Iquiiñenu libru Xipeʼ jneza

Ora maʼ ziziidiʼ ca estudiante stinu ni na Biblia ne maʼ rúnicaʼ ni caziidicaʼ lu xquendanabánicaʼ, rusihuinni nga maʼ ziniisicaʼ lu Stiidxaʼ Dios (Sal. 1:1-3). Pa iquiiñenu libru Xipeʼ ca jneza, zacanenu ca estudiante stinu guiniisicaʼ lu Stiidxaʼ Dios.

Guendarinabadiidxaʼ. Ra ruzulú cada capítulo zeeda caadxi guendarinabadiidxaʼ ni ricabi tema ca ora guiuundaʼ. Zanda guidúʼndanu cani, peru cadi para guicábibe, sínuque para chuuláʼdxibe ni zeeda lu capítulo ca. Laaca zanda gábinu laabe guicábibe cani né chupa chonna si diidxaʼ. Pa qué guicábibe jneza, cadi gábinu laabe gastiʼ, purtiʼ nga zacané laanu gánnanu xii nga ni jma caquiiñeʼ gusiénenu ora guni estudiarnenu laabe (Prov. 16:23; 18:13).

Apéndice. Pa maʼ biene chaahuiʼ estudiante stinu capítulo ni cadúʼndanenu laa, zanda gábinu laa cuee tiempu para guʼndaʼ apéndice stini stubi. Ora chigánnanu laabe sti biaje, guinabadiidxanu laabe xiixa ti gánnanu pa biene chaahuibe ni. Peru pa caquiiñepeʼ la? zanda cueenu chupa chonna minutu ora maʼ cayuni estudiarnenu laabe para guidúʼyanu ni na guidubi apéndice ca o ti ndaa si. Zanda guidúʼndanu ca párrafo ca ne gúninu chupa chonna guendarinabadiidxaʼ ni maca gudixhe chaahuinu.

Ra riluxe capítulo. Cada capítulo stiʼ libru riʼ riluxené ni ti cuadru ra zeeda respuesta stiʼ ca guendarinabadiidxaʼ ni ruzuluné ti capítulo. Pa guidúʼndanenu cani laabe, zadúʼyanu pa biénebe cani jma naquiiñeʼ gánnabe de tema ca ne pa nánnabe gusiénebe cani. Despué de guidúʼndanenu laabe ca respuesta ne ca textu zeeda lu cuadru ca, guinábanu laabe iquiiñebe ca versículo ca para gusiénebe xiñee dxandíʼ cada puntu zeeda lu cuadru ca (Hech. 17:2, 3).