Ti dxiiñaʼ ni cayacané Dios gaca
1 Huaxiéʼ si de ca testigu stiʼ Jiobá yanna la? nápanu stale scuela, bidxichi o nácanu tuuxa ndaaniʼ guidxilayú riʼ. Pur nga la? nuu binni ruuyaʼ dxiiñaʼ ni rúninu de yoo pur yoo riʼ casi xiixa ni qué risaca (Isa. 53:3). Peru, dxiiñaʼ ni rúninu de gusiidinu binni de lu Biblia riʼ la? riguixhedxini ladxidóʼ miyón binni de guidxilayú riʼ ne rucaani laacabe cuézacabe guiráʼ ni chiguedané Dios para laacabe. Ximodo ndiʼ cayanda de que binni ni qué gápapeʼ scuela cueenduca jma de ni cabézacaʼ lu dxiiñaʼ riʼ yaʼ. Purtiʼ Dios nga cayacané laacabe gácani (Mat. 28:19, 20; Hech. 1:8). Apóstol Pablu bisiene «Peru ulí Dios cani huaxiéʼ nuu xpiaani para binni guidxilayú, ti usituí lú cani nuu xpiaaniʼ.» (1 Cor. 1:26-29.)
2 Jma stale de ca apóstol ne stuudxi de cani primé guzané Cristu la? «huaxiéʼ [gu]pa ca scuela ne iruti [gu]ca ca» (Hech. 4:13). Peru, bicheechecabe stiidxaʼ Reinu ne stale guendanadxibalú, ne Jiobá guluu ndaayaʼ ca stipa bíʼnicabe. Neca guyuu tu bicueeza ne bicaalú laacabe la? stiidxaʼ Jiobá guyuuruni ne biniisiruni stálepeʼ. Gastiʼ liica nucueezadxí dxiiñaʼ que purtiʼ Jiobá gucané gácani (Hech. 5:38, 39; 19:20). Zacaca nga huayaca ca dxi stinu riʼ. Nin guendarucaalú stiʼ ca gobiernu ni jma nadipaʼ qué huacueeza de que ca diidxaʼ nacubi ne galán riʼ chuʼruʼ ne iniisini (Isa. 54:17).
3 Guiráʼ guendanaróʼ ca zeeni para Dios. Rudii dxiiñaʼ cayúninu stiʼ Dios riʼ rasón para uguunu guendanaróʼ stinu la? Coʼ. Apóstol Pablu bicaa de dxiiñaʼ ni rúninu riʼ sicarí:«Nabé risaca ni bisaana né Dios laa[n]u, [ndaaniʼ guisu de yu], peru laa[n]u gasti nga laa[n]u, ne Dios cayuni irá ni ne enda nandxóʼ stiʼ». (2 Cor. 4:7). Laabe biiyabe de que zanda gúnibe xhiiñaʼ Reinu ne stipa si ni cudii Dios laabe (Efe. 6:19, 20; Fili. 4:13).
4 Laanu laaca cayuuyanu de que cayanda cayúninu xhiiñaʼ Reinu purtiʼ «[c]ayacané Dios [laanu]»(Hech. 26:22). Pur dxiiñaʼ rúninu de gucheechenu stiidxaʼ Reinu guidubi lu guidxilayú la? Dios caquiiñeʼ laanu para gunidiiti ca guidxi roʼ ca, ne zacá nga ruzulú dxi ni zeeda guidxiña para guinitilú binni (Ageo 2:7). ¡Guizáʼ naroʼbaʼ nga guenda nápanu purtiʼ «tobi si runine [n]u Dios dxiiñaʼ» de gutópanu binni para guni adorar laabe! (1 Cor. 3:6-9.)