Gudiʼnu Jiobá ni jma sicarú ni nápanu
1 Ley ni bidii Jiobá guidxi Israel que na de que ca maniʼ ni gudiicabe gati la? naquiiñeʼ chúʼcame nazaaca. Qué ninádibe nicaabe maniʼ ni huará (Lev. 22:18-20; Mal. 1:6-9). Ne ora usigáʼdecabe tuuxa maniʼ para gati la? guiráʼ ca za –ra jma sicarú de laame que –ngue nga para Jiobá. (Lev. 3:14-16). Cumu Jiobá nga Bixhoze ne Dueñu stiʼ Israel la? ngue runi gucuaabe ni jma galán.
2 Cásica dxiqué la? Dios laaca racaláʼdxibe gudiʼnu laabe ni jma galán ni nápanu. Dxiiñaʼ ni cayúninu stiʼ Jiobá la? naquiiñeʼ gusihuinni ni de que nápanu stale respetu laabe. Ya, dxandíʼ nga gadxé gadxé modo nabáninu. Peru, galán gúʼyanu pa dxandipeʼ cudiʼnu Jiobá ni jma sicarú (Efe. 5:10).
3 Gúninu ni na Jiobá de guidubi ladxidoʼno. Para gusisácanu Jiobá ne chindanu dede ladxidóʼ cani rucaadiaga laanu la? cadi riquiiñeʼ diʼ gúninu xhiiñaʼ Reinu purtiʼ si maʼ biaʼnu gúninu ni. Guiráʼ ni guininu de Dios ne de cani sicarú ni naguixhe íquebe gúnibe la? naquiiñeʼ guiáleni de ladxidoʼno purtiʼ nuunu gudiʼnu xquíxepeʼ laabe (Sal. 145:7). Nga runi, riquiiñeʼ quíxhenu ti hora ni chinándanu para gúʼndanu Biblia laasinu ne guiénenu ni (Pro. 15:28).
4 Para gudiʼnu Jiobá ni jma galán la? laaca riquiiñeʼ ganaxhiinu binni cásica laabe (Efe. 5:1, 2). Ne guendarannaxhii ca la? rucaani laanu chinenu stiidxaʼ Reinu riʼ ra nuu guiráʼ binni (Mar. 6:34). Rucaani laanu acanenu ca binni ni rucaadiaga laanu ne guiníʼ íquerunu laacabe despué de maʼ yegánnanu laacabe, ne ibiguétanu ra nuucabe. Rucaani laanu gúninu biaʼ gándatiʼ para acanenu laacabe iniisicabe lu stiidxaʼ Dios (Hech. 20:24; 26:28, 29).
5 Gusisácanu Jiobá ne ca diidxaʼ guiree ruaanu. Sti modo gudiʼnu Jiobá ni jma sicarú nga gúninu dxiiñaʼ de guendarucheeche diidxaʼ ca jneza. Pa cuaquichaahuinu ne quixhe íquenu xii nga cani riquiiñeʼ gúninu la? zánnanu iquiiñenu xtiémpunu galán (1 Tim. 4:10). Pa guʼndachaahuinu dede ante la? zanda guinínenu binni modo ganda guiene, ne zuuyacabe runi crenu ni caninu, zacá zándaca idxélanu jma binni ni ucaadiaga laanu (Pro. 16:21). Sicaríʼ la? ora gucheechenu diidxaʼ, guiráʼ ni guiree de ladxidoʼno dxandipeʼ zeeda gaca cani casi xiixa ni cusigáʼdenu Jiobá para guisácabe (Heb. 13:15).