Pabiáʼ runiná guendaguti binni

Cumu guizáʼ naná nga yuubaʼ ni runi sentir binni ora gatiʼ tuuxa la? nga runi stale binni qué riuulaʼdxiʼ guiníʼ de laani. Peru guiranu zadxiña dxi gudxíʼlunu yuubaʼ stini.

Gastiʼ zanda gacané laanu gánnanu xi gúninu dxi gatiʼ bixhózenu o jñaanu, xheelanu o xiiñinu. Neca chaahuidugá o málasi gatiʼ tuuxa binni ni nadxiinu la? racananu ne gastiʼ zanda gucueeza yuubaʼ ni cayuni sentirnu.

Casi Antonio la? guti bixhózebe purtiʼ gulá carru laa. Sicaríʼ guniʼbe: «Casi ñaca nuseegu dxiichiʼ tuuxa ra lídxiluʼ ne ñaxha lii llave stini. Ne maʼ qué zanda chuʼluʼ ndaaniʼ ni sti biaje. Ni zanda si gúniluʼ nga guietenaláʼdxiluʼ ximodo ni. Maʼ zacá nga chiguibániluʼ. Neca raʼbuʼ cadi jneza ni la? maʼ gastiʼ zanda gúniluʼ».

Dorothy, ti gunaa ni rusiidiʼ guiráʼ domingu ndaaniʼ yuʼduʼ, guti xheelabe dxi nápabe 47 iza. Neca guníʼ íquebe qué riluxe guirani ora gatiʼ binni la? qué gánnabe pa dxandíʼ zaqué ni, ngue runi biyúbibe gusiénecabe ni laabe. Laabe gunabadiidxabe pastor stibe: «Xi raca binni ora gatiʼ». Para na pastor que rabi laabe: «Guirutiʼ ganna. Nga runi, naquiiñeʼ cuézanu ti gánnanu xi raca».

Ñee ni naquiiñeʼ si gúninu nga cuézanu ti gánnanu xi raca binni ora gatiʼ la? O ximodo zanda gánnanu pa riluxe guirani ora gatiʼ binni.