¿Ñee racaneruʼ ca conseju zeeda lu Biblia laanu la?

NUU TU NÁ COʼ. Ti doctor guníʼ, ora iquiiñeʼ binni Biblia para guyubi conseju zeeda gaca ni casi ora niquiiñeʼ ti libru de iza 1920 para gusiidiʼ de Química. Zándaca dede guinabadiidxaʼ cani qué runi cré Biblia lii pa niquiiñeluʼ ti manual stiʼ ti computadora ni maʼ nayooxhoʼ para niziidiluʼ iquiiñeluʼ ti computadora nacubi. Ni nuunu guininu nga stale binni riníʼ naca Biblia ti libru yooxhoʼ ni qué zanda iquiiñeʼ binni yanna.

Stale binni rinabadiidxaʼ, ¿zanda xa gusiidiʼ Biblia laanu xiixa yanna riʼ pa maʼ nápanu tecnología? Ne riníʼ íquecabe zacá purtiʼ yanna riʼ maʼ nuu stale sitiu ne página de Internet ni racané ne rudii stale conseju binni. Laaca nuu stale programa ra runi entrevistárcabe ca psicólogo ne ca escritor ni nanna stale. Laaca rutoocabe stale libru de autoayuda, ne pur nga runi ganárcabe stale bueltu.

Né guiráʼ información ni nápanu yanna riʼ, ¿xiñee zanda gacané Biblia laanu yanna pa gucuá ni raca biaʼ chupa mil iza yaʼ? Ca binni ni qué runi cré Biblia riniʼcaʼ zeeda gaca Biblia casi ti libru de química ni maʼ nayooxhoʼ o ti manual stiʼ ti computadora ni maʼ nayooxhoʼ, peru ¿ñee dxandíʼ ni nácabe ca la? Coʼ, cadi dxandíʼ. Nabé ruchaa ciencia ne tecnología, peru ¿ñee huachaa modo guyáʼ binni guidxilayú la? Ni jma racalaʼdxiʼ binni nga chuʼ nayecheʼ, cadi guizaaca xiixa, chuʼ tobi si né familia stiʼ ne gapa amigu ni gacané laa.

Neca maʼ xadxí de gucuá Biblia, racaneruʼ ni binni. Laaca ruzeeteʼ ni Creador stinu nga guníʼ xi guicá luni. Rudii ni conseju ne racané ni laanu para gudxíʼlunu intiica guendanagana (2 Timoteo 3:16, 17). Peru ni jma risaca nga qué ziuu dxi gusaananu de iquiiñenu ca conseju zeeda lu Biblia. Biblia ná: «Nabani stiidxa Dios» (Hebreos 4:12, TNM).

¿Ñee dxandíʼ guiráʼ ni maʼ guninu riʼ la? ¿Naca Biblia ti libru yooxhoʼ la? o laasi ni nga libru ni zanda gacané laanu? Propósitu stiʼ revista Torre stiʼ ni rapa riʼ nga gacané ni lii guidxélaluʼ ca respuesta stiʼ ca pregunta riʼ.