Ni runi binni para cadi gatiʼ

Guendaguti ca zeeda gaca ni casi ti enemigu nabé malu, ne runi binni stale cosa para gudxiilú ni. Ora gatiʼ ti binni ni nadxiinu, nabé nagana raca para laanu guni crenu gútibe. Ne pa nahuiininu la? zándaca riníʼ íquenu qué lica ziuu dxi gátinu, peru ti bacaandaʼ si nga guiníʼ íquenu zacá.

Ca faraón de Egipto que jma gucuá íquecaʼ gúnicaʼ xiixa para cadi gáticaʼ. Laacabe biquiiñecabe stale tiempu stícabe ne tiempu stiʼ mil de binni ni runi xhiiñacabe para gúnicabe xiixa ni gacané laacabe cadi gáticabe. Ca pirámide bicuícabe que rusihuínnicani xi bíʼnicabe para cadi ñáticabe, peru laaca rusihuínnicani gastiʼ ñanda ñúnicabe.

Ca emperador chinu laaca biyúbicaʼ modo nibánicaʼ sin qué ñuu dxi ñáticaʼ, purtiʼ bíʼnicaʼ gadxé gadxé remediu ni gacané laacaʼ para cadi gáticaʼ. Casi biʼniʼ emperador Qin Shi Huang, laa gunabaʼ ca alquimista stiʼ guyúbicaʼ xiixa ni gueʼ binni para cadi gatiʼ. Peru stale de cani bíʼnicabe que nápacani mercurio. Ne zándaca tobi de ca remediu ni güeʼbe biiti laabe.

Nuu tu ruzeeteʼ lu siglu XVI guyé Juan Ponce de León, ti explorador español, Puerto Rico ne dede raqué bizulube ziyúbibe xiixa ni gacané binni para cadi lica guioʼxhoʼ. Nécapeʼ neza zebe que bidxélabe guidxi ni runibiáʼ binni yanna casi Florida (Estados Unidos) la? chupa chonna iza despué gútibe dxi gudindenebe caadxi indiu de américa, ne qué nidxélabe ni ziyúbibe que.

Ca faraón, ca emperador ne ca explorador biyúbicaʼ xiixa ni gacané binni para cadi gatiʼ. Ne neca qué chuuláʼdxinu cani bíʼnicabe que, riénenu xiñee bíʼnicabe cani. Xiñee yaʼ. Purtiʼ guiráʼ binni riuulaʼdxiʼ guibani sin gatiʼ.

ÑEE ZANDA GUDXÍʼLUNU GUENDAGUTI LA?

Xiñee qué riná binni gatiʼ yaʼ. Biblia cusiene xiñee. Sicaríʼ cá ra cuzeeteni de Jiobá, Dios ni bizáʼ guiráʼ xixé ni nuu: «Galán bizaʼbe guiráʼ cosa ne bíʼnibe cani tiempu naquiiñeʼ gaca cani. Guluube ndaaniʼ ladxidoʼcaʼ tiempu ni qué gapa ra riluxe» (Eclesiastés 3:11).a Nga runi, qué racaláʼdxinu guibáninu ochenta si iza ndaaniʼ Guidxilayú riʼ, sínuque racaláʼdxinu guibáninu ndaaniʼ ni sin qué chuʼ dxi gátinu (Salmo 90:10). Nga nga ni racaláʼdxinu gaca.

Xiñee guluu Dios ndaaniʼ ladxidóʼ binni «tiempu ni qué gapa ra riluxe» yaʼ. Ñee para guninabe laanu la? Cadi jneza diʼ guiníʼ íquenu zacá, purtiʼ Dios maʼ bidii stiidxaʼ zunduuxeʼ guendaguti. Ne gatigá ruzeeteʼ Biblia zabee Dios ni ne zudiibe binni ti guendanabani ni qué ziuu dxi guiluxe. (Biiyaʼ cuadru ni láʼ «Zaree guendaguti».)

Jesús peʼ guníʼ ca diidxaʼ riʼ: «Ne zacaa cabe enda nabani ca ra gunibiáʼ cabe lii ne ra gunibiáʼ cabe Jesucristu ni biseenda luʼ. Lii nga tobi lucha Dios ni dxandíʼ» (Juan 17:3). Nga runi, zanda gudxíʼlunu guendaguti. Peru casi guníʼ Jesús que, caquiiñenu gacané Dios laanu para gudxíʼlunu ni.