Guirutiʼ zanda guilá de lu náʼ guendaguti

BIXUIʼLÚ cayuuyaluʼ ti película de ti binni famoso, zándaca ti gunaa ni riuuláʼdxiluʼ modo ruxhidxi pianu. Ruzulú película riʼ né caadxi escena ra rihuinni modo bibánibe dxi nahuiinibe, modo biziidibe de música ne pabiáʼ biʼniʼ practicarbe para gunda biziidibe. Despué rihuinni cudiibe conciertu, guiráʼ guidxi ra guyebe ne ximodo ziyácabe famosa ndaaniʼ stale guidxi. Peru qué nindaa maʼ bizulú bihuinni dxi maʼ huaniisibe ne últimu la? ximodo beeda gátibe.

Dxandíʼ historia riʼ, peru gunaa ni caninu riʼ, maʼ guti. Ne ngaca nga nizaaca pa ñaca ni ti científicu, ti deportista o sti binni famoso. Neca ñúnibe stale cosa lu xquendanabánibe, zándaca guiranu ninabadiidxanu: ¿Nanna xiruʼ ñúnibe pa qué ñóʼxhobe ne qué ñátibe yaʼ?

Triste guininu ni, peru nga nga ni cabézanu (Eclesiastés 9:5). Neca gúninu stipa para guxooñelunu de lu náʼ guendaguti, guiranu rióxhonu ne rátinu. Ne cadi nga si, zanda gueeda gátinu pur ti accidente o ti guendahuará malu. Biblia ná: «Zeda aca enda nabani stinu casi gupa riaba siadóʼ ne sti ratu ma gastiʼ» (Santiago 4:14).

Nuu binni qué ganna xi zazaaca né xquendanabani ne pur nga riníʼ: «Laidóʼ ne laidéʼ, purti qué ganna nu pa nabani ru nu ixíʼ» (1 Corintios 15:32). Nga rusihuinni, nanna binni zedandá dxi zati. Ora cadídinu lu xiixa guendananá, redandá ora rinabadiidxanu: ¿ñee zanda guibáninu jma xadxí la? ¿Tu laa zanda guicabi pregunta riʼ yaʼ?

Neca maʼ bidxela ca científicu xiixa ni huayacané binni guibani xcaadxi, nuuruʼ tu cuyubi modo guibani binni jma xadxí, peru laaca nuu stale pregunta ni guirutiʼ qué ganda guicabi, casi ¿xiñee rióxhonu ne rátinu? Ne ¿ñee zedandá dxi zalanu de lu náʼ guendaguti la? Xcaadxi yaza ni zeeda ca zusiene ca tema riʼ ne zacabi ni pregunta riʼ: ¿ñee zanda guibáninu jma xadxí la?