Ñee casi gota nisa rusaana gupa nga ca diidxaʼ ruíʼneluʼ binni la?

NABÉ risaca para laanu nga guni predicarnu, peru cadi guiráʼ diʼ binni rusisaca ni. Dede cani riuulaʼdxiʼ ni rusiidiʼ Biblia riníʼ íquecaʼ cadi caquiiñepeʼ guni estudiárnenu laacaʼ.

Zacapeʼ nga bizaaca Gavin, laabe riebe reunión peru qué rinabe guni estudiarnécabe laabe Biblia. Sicaríʼ guniʼbe: «Huaxiéʼ nannaʼ de Biblia ne rituí luaʼ ganna binni ni. Cadi nuaaʼ diaʼ quítecabe naa ne qué gapaʼ gana guneniáʼ laacabe compromisu». Ñee niníʼ íqueluʼ maʼ qué gapa Gavin remediu la? Coʼ, cadi zacá diʼ ni. Guníʼ ique modo racané cani rusiidiʼ Biblia binni. Sicaríʼ gudxi Jiobá xquidxi ni guyuu dxiqué: «Ca diidxaʼ ni riniéʼ zeeda gaca cani casi rocío, casi nisaguié dé ni riaba lu guixi gaʼ» (Deuteronomio 31:19, 30; 32:2). Guidúʼyanu xi chupa chonna modo zanda guchaaganu ca gota nisa ni rusaana gupa ne guiráʼ clase binni ni zanda gacanenu ora maʼ cayuni predicarnu (1 Timoteo 2:3, 4).

XIMODO NGA ZEEDA GACA PREDICACIÓN STINU CASI GOTA NISA RUSAANA GUPA

Nabé nadá gota nisa rusaana gupa. Chaahuidugá rihuinni ni, gupa stiʼ bi ca nga redagaca gota nisa. Ca diidxaʼ guníʼ Jiobá zeeda gaca cani casi gota nisa ni rusaana gupa, purtiʼ gúcabe nachaʼhuiʼ ora guníʼnebe xquídxibe, biquiiñebe diidxaʼ galán ne biénebe laacaʼ. Zácanu casi laabe pa guni respetarnu modo riníʼ ique binni ni cucaadiaga laanu ne zúninu zacá, pa gacanenu laabe chuʼbe razón stúbisibe ne laasibe quixhe íquebe xi gúnibe. Pa gúninu zacá, jma zanabe gucaadiágabe laanu ne zabeendunu ni galán ora guni predicarnu.

Nabé nagaʼndaʼ gota nisa rusaana gupa. Pa guiníʼ íquenu dede ante xi riuulaʼdxiʼ binni gucaadiaga la? zacaca nga zeeda gaca predicación stinu. Casi Chris, primé hermanu biʼniʼ predicar Gavin, qué nucaabe laa ñuni xiixa, sínuque biyúbibe stale modo para chuulaʼdxiʼ güínebe laa de Stiidxaʼ Dios. Bisiénebe laa napa Biblia ti tema ne ora ganna tuuxa ni, jma nagueenda riene ni rieeteʼ lu ca reunión stinu. Despué gúdxibe Gavin ni gucané laabe gudiibe cuenta dxandíʼ ni rusiidiʼ Biblia nga ra biʼniʼ estudiarbe modo cayaca cumplir ca profecía. Ngue bicaa Gavin chuulaʼdxiʼ guiziidiʼ ne despué de byuíʼnebe laa de tema riʼ stale biaje, maʼ guná guni estudiárnebe laa Biblia.

Riquiiñeʼ gota nisa rusaana gupa para guibani binni. Neza Israel riuu ti tiempu nabé nandáʼ ne nabidxi, ca dxi riʼ ridiʼdiʼ stale beeu sin guiaba nisaguié. Pa ñaca qué ñuu ca gota nisa rusaana gupa la? niguunduʼ ca yagahuiiniʼ que ne nibídxicaʼ. Dios laaca guníʼ ziuu ti sequía ca dxi stinu riʼ, ra ziaadxaʼ nisa peru en sentidu espiritual (Amós 8:11). Peru laaca bidii stiidxabe zeeda gaca ca ungidu casi gota nisa ni zeeda de Jiobá, purtiʼ zuíʼnecaʼ binni ca ndaayaʼ ni chiguedané Reinu. Laaca cayacané ca binni ni zeeda gaca de «xcaadxi dendxu» laacabe para gaca dxiiñaʼ riʼ (Miqueas 5:7; Juan 10:16). Zacapeʼ nga laani, ca diidxaʼ sicarú stiʼ Reinu ni rigüínenu binni rusibani ni laacabe en sentidu espiritual. Ñee rusisácanu ca diidxaʼ riʼ la?

Ti ndaayaʼ stiʼ Jiobá nga gota nisa rusaana gupa (Deuteronomio 33:13). Predicación stinu laaca ti ndaayaʼ ni para ca binni ni gucaadiaga laanu. Ne rihuinni zacá ni pur ni bizaaca Gavin, purtiʼ ora biʼniʼ estudiarbe Biblia gúnnabe guiráʼ ni huanabadiidxabe ante. Qué nindaa de ngue guyuunísabe ne yanna laabe ne xheelabe, Joyce, runi predicárcabe ca diidxaʼ nacubi ne galán stiʼ Reinu né stale gana.

GUSISÁCANU PREDICACIÓN STINU

Pa guiníʼ íquenu de gota nisa rusaana gupa, zándaca zucaa ni laanu gusisácanu jma dxiiñaʼ rúninu ora runi predicarnu. Ximodo yaʼ. Ti gota nisa si qué zugádxepeʼ, peru millón gota nisa la? zanda ugadxe guidubi Guidxilayú. Zacaca nga laanu, ruluíʼ gastiʼ nga rúninu ora runi predicarnu. Peru ora guchaagacabe ni né ni runi xcaadxi xpinni Jiobá, rihuinni careeche ca diidxaʼ nacubi ne galán ndaaniʼ «irá xixé guidxi» (Mateo 24:14). Yanna, ñee zaca predicación stinu casi ti ndaayaʼ ni zeeda de Jiobá para binni la? Zaca ni zacá, pa guiénenu zándaca gulá predicación stinu binni, pa guiénenu laacabe ne pa guyúbinu modo guinínenu laacabe de xiixa ni riuuláʼdxicabe.