Ziéchenu stálepeʼ ora gúʼndanu libru Xipeʼ ndiʼ cusiidiʼ Biblia
1 Tobi de cani jma bisiecheʼ laanu lu guendaridagulisaa de chonna gubidxa «Guzúʼbanu Stiidxaʼ Dios» nga libru Xipeʼ ndiʼ cusiidiʼ Biblia. Cumu qué zandaa diʼ zaquiiñenu libru riʼ ora ucheechenu diidxaʼ ne ora chigúʼndanenu binni ra lidxi la? galanpeʼ nga gúʼndanu ni ti gánnanu xidé caniʼni. Pur nga runi zuzulú guiuundani ra nuu Grupu Ni Ruundaʼ Libru stiʼ ca Binni Ridagulisaa lu semana 17 stiʼ abril iza 2006.
2 Binnigola ni rusiidiʼ ra riuundaʼ libru ca zuundabe ca endarinabadiidxaʼ ni zeeda ra ruzulú cada capítulo. Ora maʼ cayuundaʼ libru ca zanabadiidxabe cani zeeda ñee yaza stini, ziuundaʼ ca textu ni naquiiñeʼ si ne zusiénecabe cani. Ni zanda acané laanu para guietenaláʼdxinu ni maʼ bíʼndanu nga cuadru ra na «Ni rusiidiʼ Biblia», purtiʼ laani cacabi ni ca endarinabadiidxaʼ ni zeeda ra ruzulú cada capítulo. Iráʼ cani nuu lade grupu ca ziuláʼdxicaʼ icábicaʼ purtiʼ galanpeʼ modo cusiéneni ca tema zeeda luni ne cadi nagana diʼ cani.
3 Lu apéndice stiʼ libru riʼ caníʼ jma de ni cusiidiʼ Biblia ne zanda iquiiñenu cani ora usiénenu cani cayúʼndanenu de xiixa tema. Nuu tiru ziuundaʼ chupa chonna ndaa stiʼ apéndice ca ra nuu Grupu Ni Ruundaʼ Libru stiʼ ca Binni Ridagulisaa. Ni guʼndaʼ ca párrafo stiʼ libru riʼ zuundabe idubi apéndice ni caníʼ de tema ca. Pa ziuulapeʼ ni chiguundabe ca la? zanda gúʼndabe ti ndaa gá. Cumu apéndice ca cadi né endarinabadiidxaʼ la? binnigola ni rusiidiʼ ra riuundaʼ libru ca zanabadiidxabe ni jma naquiiñeʼ si.
4 Libru Xipeʼ ndiʼ cusiidiʼ Biblia ziuundaʼ ni nagueendaca lade Grupu Ni Ruundaʼ Libru. Peru cadi naquiiñeʼ gúʼndanenu ca binni ni cusíʼdinu ca nagueenda casi modo chigúʼndanu ni racá, jmaruʼ si pa huaxiéʼ nánnacabe de Biblia (Hech. 26:28, 29). Ora gúʼndanenu binni zuyúbinu ximodo jma guiénecabe xiixa textu o dibuju ni zeeda luni. Nga runi, cadi guiaadxaluʼ nin ti semana ca endaridagulisaa ra guiuundaʼ libru Xipeʼ ndiʼ cusiidiʼ Biblia ne biʼniʼ stipa pur icábiluʼ lu cani.