«Zinedu laatu»

1, 2. a) Xi profecía guníʼ Jiobá cayaca cumplir tiempu riʼ. b) Gunáʼ nga ca guendarinabadiidxaʼ zacábinu lu tema riʼ. (Biiyaʼ dibuju zeeda ra ruzulú tema riʼ).

TIEMPU riʼ cayaca cumplir ti profecía ni guníʼ Jiobá: «Ca dxi que la? chii hombre de guiráʼ diidxaʼ stiʼ ca guidxi ca zagápicaʼ, ya, dxandipeʼ zagápicaʼ xhaba ti hombre ni naca judíu, ne zaniʼcaʼ: “Dxandipeʼ zinedu laatu, purtiʼ huayunadiágadu nuuné Dios laatu”» (Zacarías 8:23). «Judíu» ni cuzeeteʼ profecía riʼ nga ca xpinni Cristu ni maʼ biʼniʼ ungir Dios né espíritu santu. Biblia na laca laacabe nga «Israel stiʼ Dios» (Gálatas 6:16, TNM). Ne «chii hombre» ca zeeda gaca guiráʼ binni ni cabeza guibani sin gatiʼ lu Guidxilayú. Xiñee racaláʼdxicabe chinécabe ca ungidu yaʼ. Purtiʼ nánnacabe maʼ gulí Jiobá ca binni riʼ ne para laacabe ti ndaayaʼ naroʼbaʼ nga guni adorarnécabe laacaʼ Dios.

² Cásica Zacarías, Jesús laaca bisiidiʼ ziuu ca xpinni Dios tobi si. Laabe gulee labe «grupu huiiniʼ de dendxuʼ» cani cheʼ guibáʼ. Ne gulee labe «xcaadxi dendxu» cani cabeza guibani lu Guidxilayú riʼ. Jesús guníʼ zaca guirácame «tobi si» ne laasibe nga chinándacame casi «pastor» stícame (Lucas 12:32; Juan 10:16, TNM). Peru zándaca guinabadiidxanu laca laanu: Ñee caquiiñeʼ gánnanu tu láʼ guiráʼ ca ungidu nabani tiempu riʼ la? Xi riníʼ ique ca ungidu de privilegiu sticaʼ. Pa guzulú tuuxa de congregación stinu gó pan ne gueʼ vinu lu Conmemoración, ximodo naquiiñeʼ guni tratarnu laabe. Ñee naquiiñeʼ chuʼnu xizaa pa cadale cani na ungidu laacaʼ la? Lu tema riʼ zacábinu ca guendarinabadiidxaʼ ca.

ÑEE CAQUIIÑEPEʼ GÁNNANU TU LÁʼ GUIRÁʼ CA UNGIDU LA?

3. Xiñee qué zanda gánnanu tupeʼ nga cani cheʼ guibáʼ para guni mandarné Cristu.

³ Cadi caquiiñepeʼ gánnanu tu láʼ ca ungidu nabani ndaaniʼ Guidxilayú, ne qué zabeendunu gastiʼ pa gacaláʼdxinu gúninu ni. Xiñee yaʼ. Purtiʼ qué zanda diʼ chuʼnu seguru pa dxandipeʼ ziécabe guibáʼ.^[1] Dxandíʼ maʼ biʼniʼ invitar Dios laacabe para chécabe guibáʼ, peru ziécabe pa guzuubacabe diidxaʼ dede ora gáticabe o dede ora gueeda fin. Nanna Binidxabaʼ ni ne riquiiñeʼ cani na «profeta laa» para gucaa ca ungidu gucheenecaʼ Dios (Mateo 24:24). Ora si maʼ bidii Jiobá últimu sellu ca ungidu nga maʼ zanda chuʼcaʼ seguru ziecaʼ guibáʼ. Rudiibe sellu riʼ laacaʼ ante gáticaʼ o zudiibe ni laacaʼ ante guzulú gran tribulación (Apocalipsis 2:10; 7:3, 14).

4. Pa qué ganna «xcaadxi dendxu» riʼ tu láʼ guiráʼ ungidu ni nuuruʼ lu Guidxilayú, xiñee rábicabe laacaʼ: «Zinedu laatu».

⁴ Yanna, pa qué ganna «xcaadxi dendxu» riʼ tu láʼ guiráʼ ungidu ni nuuruʼ lu Guidxilayú, xiñee rábicabe laacaʼ: «Zinedu laatu» yaʼ. Biblia na zanaazeʼ «chii hombre» que xhaba ti «judíu» ne zaniʼcaʼ: «Zinedu laatu, purtiʼ huayunadiágadu nuuné Dios laatu». Raríʼ ridúʼyanu caníʼ versículo riʼ de ti «judíu», peru despué maʼ riniʼni «laatu». Nga runi, cadi ti binni si nga «judíu» riʼ, sínuque ti grupu de binni. Para chinándacabe «judíu» riʼ la? cadi caquiiñeʼ diʼ gánnacabe tu láʼ cada ungidu. Ni caquiiñeʼ si gánnacabe nga tu grupu riʼ ne gacanécabe laacaʼ. Qué lica ruzeeteʼ Biblia chinándanu tuuxa binni, purtiʼ Jesús nga xaíque stinu (Mateo 23:10).

XI RINÍʼ IQUE CA UNGIDU DE PRIVILEGIU STICAʼ

5. a) Gunáʼ nga conseju ni cadi naquiiñeʼ guʼyaʼ ca ungidu casi guendariguite. b) Xiñee nabé nadipaʼ modo caguixhená ca diidxaʼ riʼ laacabe.

⁵ Cani ró pan ne reʼ vinu ora gaca Conmemoración naquiiñeʼ gánnacaʼ ti cosa: cadi guendariguite diʼ nga conseju zeeda lu 1 Corintios 11:27-29 (biindaʼ ni). Pa maʼ qué gusisaca ti ungidu privilegiu napa de gaca xhamigu Jiobá peru neca zacá gó pan ne gueʼ vinu lu Conmemoración la? maʼ «cadi cayuni ni na Dios», o zusihuinni maʼ qué runi respetar laabe (Hebreos 6:4-6; 10:26-29). Guizáʼ nadipaʼ modo caguixhená ca diidxaʼ riʼ ca ungidu, purtiʼ qué zacaacabe «premiu ni naguixhe Dios ibáʼ para cani nuu né Cristu Jesús tobi si» pa qué guzuubacabe stiidxaʼ Jiobá (Filipenses 3:13-16).

6. Xi riníʼ ique ca ungidu de privilegiu sticaʼ.

⁶ Sicaríʼ gudxi Pablu ca ungidu: «Yáquexa ma ulí Dios laatu para gaca tu xpinni la? rinaba laatu sa tu jneza». Ximodo naquiiñeʼ gúnicabe nga yaʼ. Pablu bisiene laacabe: «Cadi udxiiba tu laca laatu, sínuque lagaca nadóʼ, ne cadi casi ze tu idxiichi né tu stobi. Lagacané saa ti ihuinni nadxii saa tu». Laaca bisietenaláʼdxibe laacaʼ gúnicaʼ stipa pur chuʼcaʼ tobi si ne cadi tíndecaʼ (Efesios 4:1-3). Racané espíritu santu ca xpinni Dios para cadi gudxiibacaʼ laca laacaʼ (Colosenses 3:12). Nga runi qué runi cré ca ungidu jma risácacaʼ que xcaadxi. Laaca qué riníʼ íquecaʼ jma nápacaʼ espíritu santu que xcaadxi hermanu purtiʼ si ungidu laacaʼ. Laaca qué runi crécabe laasícabe nga jma riene chaahuicabe Biblia que xcaadxi. Ne qué rábicabe sti binni ruluíʼ ungidu laa ne naquiiñeʼ gó pan ne gueʼ vinu. Nánnacabe Jiobá si nga zanda guni invitar tuuxa para cheʼ guibáʼ.

7, 8. a) Xi qué runi ca ungidu. b) Xiñee qué runi ca ungidu nin tobi de cani bizéʼtenu riʼ.

⁷ Nanna ca ungidu ti privilegiu naroʼbaʼ nga guni invitar Dios laacaʼ para checaʼ guibáʼ, peru qué ribézacaʼ guʼyaʼ xcaadxi hermanu laacaʼ casi binni ni jma risaca (Efesios 1:18, 19; biindaʼ Filipenses 2:2, 3). Nánnacabe qué ñuni ungir Jiobá laacabe nezalú guiráʼ binni. Nga runi qué ridxagayaa diʼ ti ungidu pa gaca nagana para tuuxa guni cré maʼ ungidu laa. Nánnabe cayabi Biblia laanu cadi nagueendaca guni crenu tuuxa ni gabi laanu maʼ bidii Jiobá laa ti privilegiu especial (Apocalipsis 2:2). Ne ora gunibiáʼ ti ungidu xcaadxi hermanu, qué rabi diʼ laacabe maʼ ungidu laa. Xiñee yaʼ. Purtiʼ qué racalaʼdxiʼ gusisaca binni laa. Ne zándaca laaca qué ziuu dxi gábibe ni tuuxa. Laaca qué riniʼbe xi guiráʼ cosa sicarú chigúnibe ora maʼ nuube guibáʼ (1 Corintios 1:28, 29; biindaʼ 1 Corintios 4:6-8).

⁸ Qué riníʼ ique ca ungidu naquiiñeʼ chuʼcaʼ juntu né xcaadxi ungidu, casi ora ñácacaʼ ti grupu especial. Qué ruyúbicabe xcaadxi ungidu para guiniʼnécabe laacaʼ o para guni estudiárcabe Biblia laasícabe (Gálatas 1:15-17). Pa guni ca ungidu zacá la? zahuinni cadi zinándacaʼ ni na espíritu santu, laa ndaʼ ni nga racaneni xquidxi Dios chuʼ tobi si (biindaʼ Romanos 16:17, 18).

XIMODO NAQUIIÑEʼ GUNI TRATARNU CA UNGIDU

9. Xiñee naquiiñeʼ chuʼnu cuidadu né modo runi tratarnu ca ungidu. (Biiyaʼ cuadru ra na «Qué zúninu o qué zaninu xiixa ni guniná stobi pa nadxiinu laa»).

⁹ Jesús gudxi ca discípulo stiʼ: «Laatu la? biʼchi irá tu». Ne despué gúdxibe laacaʼ: «Ni gudxiiba laca laa la? jma huaxiéʼ zasaca, peru ni qué gudxiiba laca laa la? ngue zusisaca Dios laa» (Mateo 23:8-12). Nga runi cadi jneza diʼ gusisácanu tuuxa, neca ungidu laa. Biblia cayabi laanu gápanu fe cásica napa ca binnigola, peru qué rabi ni laanu chinándanu tuuxa hermanu (Hebreos 13:7). Dxandíʼ na Biblia naquiiñeʼ gusisácanu caadxi hermanu, peru cadi purtiʼ si ungidu laacaʼ, sínuque purtiʼ cayúnicaʼ dxiiñaʼ ndaaniʼ xquidxi Dios (1 Timoteo 5:17). Pa gusisácanu ca ungidu jma que guiráʼ hermanu la? zándaca zusituinu lúcabe, o zándaca dede gucaani laacabe gudxiibacabe laca laacabe (Romanos 12:3). ¡Qué racaláʼdxinu gúninu xiixa ni gucaa ca ungidu gucheenecaʼ Dios! (Lucas 17:2).

10. Ximodo rusihuínninu runi respetarnu ca ungidu.

¹⁰ Ximodo rusihuínninu dxandíʼ runi respetarnu ca hermanu ni maʼ gulí Dios para cheʼ guibáʼ. Nuu stale modo. Primé la? qué rinabadiidxanu laacabe ximodo beeda gácacabe ungidu, purtiʼ cadi xcuéntadinu ni (1 Tesalonicenses 4:11; 2 Tesalonicenses 3:11). Laaca qué rinabadiidxanu laacabe pa ungidu xheelacabe, bixhózecabe, jñaacabe o sti binnilídxicabe, casi ora ñaca ni ti herencia ni zanda guicaa sti binni (1 Tesalonicenses 2:12). Ne laaca qué rinabadiidxanu laacabe xiixa ni zándaca uguu laacabe triste. Guzéʼtenu ti ejemplu. Qué zanabadiidxanu xheelaʼ ti ungidu xi runi sentir purtiʼ qué ziuuné xheelaʼ laa ndaaniʼ Paraísu. Nánnanu zudii Jiobá guiráʼ ni racaláʼdxinu ndaaniʼ Paraísu (Salmo 145:16).

11. Xiñee cadi naquiiñeʼ chinándanu xcaadxi hermanu purtiʼ si nápacaʼ ti privilegiu.

¹¹ Qué zápanu guendanagana pa guni tratarnu ca ungidu cásica runi tratarnu xcaadxi hermanu. Xiñee yaʼ. Purtiʼ na Biblia zanda chuʼ tu guiníʼ «hermanu laacaʼ» ndaaniʼ congregación «peru cadi dxandíʼ» ni ne zándaca dede guiniʼcaʼ ungidu laacaʼ (Gálatas 2:4, 5; 1 Juan 2:19). Ne laaca zanda gueeda guchee chupa chonna de ca ungidu (Mateo 25:10-12; 2 Pedro 2:20, 21). Discípulo Judas na cadi chinándanu modo zeʼ xcaadxi ni ridagulisaanenu, purtiʼ si ungidu laacaʼ, purtiʼ si nabé runibiáʼcabe laacaʼ, o purtiʼ si maʼ zinecaʼ stale iza de cayúnicaʼ ni na Jiobá. Nabé risaca chinándanu conseju riʼ, purtiʼ pa gueeda guixélecabe de Jiobá la? qué zunítinu fe stinu ne qué zusaana de gúninu ni nabe (Judas 16).

ÑEE ZIUʼNU XIZAA PURTIʼ SI CADALE CA UNGIDU LA?

12, 13. Xiñee cadi naquiiñeʼ chuʼnu xizaa purtiʼ si cadale cani ró pan ne reʼ vinu.

¹² Pur stale iza bidúʼyanu modo zixiéʼ ca hermanu ni ró pan ne reʼ vinu ora raca Conmemoración. Peru lu ca últimu iza riʼ, jma maʼ stálecabe. Ñee naquiiñeʼ chuʼnu xizaa pur nga la? Coʼ. Guidúʼyanu tapa razón.

¹³ Runibiáʼ Jiobá «uná nga ni dxandí xpinni» (2 Timoteo 2:19). Nanna Dios tuu nga ungidu ne tuu nga cadi ungidu. Peru ca hermanu ni rugabaʼ panda binni ró pan ne reʼ vinu ora gaca Conmemoración la? qué gánnacaʼ ni. Nga runi rugábacabe cani na ungidu laa peru cadi dxandíʼ ni laacaʼ. Guzéʼtenu ti ejemplu. Dxiqué guyuu tu gudó pan ne güeʼ vinu peru despué maʼ qué ñúnicaʼ ni. Xcaadxi zándaca huará xquendabiaanicaʼ o nápacaʼ sti guendanagana ne nga rucaa laacaʼ guiníʼ íquecaʼ ziecaʼ guibáʼ. Pur guiráʼ ni maʼ bizéʼtenu riʼ, qué zanda diʼ ganna chaahuinu panda ungidu nuuruʼ lu Guidxilayú.

14. Xi ruzeeteʼ Biblia de panda ungidu nuu lu Guidxilayú ora guzulú gran tribulación.

¹⁴ Lu guidubi Guidxilayú nga nuu ca ungidu ora guedacaa Jesús laacaʼ. Guidúʼyanu xiná Biblia chiguni Jesús: «Oraque zaxidxi trompeta reciu ne zuseenda be ca ángel stibe gueda topa irá ni ma ulí be de idubi naca guidxilayú» (Mateo 24:31). Biblia rusiidiʼ ziuu caadxi si ungidu ndaaniʼ Guidxilayú lu ca últimu dxi (Apocalipsis 12:17). Peru qué ruzeeteni panda ungidu nuu ora guzulú gran tribulación.

15, 16. Xi chupa cosa naquiiñeʼ guiénenu de ca ungidu.

¹⁵ Jiobá nga riníʼ pora cuiʼ tuuxa para gaca ungidu (Romanos 8:28-30). Biasa si Jesús lade gueʼtuʼ nga bizulú gulí Dios caadxi binni né espíritu santu. Ne zándaca puru ungidu nga guiráʼ ca xpinni Cristu guyuu dxiqué. Peru pur stálepeʼ iza bihuinni cadi guiráʼ diʼ cani na ungidu laacaʼ que dxandíʼ ni laacaʼ. Neca zaqué, gulí Jiobá né espíritu santu stiʼ cani dxandíʼ xpinni Cristu ni nuu dxiqué. Laacabe nga cani zeeda gaca casi trigu ni bizeeteʼ Jesús zaniisi lade guixi malu (Mateo 13:24-30). Lu ca últimu dxi riʼ, cabiruʼ Jiobá binni para guizaa grupu de 144,000.^[2] Pa guiníʼ Jiobá zabí xcaadxi ungidu ante gueeda fin la? nánnanu cayúnibe jneza (Isaías 45:9; Daniel 4:35; biindaʼ Romanos 9:11-13, 16).^[3] Qué racaláʼdxinu gácanu casi ca hombre ni bizeeteʼ Jesús lu ti ejemplu, cani bidxiichiné xpixuaanaʼ purtiʼ si gudixe hombre que laacaʼ biaʼca biaxa xcaadxi hombre biʼniʼ dxiiñaʼ ti hora si (biindaʼ Mateo 20:8-15).

¹⁶ Cadi guiráʼ diʼ ca ungidu nga nuucaʼ lade «mozo ni nuu xpiaaniʼ ne ni runi jneza» (Mateo 24:45-47). Cásica guca dxi bibani ca primé xpinni Cristu que, ca dxi riʼ laaca chupa chonna si binni nga riquiiñeʼ Jiobá ne Jesús para gacanecaʼ stale binni guiziidiʼ ni dxandíʼ. Tiempu bibani ca primé xpinni Cristu que, chupa chonna si ungidu nga biquiiñeʼ Jiobá para gucaacaʼ Escrituras Griegas Cristianas. Yanna riʼ, chupa chonna ungidu si nga napa dxiiñaʼ de «gudii ni iquiiñe» xquidxi Dios.

17. Xi maʼ bizíʼdinu lu tema riʼ.

¹⁷ Xi maʼ bizíʼdinu lu tema riʼ. Maʼ gudixhe Jiobá guibani jma stale xpinni sin gatiʼ lu Guidxilayú riʼ, peru cani chiguni mandarné Jesús la? zabánicaʼ guibáʼ. Zudii Jiobá premiu guiráʼ xpinni, cásica «chii hombre» bizéʼtenu que, zaqueca «judíu» que. Ni ribézabe nga chinanda guiropaʼ grupu riʼ ni na ca ley stibe ne guzuubacaʼ diidxaʼ. Cadi naquiiñeʼ diʼ gudxiibaʼ guiropaʼ grupu riʼ laca laa. Naquiiñeʼ chúʼcabe tobi si ne juntu gúnicabe ni na Jiobá. Laaca naquiiñeʼ gúnicaʼ stipa ti ganda chuʼ guendariuudxi ndaaniʼ congregación. Laga cabézanu gueeda fin la? cadi gusaana de gúninu ni na Jiobá ne chinándanu Jesús casi ora ñácanu ti grupu de dendxuʼ si.