Lii hombrehuiiniʼ o dxaapahuiiniʼ, biindaʼ Stiidxaʼ Dios
1 Ora nahuiiniʼ binni nga riuu lu endanagana ne riníʼ ique xi guniné endanabani stiʼ. Ne lii zándaca nuuluʼ lade guiráʼ ca Testigu ni nahuiiniʼ ni cadxagalucaʼ guiráʼ dxi cani cucaa laacaʼ ireecueʼcaʼ de modo na Dios sácabe. Ante quixhe íqueluʼ xi gúʼndaluʼ, ne xi dxiiñaʼ guʼnuʼ ne pa zachaganaluʼ la? jma jneza nga quixhe íqueluʼ xi guenda nga nuuluʼ ugaandaluʼ ndaaniʼ xquidxi Jiobá, purtiʼ zacá si nga zanda gúʼyaluʼ xipeʼ nga guʼnuʼ ni zacané lii lu idubi endanabani stiluʼ. Quíxheluʼ xii ndiʼ cani ugaandaluʼ la? zacané ni lii guʼnuʼ cani ne endabiaaniʼ ne iree cani lii jneza. Pa gúʼndaluʼ Biblia ne guiníʼ ique chaahuiluʼ ni na ni la? zucaani lii chinanduʼ cani cayabi Dios lii. Ne pa cani naguixhuʼ guʼnuʼ ca jneza cani la? zabeenduluʼ ni galán (Jos. 1:8; Sal. 1:2, 3).
2 Ximodo zacaneni lii. Binidxabaʼ ne ca xpinni nápacaʼ stale modo para ucaacaʼ laanu gucheʼnu (1 Juan 2:15, 16). Zándaca nannuʼ de xtuudxi de cani rineluʼ scuela o de xcaadxi ni nahuiiniʼ biaʼcaʼ lii cadi caree diʼ cani laacaʼ jneza purtiʼ zinándacaʼ stobi. Chinándaluʼ ni na Biblia la? zudiini lii stipa ni caquiiñeluʼ para aca xpiaʼluʼ galán ne chúʼneluʼ Jiobá galán ti cadi ucheeluʼ. Ne laaca zacané Stiidxaʼ Dios lii para ixéleluʼ de ca trampa stiʼ Binidxabaʼ (2 Cor. 2:11; Heb. 5:14). Saluʼ lu neza stiʼ Jiobá la? zudiini lii stale endanayecheʼ: ziuuluʼ galán ne ni cayúniluʼ lu endanabani stiluʼ (Sal. 119:1, 9, 11).
3 Ca conseju ni zeeda lu Stiidxaʼ Dios qué ziuu dxi iníticaʼ ne jma dxiʼbaʼ cani que endabiaaniʼ stiʼ hombre (Sal. 119:98-100). Gunibiáʼ chaahuiluʼ ne guiníʼ íqueluʼ lu ca diidxaʼ ni bizabiruaa Jiobá ne guni orarluʼ la? zacané cani lii guidxíñaluʼ laabe jma, purtiʼ laabe nga Gudixhestibe Biblia ne laabe nga ti Dios ni nanna guiráʼ ni. Ne laabe cuzabiruaabe: «Zudiéʼ lii guendariene, ne zusiene lii lu neza ni naquiiñeʼ cheluʼ. Dxandipeʼ zudiéʼ conseju lii ne luaʼ ziuu luguialuʼ» (Sal. 32:8).
4 Gulee tiempu gúʼndaluʼ ni. Ti baʼdudxaapaʼ Testigu bicaa íquebe gúʼndabe idubi naca Biblia, ne ndaaniʼ ti iza biluxe biindabe ni. Xi guleendube yaʼ. Laabe rietenaláʼdxibe sicaríʼ: «Biziideʼ stálepeʼ de Jiobá, ne cani biziideʼ ca bichiña cani naa laabe ne bicaa cani naa idxibeʼ laabe guiráʼ dxi nabaneʼ» (Sant. 4:8). Maʼ huayúʼndaluʼ idubi naca Biblia la? Pa cadi zacá ni la? xiñee qué ucaa íqueluʼ guʼnuʼ ni yaʼ. Jiobá zaguu ndaayaʼ ca stipa guʼnuʼ ne zabeenduluʼ ni galán.