Ñee rucaadiaga tuuxa ca oración stinu la?

«Guníʼ iqueʼ zándaca cadi dxandíʼ nuu ti Dios, peru neca zaqué guyuu biaje bineʼ orar laabe. Neca riníʼ iqueʼ zándaca guirutiʼ tu cucaadiaga naa la? ñuuladxeʼ ñuu tuuxa nucaadiaga naa. Qué nibanediáʼ nayecheʼ ne guníʼ iqueʼ qué risaca xquendanabaneʼ. Qué rinaʼyaʼ guneʼ cré Dios purtiʼ rabeʼ ca binni ni qué ganna xi guni nga runi cré nuube.» (PATRICIA, IRLANDA)a

ÑEE laaca runi sentirluʼ casi Patricia la? Ñee runi orarluʼ Dios neca riníʼ íqueluʼ zándaca cadi dxandíʼ nuu ti Dios la? Pa zacá ni la? gunna nuu xcaadxi binni riníʼ ique zacá.

◼ Ora gunabadiidxacabe 2,200 hombre de Gran Bretaña de Dios bihuinni 22% si de laacaʼ runi crecaʼ nuu ti Dios ni bizáʼ laanu ne rucaadiaga ca oración stiʼ binni. Peru ti 55% de laacabe guníʼ nuu si tiru nga runi orarcaʼ.

◼ Ora gunabadiidxacabe 10,000 binni de caadxi guidxi bihuinni 30% de ca binni ni nacaʼ qué runi crecaʼ Dios guniʼcaʼ runi orarcaʼ.

Xiñee qué runi crécabe pa nuu Dios

Ti hombre de Inglaterra láʼ Allan, bisiene xiñee qué runi cré Dios, laa guníʼ sicaríʼ: «Naa rabeʼ gudixhe stícabe religión ca para quítecabe binni ne gáxhacabe bueltu laacaʼ. Guníʼ iqueʼ: “Pa dxandíʼ nuu Dios, qué nudiibe lugar ñaca stale cosa ni cadi jneza”. Peru nuu biaje maʼ zubaʼ ne maʼ canieniáʼ tuuxa neca qué gannaʼ tu laa. Laaca guníʼ iqueʼ xiñee nabaneʼ».

Cada binni napa gadxé gadxé razón para guiníʼ ique pa nuu Dios. Ne stale binni riníʼ ique zacá purtiʼ qué ridxélacabe tu guicabi cani rinabadiidxacabe casi:

◼ Ñee Dios bizáʼ laanu la?

◼ Xiñee nisi rucaa ca religión ca binni tinde.

◼ Xiñee rudii Dios lugar gacaná binni.

Yanna lii yaʼ, ñee ñuuláʼdxiluʼ ñuni orarluʼ Dios pa nicábicabe ca guendarinabadiidxaʼ ca la?

[Nota]