Cueendunu stale ra gúʼndanu libru Acerquémonos a Jehová
1 ¡Guizáʼ biéchenu ora gucuaanu libru Acerquémonos a Jehová lu Guendaridagulisaa de Chonna Gubidxa «Cani rucheeche stiidxaʼ Reinu ne stale gana»! Stale tu laa biindaca ni. Xcaadxi biindaʼ ni purtiʼ textu stiʼ iza 2003 «Laidxiña gaxha de Dios, ne laa zadxiña gaxha de laatu» bicaa laacaʼ gúnicaʼ ni (Sant. 4:8).
2 Lu marsu zuzulunu gúʼndanu libru riʼ ra ridagulisaa Grupuhuiiniʼ ni Ruundaʼ Libru. Ximodo zanda cueendunu jma ora gúʼndanu ni yaʼ. Naquiiñeʼ guʼndachaahuinu ni dede ante. Zúʼndanu cada capítulo lu chupa semana, ne ziuundaʼ huaxhiéʼ párrafo. Ndiʼ la? zudii lugar chuʼ stale tiempu para guininu cani dxandíʼ guyuuláʼdxinu ra biindanu ne ni guníʼ íquenu de ni bizíʼdinu. Ne semana guiluxhe ti capítulo la? jma huaxhiéʼ párrafo ziuundaʼ ti gápanu tiempu guininu xiixa risaca stiʼ libru ca.
3 Dede lu guiropa capítulo ca la? zeeda ti cuadru ni láʼ «Preguntas para meditar» ra maʼ ziluxe guiráʼ ca capítulo ca. Ora maʼ bilúxecabe ne últimu párrafo ca la? binnigola ni rusiidiʼ ra riuundaʼ libru ca zuundanebe laacaʼ cuadru ca. Zábibe cani cucaadiaga ca guiniʼcaʼ xi ribeenducaʼ ora guníʼ íquecaʼ de cani caníʼ Biblia (Pro. 20:5). Aparte de ca guendarinabadiidxaʼ ni ne libru ca la? nuu tiru zanda guinabadiidxabe sicaríʼ: «Ni biinduʼ riʼ, xi cayábini lii de Jiobá. Ximodo racaneni lii lu xquendanabániluʼ. Ximodo zanda iquiiñeluʼ ni para gacaneluʼ stobi». Ni icá ique ni cusiidiʼ grupuhuiiniʼ ca nga gábibe laacaʼ de que ni guiníʼcabe ca guireeni de ladxidóʼcabe, ne cadi guinabadiidxabe ni qué risácapeʼ para gúʼyasibe pabiáʼ nánnacaʼ.
4 Gástiruʼ sti libru casi Acerquémonos a Jehová. Neca guiráʼ ni rudii «moso ni nuu xpiaaniʼ ne ni runi jneza» [esclavo fiel y discreto] rusisaca cani Jiobá la? libru riʼ gucuani para gacaneni laanu gunibiaʼnu ca guenda stiʼ Dios (Mat. 24:45-47). ¡Guizáʼ sicarú nga ni cabeza laanu! Zabeendunu stale ra guʼndachaahuinu ximodo nga Jiobá. Ni chiguidúʼndanu riʼ gacaneni laanu guidxíñanu jma ranuu Bixhózenu ni nuu guibáʼ, zacá la? zánnanu jma para ganda gacanenu xcaadxi binni gúnicaʼ zacaca.