ÑEE NANNUʼ NI LA?
Xi dxiiñaʼ biʼniʼ ti centurión stiʼ Roma
Ti guié bata stiʼ centurión Marco Favonio Facilis
Lu Nuevo Testamento rieeteʼ de caadxi centurión guyuu Roma. Chiguzéʼtenu tapa de laacabe: oficial stiʼ ejércitu ni nuu ora gutiʼ Jesús; Corneliu, primé gentil ni guca xpinni Cristu; soldadu ni nuu ora gudíñecabe Pablu, ne Julio, hombre ni yené laabe Roma (Marcos 15:39; Hechos 10:1; 22:25; 27:1, TNM, nota).
Riree lá hombre riʼ centurión, purtiʼ runi mandarbe biaʼ cincuenta o ti gayuaa soldadu. Runi entrenarbe ca soldadu nápabe ne ruuyabe gúnicaʼ ni caziidicaʼ, ruuyabe ximodo nuu armadura sticaʼ ne guiráʼ ni riquiiñecaʼ, ne laaca laabe nga rábibe laacaʼ ximodo tíndecaʼ.
Puestu de centurión riʼ nga últimu puestu ni zanda ugaanda ti soldadu. Cani napa puestu riʼ nga ca hombre ni guzá scuela para gaca soldadu ne cani rihuinni zanda guni mandar, purtiʼ napa xidé guzuubaʼ ejércitu stiʼ Roma stiidxabe ne gúnicaʼ dxiiñaʼ jneza ti guni ganarcaʼ. Ti diccionariu stiʼ Biblia na: «Ca hombre ni jma napa experiencia ne cani jma nanna ximodo ridinde ti ejércitu» nga cani zanda gaca centurión.
Xi clase speju biquiiñeʼ binni tiempu ruzeeteʼ Biblia
Ti speju yooxhoʼ de Egipto
Ca speju riquiiñeʼ binni tiempu riʼ, maʼ gadxé cani de cani biquiiñeʼ binni tiempu ruzeeteʼ Biblia. Dxiqué jma guyuu speju de bronce, peru laaca guyuu de cobre, de plata, de oro ne de electro, peru naquiiñeʼ gaca pulir cani. Primé biaje ruzeeteʼ Biblia de laacani nga dxi guca ti tabernáculo, primé yoohuiiniʼ biquiiñeʼ guidxi Israel para biʼniʼ adorar Dios. Dxi que bidii ca gunaa de Israel ca speju sticaʼ para gaca ti fuente (palangana) de cobre ne base stiʼ (Éxodo 38:8). Para gaca fuente que ne base stiʼ la? napa xidé gaca fundir ca speju que.
Ra gundaa ca arqueólogo guidxi Israel ne xcaadxi lugar nuu gaxha, bidxélacaʼ speju lade ca cosa de oro ni biquiiñeʼ gunaa para guzuchaahuiʼ dxiqué. Ovaladu stale de laacani ne raca figura stiʼ ti gunaa ni riguiidiʼ cueʼ ni para ganda guinaazecabe ni, raca ca figura que de yaga, de guiibaʼ ne de marfil. Nezalú si speju que nga raca chaahuiʼ.
Jma maʼ nayaʼniʼ ruuyaʼ binni lu ca speju nuu yanna que cani guyuu dxiqué. Zándaca nga nga razón biquiiñeʼ apóstol Pablu para guníʼ: «Nachuundu caduʼya nu yanna riʼ, casi ñaca niduʼya nu irá cosa lu ti espeju [de guiibaʼ]» (1 Corintios 13:12).