Gúninu casi biʼniʼ Maestru Ni Jma Nanna Gusiidiʼ ra iquiiñenu libru Xipeʼ ndiʼ cusiidiʼ Biblia
1. Ximodo bisiidiʼ Jesús.
1 Jesús, Maestru Ni Jma Nanna Gusiidiʼ que, biyúbibe modo guiene binni guiráʼ ni bisiidibe ne nayaʼni modo bíʼnibe cani. Para gucaabe ca binni que guiníʼ íquecaʼ la? guyuu tiru gunabadiidxabe laacaʼ ximodo ruuyacaʼ xiixa de ni caniʼbe (Mat. 17:24-27). Ora guiniʼbe xiixa riniʼbe zeedani lu Stiidxaʼ Dios (Mat. 26:31; Mar. 7:6). Biyúbibe modo cadi gusidxágabe xquendabiaaniʼ ca discípulo stibe purtiʼ nánnabe chaahuidugá ziénecaʼ guiráʼ ni gábibe laacaʼ (Juan 16:12). Laaca bizaaláʼdxibe guiénecaʼ ne guni crecaʼ guiráʼ ni bisiidibe laacaʼ (Mat. 13:51). Libru Xipeʼ ndiʼ cusiidiʼ Biblia gúcani para gacaneni laanu gusíʼdinu binni cásica biʼniʼ Jesús ni.
2. Xi zanda gúninu ante guzulú gúʼndanenu binni tobi de ca capítulo stiʼ libru ca.
2 Ca guendarinabadiidxaʼ ni zeeda ra ruzulú ca capítulo ca. Ora guzulú gúʼndaneluʼ binni ti capítulo, galán gúʼndaneluʼ laabe ca guendarinabadiidxaʼ ni cá ñee tema stiʼ capítulo ca. Para uquiinde binni ca guiziidiʼ jma la? biindaʼ cani canabadiidxaʼ ra ruzulú capítulo ca o zanda gábiluʼ laabe ximodo ruuyabe cani canabadiidxaʼ ni. Pa gúʼyaluʼ cadi jneza ni caniʼbe la? cadi gábiluʼ laabe cadi jneza ni guniʼbe. Zanda gudiiluʼ xquíxepeʼ laabe pur ni guniʼbe ne bizulú biindané laabe capítulo ca. Cani guicábibe lii ora guinabadiidxaluʼ laabe, zacané cani lii gánnaluʼ paraa naquiiñeʼ gusiéneluʼ laabe jma.
3. Ximodo zanda gúʼndanenu binni para ganda guiene laanu.
3 Ca textu ni zeeda luni. Guiráʼ cani gusíʼdinu binni naquiiñeʼ guiree cani de lu Biblia (Heb. 4:12). Peru cadi naquiiñeʼ gúʼndaluʼ guiráʼ ca textu ni zeeda lu libru ca. Jma nga naquiiñeʼ gúʼndaneluʼ laabe ca textu ra zeeda cani runi crenu. Ne cadi naquiiñeʼ gúʼndaneluʼ laabe ca textu ni cayabi lii guiráʼ ni guca lu ti historia. Libru Xipeʼ ndiʼ cusiidiʼ Biblia nayaguieʼ modo rusiéneni guiráʼ ni rusiidiʼ Biblia, nga runi biyubi diidxaʼ ni ganda guiene binni ca ora maʼ cayuundaneluʼ laa. Bicaa ique guzeeteluʼ cani jma naquiiñeʼ si, ne cadi guzeeteluʼ xcaadxi cosa ni zeeda ndaaniʼ xcaadxi libru ni cadi naquiiñeʼ gánnabe.
4. Pora nga cadi naquiiñepeʼ gusiénenu cani zeeda lu ca apéndice ca.
4 Apéndice. Apéndice ca nápani catorce tema ni cusiene cani zeeda lu caadxi capítulo stiʼ libru ca. Maʼ de lii riaana pa gúʼndaneluʼ ni binni ca. Zanda uguuluʼ gana ni cayuundaneluʼ ca para gúʼndabe chupa chonna de ca tema stiʼ apéndice ca stúbibe, jmaruʼ si pa maʼ riénebe ne runi crebe ni cá lu ca tema ca. Casi pa cayuundaneluʼ binni ca capítulo 4 stiʼ libru ca ra ná: «Tuu nga Jesucristu» ne laabe biʼniʼ crebe Jesús nga Mesías ni biseendaʼ Dios la? zándaca maʼ cadi naquiiñeʼ gúʼndaneluʼ laabe apéndice ra na «Jesucristu, Mesías ni chigueeda que». Ne nuu tiru la? galán cueeluʼ ti tiempu para gúʼyaluʼ xiná apéndice ca o gúʼyaluʼ xiixa ni cuzeeteʼ ni.
5. Pa gúʼndanenu binni ca ni na apéndice, ximodo naquiiñeʼ gúninu ni.
5 Pa racaláʼdxiluʼ gúʼndaneluʼ laabe apéndice stiʼ libru ca, zanda guyúbiluʼ dede ante xi guinabadiidxaluʼ ne bíʼnini cásica ora maʼ cayuundaneluʼ laabe ti capítulo. Pa gúʼyaluʼ caʼruʼ guiene chaahuiʼ binni ca ni cusiéneluʼ laa, zándaca cueeluʼ ti tiempu para gúʼyatu xiná apéndice ca. Nga zacané lii gánnaluʼ cayénebe ni cayuundabe.
6. Ximodo zanda iquiiñenu últimu cuadru stiʼ ca capítulo ca.
6 Cuadru ni láʼ «ni rusiidiʼ Biblia». Últimu cuadru ni napa cada capítulo cacábini cani canabadiidxaʼ ra ruzulú capítulo ca. Zanda iquiiñeluʼ cani zeeda lu últimu cuadru ca para ganda guietenaláʼdxitu cani jma risaca ni zeeda guiníʼ capítulo ca. Nuu tiru, cani rucheeche diidxaʼ ruundanecaʼ binni ni cá ndaaniʼ cuadru ca ne ca textu ni cá luni ne huayuuyacaʼ huayacaneni binni. Oracá rinábacabe binni gusiene laacabe ximodo biáʼsipeʼ ni ná cuadru ca ne ni caníʼ textu ca. Zacá la? zanna ni rucheeche diidxaʼ ca pa biene binni ca cani jma risaca zeeda lu capítulo ca, ne pa biénebe ca textu ni zeeda luni ne pa runi crebe guiráʼ ni biziidibe. Zacá zacaneni ni caziidiʼ ca iquiiñeʼ chaahuiʼ Biblia para gusiénebe sti binni ni cá lu ni.
7. Ximodo zanda iquiiñenu libru Xipeʼ ndiʼ cusiidiʼ Biblia para gúninu dxiiñaʼ ni bisaanané Jesús laanu.
7 Para ganda gusiidiʼ chaahuinu binni ne gácacaʼ xpinni Cristu la? naquiiñeʼ gusíʼdinu laacabe cásica biʼniʼ Jesús (Mt. 28:19, 20). Ne libru Xipeʼ ndiʼ cusiidiʼ Biblia zacaneni laanu gúninu zacá. Biindané ca binni ca libru riʼ, purtiʼ cadi nagana diʼ modo cusiéneni ca tema ca ne ziuuláʼdxicabe gúʼndacabe ni.