Ximodo iquiiñenu libru Dios ni nadxii laanu para guidúʼndanenu binni de Biblia
1. Xi para guca libru Dios ni nadxii laanu.
1 ¡Biéchenu stale ora gucuaanu libru Cadi guixélenu de Dios ni nadxii laanu lu guendaridagulisaa de chonna gubidxa ni biree lá «Gudiʼnu lugar gacané espíritu stiʼ Dios laanu»! Raqué guníʼcabe guca libru riʼ para gacaneni laanu gunibiáʼ chaahuinu ne gannaxhiinu ca ley ni maʼ gudixhe Jiobá chinándanu, ne cadi guca ni para gusiidini cani jma risaca zeeda lu Biblia. Qué zusaananenu libru riʼ binni ora maʼ zigucheechenu diidxaʼ.
2. Ximodo zaquiiñeʼ libru riʼ, ne tu zusaananenu ni.
2 Libru cubi riʼ nga stobi ni zúʼndanenu binni, guiluxenésinu laacaʼ libru Xipeʼ ndiʼ cusiidiʼ Biblia. Bietenalaʼdxiʼ, cadi guiráʼ diʼ binni nga zaniisi biaʼ queca lu stiidxaʼ Dios, nga runi naquiiñeʼ gúʼndaneluʼ cada tobi biaʼ laa. Peru, naquiiñeʼ gúʼyaluʼ guiene chaahuibe biaʼ gúʼndatu ca. Cadi guiráʼ diʼ binni ni maʼ biindaʼ chupa chonna libru ante nga zúʼndanenu laa libru cubi riʼ, jmaruʼ si pa qué riebe ca guendaridagulisaa ca ne rusihuínnibe qué racaláʼdxibe guibánibe modo maʼ biziidibe lu Biblia.
3. Xi zanda gúninu pa cadúʼndanenu tuuxa binni libru Biʼniʼ adorar Dios.
3 Pa yanna riʼ cayuundaneluʼ tuuxa libru Biʼniʼ adorar Dios ne mayaca guilúxetu ni la? galán gunduuxetu ni ne gábiluʼ laabe gúʼndabe libru Dios ni nadxii laanu stúbibe. Peru jma galán gúʼndatu libru cubi riʼ pa deruʼ bizulutu sti libru ca. Cásica raca ne libru Xipeʼ ndiʼ cusiidiʼ Biblia, zanda gúʼndatu ca apéndice stiʼ libru cubi ca pa caquiiñepeʼ.
4. Xi gúninu pa chúʼnisa ti binni ni cayúʼndanenu ante guiluxe libru Xipeʼ ndiʼ cusiidiʼ Biblia o libru Dios ni nadxii laanu.
4 Pa tuuxa chúʼnisa ante guiluxenenu laa guiropaʼ libru ca, naquiiñeʼ guʼndanérunu laabe libru Dios ni nadxii laanu dede ra guiluxe ni. Ne pa chúʼnisa binni ca ante guiluxe libru cubi ca la? zanda gucaʼnu tiempu gúʼndanenu laabe, revisita gúninu ca ne gucaʼnu ridúʼndanenu ti binni. Ni rucheeche diidxaʼ chiné laabe ca laaca zucaa tiempu ca.
5. Ximodo zanda iquiiñenu libru Dios ni nadxii laanu para gacanenu cani maʼ qué rucheeche diidxaʼ.
5 Ora gabi ti binnigola ni nuu lu Grupu ni Ruuyaʼ Dxiiñaʼ stiʼ ca Binni Ridagulisaa lii gúʼndaneluʼ tuuxa ni maʼ qué rucheeche diidxaʼ la? zándaca zábibe lii gunáʼ de ca capítulo stiʼ libru Dios ni nadxii laanu ca gúʼndaneluʼ binni ca. Peru cadi naquiiñeʼ gúʼndaneluʼ laabe stale tiempu. Cadi dxandíʼ sicarú libru riʼ purtiʼ gúcani para gacaneni laanu cadi guixélenu de «Dios ni nadxii» laanu la? (Judas 21.)