Lagusiidiʼ: Ca xiiñitu laga nahuiinirucaʼ

SICARÍʼ na Biblia: «Xiiñiʼ binni zeeda gaca ti herencia ni rudii Jiobá» (Sal. 127:3). Nga runi, ¡nabé riecheʼ ca xpinni Cristu ora gánnacaʼ maʼ chigápacaʼ ti xiiñicaʼ!

Peru cadi puru si guendanayecheʼ nga laani, purtiʼ laaca naroʼbaʼ dxiiñaʼ nga gusiniisi binni xiiñiʼ. Para ganda chuʼ xiiñitu nazaaca ne gaca nadipaʼ la? caquiiñeʼ gudiitu ni gobe órapeʼ maʼ caquiiñebe ni. Ne para ganda gaca fe stibe nadipaʼ la? laaca caquiiñeʼ gusiiditu laabe de Dios ne gábitu laabe xi naquiiñeʼ gúnibe. Guirópatu naquiiñeʼ gúnitu stipa naroʼbaʼ para ganda gusiiditu laabe ca principiu ni zeeda lu Stiidxaʼ Dios (Prov. 1:8). Peru padxí nga guzulú gusiiditu laabe ne ximodo zanda gúnitu ni yaʼ.

NAQUIIÑEʼ GÁNNATU XI GÚNITU DEDE ANTE

Guidúʼyanu xi bizaaca Manóah, ti hombre de tribu stiʼ Dan, ni guleza guidxi Zorá, tobi de ca guidxi guyuu Israel. Ti biaje beeda ti ángel stiʼ Jiobá ra nuu xheelaʼ Manóah, ne gudxi ángel que gunaa riʼ zapa ti xiiñiʼ, neca estéril laa (Juec. 13:2, 3). Zándaca nabé biecheʼ Manóah ne xheelaʼ ora gúnnacaʼ zápacaʼ ti xiiñicaʼ, peru laaca nabé guyuucaʼ xizaa. Ngue runi biʼniʼ orar Manóah Dios ne guníʼ: «Bitiidilaʼdxiʼ naa Jiobá. Hombre stiʼ Dios ni dxandíʼ ni biseendaluʼ que, rinabaʼ lii gudiiluʼ lugar gueedabe sti biaje, para gusiidibe laadu ti gánnadu xi gúnidu né baʼduhuiiniʼ ni chigale riʼ» (Juec. 13:8). Nabé gucuá ique Manóah ne xheelaʼ gusiniisicaʼ baʼduhuiiniʼ sticaʼ modo racalaʼdxiʼ Dios. Nánnanu bíʼnicabe biaʼ gúndatiʼ para bisiidicabe Sansón Ley stiʼ Jiobá. Ne guluu Dios ndaayaʼ ca stipa bíʼnicabe, purtiʼ relatu que na: «Ra gudiʼdiʼ tiempu biuu espíritu stiʼ Jiobá luguiabe ne bicaani laabe gúnibe xiixa». Dxi maʼ beeda gaca Sansón tobi de ca juez stiʼ Israel, biʼniʼ stale cosa ni bidxagayaa binni, purtiʼ bidii Dios poder laa (Juec. 13:25; 14:5, 6; 15:14, 15).

Yanna, dede padxí nga maʼ zanda gusiidiʼ binni xiiñiʼ yaʼ. Guidúʼyanu xi biʼniʼ Eunice, jñaa Timoteu, ne Loida, jñaabiidabe. Biblia na bisiidicabe laabe ni cá lu Stiidxaʼ Dios dede dxi nahuiinibe (2 Tim. 1:5; 3:15). Zacá nga laani, dede dxi nahuiiniruʼ Timoteu nga bizulú bisiidicabe laa de Dios.

Galán guni ca xpinni Cristu pa guinábacaʼ Jiobá gusiidiʼ laacaʼ ne quixheʼ chaahuicaʼ ximodo zanda gusiidicaʼ xiiñicaʼ laga nahuiinirúcabe. Proverbios 21:5 na: «Ora riníʼ ique chaahuiʼ binni xi chiguni la? ribeendú ni galán» (Versión Popular). Dede ante gale baʼduhuiiniʼ stitu nga naquiiñeʼ chuʼtu listu. Zanda gúnitu ti lista ra gucaatu guiráʼ ni zaquiiñeʼ xiiñitu, peru laaca galán guiníʼ íquetu xi zanda gúnitu para gusiiditu laabe de Dios. Naquiiñeʼ quixhe íquetu gusiiditu laabe de Jiobá laga nahuiinirube.

Ti libru ni rusiene ximodo riniisi ti baʼduhuiiniʼ na: «Lu ca primé beeu de gale ti baʼduhuiiniʼ nga tiempu zanda guiziidibe guiráʼ ni gusiidiʼ bixhózebe ne jñaabe laabe» (El desarrollo del niño en la primera infancia: echar los cimientos del aprendizaje). ¡Nga runi, nabé risaca iquiiñecabe tiempu ca para guzulú gusiidicabe laabe ca principiu zeeda lu Biblia ne modo racalaʼdxiʼ Dios guibánibe!

Guidúʼyanu xi guníʼ ti precursora de ti dxaapahuiiniʼ stiʼ: «Rigucheecheniáʼ laabe diidxaʼ dede dxi nápabe ti beeu. Dxandíʼ qué rudiibe cuenta xi cayaca, peru nabé gucané ngue laabe. Dxi maʼ nápabe chupa iza, maʼ stúbisibe randa rusaananebe binni tratadu».

Stale nga ni ribeendú binni ora rusiidiʼ xiiñiʼ laga nahuiinirúcabe. Peru stale tu riníʼ nagana para gusiidiʼ binni xiiñiʼ de Dios.

LACUEE TIEMPU PARA CHÚʼNETU LAACABE

Ca baʼduhuiiniʼ ca nabé nadxíʼñacaʼ ne riuuláʼdxicaʼ gúnicaʼ stale cosa, nga runi raca nagana para bixhózecabe ne jñaacabe gusiidiʼ laacabe. Nuu tiru, ora maʼ cusiidiʼ binni laacabe xiixa, nagueendaca maʼ nuucabe gánnacabe sti cosa. Ne zacá nga laani, purtiʼ deruʼ cayunibiáʼcabe guiráʼ ni cayuuyacabe. Xi zanda gúnitu para gacanetu xiiñitu gucaa ique ni cusiiditu laa yaʼ.

Laguuyaʼ chaahuiʼ xi guníʼ Moisés: «Ca diidxaʼ cayabeʼ lii yannadxí riʼ naquiiñeʼ gapuʼ cani ndaaniʼ ladxidoʼloʼ; ne naquiiñeʼ gábiluʼ cani xiiñiluʼ gatigá ti guiziidibe cani ne gábiluʼ cani laabe ora maʼ nuutu ralídxitu, ne ora maʼ zetu paxaraa ne ora gátatu ne ora guiásatu». Diidxaʼ hebreu ni biquiiñeʼ para guníʼcabe gábiluʼ cani xiiñiluʼ gatigá riniʼni gusiidiʼ binni xiiñiʼ xiixa stale biaje dede ora guiaana ni ndaaniʼ íquebe. Ti xcuidi zeeda gaca casi ti yagahuiiniʼ, purtiʼ naquiiñeʼ guzeecabe laa para guiniisi. Cadi dxandíʼ randa riziidiʼ ti binni huaniisi xiixa cosa risaca ora rusietenaláʼdxicabe ni laa gatigá la? Nga runi, ¡laaca zanda guiziidiʼ ca baʼduhuiiniʼ stitu stale cosa!

Para ganda gusiiditu xiiñitu cani zeeda lu Biblia, naquiiñeʼ cueetu tiempu para chúʼnetu laacabe. Naquiiñeʼ gánnanu nagana para guni binni zacá tiempu riʼ, purtiʼ nabé nuu xhiiñaʼ binni yanna. Peru apóstol Pablu cudii conseju riʼ: «Laguni ni iree ndu laga zanda», o lacuee tiempu para gúnitu xhiiñaʼ Dios (Efes. 5:15, 16). Ximodo zanda gúnitu nga yaʼ. Guzéʼtenu ni bizaaca ti binnigola stiʼ ca binni ridagulisaa. Cumu rúnibe xhiiñabe ne laaca rúnibe ca dxiiñaʼ nápabe lade ca xpinni Cristu la? guca nagana para laabe cueebe tiempu para gusiidibe ti dxaapahuiiniʼ stibe. Xheelabe laaca nabé runi stale cosa ne precursora regular laa. Paraa guleecabe tiempu para gusiidicabe xiiñicabe yaʼ. Hombre riʼ cusiene: «Guiráʼ dxi ante chaaʼ dxiiñaʼ, naa ne xheelaʼ ridúʼndanedu xiiñidu ti ndaa de ni zeeda lu Libru stinneʼ de ca historia stiʼ Biblia o folletu Guidúʼndanu Stiidxaʼ Dios guiráʼ dxi. Ne huaxhinni ora maʼ chigásibe, ridúʼndanedu laabe xcaadxi. Ne rinedu laabe ora maʼ chigucheechedu diidxaʼ. Nabé rápadu gana gusíʼdidu laabe stale cosa laga nahuiinirube».

ZEEDA GACA XIIÑIʼ BINNI «CASI FLECHA»

Guiranu racaláʼdxinu guiziidiʼ ca xiiñinu gúnicaʼ guiráʼ dxiiñaʼ sticaʼ jneza ora maʼ huaniisicaʼ. Peru rusíʼdinu laacabe ti gannaxhiicabe Dios de guidubi ladxidóʼcabe (Mar. 12:28-30).

Salmo 127:4 na: «Casi flecha ni naaze ti hombre nadipaʼ, zacá nga zeeda gaca xiiñiʼ binni ni gupa dxi nahuiiniʼ». Textu riʼ ruchaaga xiiñiʼ binni casi flecha ni naaze ti hombre. Napa xidé guʼyaʼ chaahuibe paraa chigucuibe flecha stibe ante gundaabe ni, purtiʼ ora maʼ zeni maʼ qué zanda gudxiguétabe ni. Laaca cadi xadxí riuu xiiñiʼ binni lú bixhoze ne jñaa. Nga runi, naquiiñeʼ uguucabe ca conseju zeeda lu Biblia ndaaniʼ ladxidoʼcaʼ ne gucaacabe cani lu xquendabiaanicaʼ.

Sicaríʼ guníʼ apóstol Juan ora bizeeteʼ de ca xpinni Cristu ni bíʼyabe laacaʼ casi xiiñibe: «Gasti ru ni rusieche naa jma que ganna zinanda ca xiiñe ni dxandíʼ» (3 Juan 4). Laaca riecheʼ ca xpinni Cristu ora gúʼyacaʼ «zinanda [xiiñicaʼ] ni dxandíʼ».