ sticaʼ pur ca guendanagana gúpacaʼ. Ñee zanda guizaacanu casi bizaacacabe que la? Pa guizaacanu ni la? nin qué zandaa maʼ qué zucheechenu diidxaʼ né stale gana. Peru xi zándaca gucaa laanu guireʼnu gana yaʼ. Zándaca pur gúnicabe laanu xiixa ni cadi jneza. Pa cazaacanu nga la? ejemplu stiʼ Habacuc zanda gacané laanu. Laabe gunabadiidxabe: «Cucaa ridxi lii Jiobá para gacaneluʼ naa, padxí nga maʼ gucaadiágaluʼ naa pue. Cucaa ridxi lii para gulaluʼ laadu purtiʼ nuu stale guendaridinde, padxí nga maʼ gulaluʼ laadu pue» (Hab. 1:2). Ca dxi nabáninu riʼ, nuu tu riaandaʼ laa pa mayaca guinitilú ca cosa malu nuu yanna ne jma riguixhe íquecaʼ guibánicaʼ galán, purtiʼ riníʼ íquecaʼ cayaadxaruʼ stale para gueeda dxi stiʼ Dios. Pa guiníʼ íquenu zacá la? Cadi jneza diʼ ni. Purtiʼ pa gúninu zacá caguítenu laca laanu. Ca dxi nabáninu riʼ jma caquiiñeʼ guiníʼ ique chaahuinu xi cayúninu ne guiníʼ íquenu jneza. Dxandíʼ, stale tu huaníʼ ique maʼ niluxe guidxilayú malu riʼ, peru nuuruʼ ni. Peru cadi naquiiñeʼ guidxagayaanu xiñee nuuruʼ ni. Xiñee yaʼ.
Biblia maca guníʼ zabézanu ti tiempu
Guidúʼyanu ni guníʼ Cristu ora bizeeteʼ dxi guiluxe guiráʼ cosa malu riʼ. Casi na Evangeliu stiʼ Marcos, ora bizeeteʼ Jesús de ca últimu dxi nabáninu riʼ gatigá guniʼbe caquiiñeʼ gatananu (Mar. 13:33-37). Ne laaca zacagá gudixhenabe ca xpínnibe ora guniʼbe ximodo zeeda gaca dxi stiʼ Jiobá ni láʼ Armagedón (Apo. 16:14-16). Xiñee bisietenaláʼdxibe ca xpínnibe stale biaje caquiiñeʼ gatanacaʼ yaʼ. Purtiʼ ora maʼ gudiʼdiʼ stale tiempu zaníʼ íquenu candaaruʼ dxi stiʼ Jiobá ne ruxooñeʼ riesgu guiaandaʼ laanu mayaca guinitilú ca cosa malu nuu yanna.
Gudixhe Jesús ti ejemplu para gacané laanu gánnanu pabiáʼ risaca nga cadi gusaana de gatananu laga cabézanu guedandá dxi stiʼ Jiobá. Bizeetebe de ora yechuu gubaanaʼ ndaaniʼ ti yoo. Xi naquiiñeʼ ñuni xpixuaanaʼ yoo ca para cadi nibáʼnacabe ni nuu ndaaniʼ lidxi yaʼ. Naquiiñeʼ ñatanabe guidubi gueelaʼ. Ndiʼ nga conseju bidii Jesús ora biluxe guníʼ ejemplu que: «Naquiiñe gataná tu. Pacaa mala zuhuaa Hombre Biseenda Dios guʼya tu» (Mat. 24:43, 44).
Ejemplu ni bizeeteʼ Jesús que cusihuinni caquiiñeʼ gatananu, naquiiñeʼ guizíʼdinu cuézanu neca tiidiʼ stale tiempu. Cadi naquiiñeʼ chuʼnu xizaa pur caʼruʼ guinitilú guidxilayú malu ra nabáninu riʼ, neca rábinu maʼ ninitilú ni. Peru cadi naquiiñeʼ quítenu laca laanu ora guiníʼ íquenu «caʼruʼ guedandá dxi» stiʼ Jiobá. Purtiʼ pa guiníʼ íquenu zacá maʼ qué zucheechenu stiidxaʼ Reinu né stale gana (Rom. 12:11).
Cueenu ca cosa ni cadi jneza ca ndaaniʼ íquenu
Binni ni guni stipa pur cuee ndaaniʼ ique ca cosa ni cadi jneza, galán guietenalaʼdxiʼ conseju ni zeeda lu Gálatas 6:7: «Cadi quite tu laca laatu [...] irá ni udxiiba binni, ngue ca cuee». Xi rizaaca ora gusaana binni de guni dxiiñaʼ lu layú stiʼ yaʼ. Nagueenda riguiʼbaʼ xigaa guiʼxhiʼ luni. Ngaca rizaaca ora qué iquiiñenu xquendabiaaninu jneza. Nin qué zudiʼnu cuenta zacaa xcú ni cadi jneza ndaaniʼ íquenu. Zándaca guininu: «Nannaʼ zedandá dxi stiʼ Jiobá, peru qué zedandagá ni». Pa guiníʼ íquenu zacá, zándaca maʼ qué zúnipenu xhiiñaʼ Jiobá, ne dede gueeda guiaandaʼ cani laanu ne zándaca guinaazeʼ dxi stiʼ Jiobá laanu nisiáʼsinu (2 Ped. 3:10).
Ximodo zanda gápanu laanu para cadi guicaa xcú xiixa ni cadi jneza ndaaniʼ íquenu yaʼ. Caquiiñeʼ gúninu stipa para gánnanu gunáʼ nga «ni nachaʼhui ne ni chuʼlaʼdxiʼ [Dios] ne ni jneza peʼ» (Rom. 12:2). Tobi de ca cosa ni zanda gacané laanu nga guidúʼndanu Biblia guiráʼ dxi. Ne laaca zacaneni laanu guni crenu maʼ nanna Jiobá pora guedané dxi stiʼ (Hab. 2:3).
Pa qué gusaana de guidúʼndanu Biblia, guni orarnu, chuunu ca guendaridagulisaa, gucheechenu diidxaʼ ne gácanu nachaʼhuiʼ la? nin qué ziaandaʼ laanu mayaca gueeda dxi stiʼ Jiobá (2 Ped. 3:11, 12). Ne laaca qué zusiaandaʼ Jiobá stipa ni cayúninu. Zacá cayabi Pablu ni laanu ora guníʼ: «Cadi iréʼ nu gana de guni nu jneza purti zadxiña dxi iree ndu ni bini nu, pa qué cui sa nu atrá» (Gál. 6:9).
Ca dxi nabáninu riʼ, cadi naquiiñeʼ gudiʼnu lugar quite xquendabiaaninu laanu ne guiníʼ íquenu zandaaruʼ para gueeda dxi stiʼ Jiobá. Ni jma naquiiñeʼ guicá íquenu nga guyúbinu iguidxi fe stinu, purtiʼ guizáʼ maʼ gaxha nuu dxi stiʼ Jiobá.
[Dibuju/foto ni zeeda lu yaza 4]
Ageo ne Zacarías guluucaʼ gana ca judíu que para gucuicaʼ yuʼduʼ que sti biaje
[Dibuju/foto ni zeeda lu yaza 5]
Xi ñuni xpixuaanaʼ ti yoo pa ñanna zindánacabe ralidxi yaʼ