Guendaridagulisaa de Chonna Gubidxa stiʼ ca Testigu stiʼ Jiobá «Guzúʼbanu Stiidxaʼ Dios» 2005
1 Jiobá, Dios ni jma nanna usiidiʼ, canábabe laanu idagulisaanu para usiidibe laanu ca neza stibe (Isa. 30:20, 21; 54:13). Riquiiñebe mozo ni nuu xpiaaniʼ ne ni runi jneza para quixhe modo aca ca guendaridagulisaa de chonna gubidxa iráʼ iza (Mat. 24:45-47). Runi sentirnu casi biʼniʼ sentir David ni biindaʼ sicaríʼ: «Lade stale binni dagulisaa zusisacaʼ Jiobá» (Sal. 26:12). David biene chaahuiʼ pabiáʼ nga risaca usiidiʼ Jiobá laabe, ngue runi udixhe íquebe chebe ra ridagulisaa xquidxi Dios.
2 Ñee racaláʼdxiluʼ chuʼluʼ lade iráʼ ca binni ni ziecaʼ Guendaridagulisaa de Chonna Gubidxa ni láʼ «Guzúʼbanu Stiidxaʼ Dios» ni chigaca iza riʼ la? Pa zacá ni, ca conseju zeeda raríʼ zanda iquiiñeluʼ cani.
3 Udixhe chaahuiʼ cani chigunuʼ dede yanna ti cheluʼ guionnaʼ gubidxa stini. «Ni riguixhe ique ca binni nanna guni dxiiñaʼ la? ribeenducaʼ ni galán.» (Pro. 21:5.) Cadi dxandíʼ rusihuinni ca diidxaʼ riʼ pabiáʼ nga risaca maʼ uzulú quixhe chaahuinu cani chigúninu dede yanna ti ganda chuunu guendaridagulisaa roʼ ca la? Ti cadi unítiluʼ gastiʼ de ni chiguizíʼdinu de Jiobá la? biiyaca xi iráʼ nga ni naquiiñeʼ guʼnuʼ ne bizuluca biʼniʼ cani dede yanna ti ganda cheluʼ guionnaʼ gubidxa ca. Pa caquiiñeʼ inabuʼ permisu patrón stiluʼ, biʼniʼ ni yánnaca. Pa cadi Testigu xheelaluʼ ne naquiiñeʼ iníʼneluʼ laabe la? cadi cuézaluʼ ora mayaca ganda dxi ca para guʼnuʼ ni. Cadi izaláʼdxiluʼ cani ruluíʼ zucueza lii, uniʼné ni Jiobá ne biʼniʼ cré de que ne ndaayaʼ stibe «cani quixhe íqueluʼ dxandíʼ zaca cani» (Pro. 16:3). Laaca naquiiñeʼ acaneluʼ ca binni cayuundaneluʼ Biblia para chuʼcaʼ listu ti ganda checaʼ guionnaʼ gubidxa stini.
4 Ra guiaanuʼ. Para ganda chuʼluʼ galán la? maʼ biyúbidu ra zanda guiaanuʼ ndaaniʼ ca guidxi ra chigaca ca guendaridagulisaa roʼ ca. Lu beeu junio zacá lu tableru ti lista stiʼ ca hotel ra zanda guiaanatu. Unabaʼ cuartu ndaaniʼ ca hotel ni cá si lu lista ca, ne udixe biaʼ cá si lu lista ca. Gúnitu zacá la? zacanetu Betel idxélaruʼ hotel galán ne baratu. Biiyaʼ, ca hotel jma galán ca zándaca cadi nuu diʼ cani gaxha de ra chigaca guendaridagulisaa roʼ ca. Ante inabuʼ ti cuartu, biindaʼ cani cá lu cuadru «Ximodo acanenu cani Ruyubi ra Guiaananu». Ante inabuʼ ti cuartu ndaaniʼ ti hotel, biʼniʼ casi modo na cuadru «Ximodo jma jneza inabuʼ cuartu ndaaniʼ ti hotel».
5 Cani naquiiñeʼ acanenu. Apóstol Pablu uniʼbe nabé ucané caadxi bíʼchibe laabe (Col. 4:7-11). Ca bíʼchibe que bidiicaʼ laabe ni caquiiñebe. Ximodo zanda acanenu xcaadxi para checaʼ guendaridagulisaa roʼ ca yaʼ. Ca bíchinu ne ca bizánanu ni rucheeche diidxaʼ ni maʼ huaniisi, cani huará, cani runi xhiiñaʼ Reinu idubi dxi, zándaca caquiiñeʼ chuʼ tu acané laacabe para chécabe lu carru o uyúbinu ra guiaanacabe. Ca binnilídxicabe nga jma naquiiñeʼ acanecaʼ laacabe (1 Tim. 5:4). Peru pa qué zanda gúnicabe ni la? racá nga maʼ zanda acanenu laacabe (Sant. 1:27). Ca binnigola ni rusiidiʼ ra nuu grupuhuiiniʼ ni ruundaʼ libru la? zaníʼnecabe cani rié ra nuu grupu stícabe ni caquiiñeʼ chuʼ tu acané laacaʼ, para gúʼyacabe aca iráʼ ni iquiiñeʼ ca binni ca dede ante ne aca cani jneza.
6 Cani zanda si icaa Solicitud de alojamiento para los que tienen necesidades especiales, nga nga cani rucheeche diidxaʼ ni qué zanda acané binnilidxi laacaʼ o qué zanda acané ca binni ridagulisaa ra riécabe ca laacabe para uyúbicaʼ ra guiaanacabe. Grupu ni Ruuyaʼ Dxiiñaʼ stiʼ ca Binni Ridagulisaa zuuyacabe pa ni rucheeche diidxaʼ ca runi iráʼ ni cá lu guiʼchiʼ ca ne ni na lu carta ni napa ca binnigola ni biree 14 stiʼ diciembre 2003. Guiʼchiʼ riʼ zacaa cani rucheeche diidxaʼ ni ne xiiñicaʼ pa nuucaʼ galán ne Jiobá.
7 Ora chuunu sti guendaridagulisaa roʼ. Para ganda chuʼ lugar ra cuitu, ra guiaanatu ne ganda udii icaatu libru o xcaadxi cosa ni zaquiiñenu racá la? rinábadu cani rucheeche diidxaʼ checaʼ guendaridagulisaa roʼ ra naquiiñeʼ checaʼ. Pa pur modo nuuluʼ naquiiñepeʼ cheluʼ ra chigaca sti guendaridagulisaa roʼ la? unabadiidxaʼ secretariu stiʼ ca binni ridagulisaaneluʼ pa neza chigaca ni, cá ni deche Solicitud de alojamiento para los que tienen necesidades especiales. Biseendaʼ guiʼchiʼ ca pur correu ra cayábini lii ne uluu ti sobre ndaaniʼ ni ra cá laluʼ, paneza liʼdxuʼ ne ti timbre. Pa chigácaruʼ xcaadxi guendaridagulisaa roʼ ndaaniʼ guidxi ca la? bicaa lu guiʼchiʼ ca padxí racaláʼdxiluʼ cheluʼ.
8 Caquiiñeʼ tu acané. Jesús bidii ti ejemplu galán ni chinándanu purtiʼ nabé ucuá íquebe acanebe binni (Luc. 9:12-17; Juan 135, 14-16). Cani runi dxiiñaʼ lu ca guendaridagulisaa roʼ ca laaca zacaca rúnicaʼ. Para ganda aca iráʼ ca dxiiñaʼ ni riquiiñeʼ racá la? Ca grupu ni ruuyaʼ dxiiñaʼ stiʼ guendaridagulisaa roʼ (comités de asamblea), maʼ qué zandaa diʼ zanábacabe tu acané laacabe. Jma nga caquiiñeʼ binnigola para icaa ca dxiiñaʼ ca. Pa acaneluʼ la? zaguíxheluʼ ti ejemplu para ca binni ridagulisaaneluʼ (1 Ped. 5:2, 3).
9 Ni ruuyaʼ binni. Ti gunaa ni runi tender binni rinabaʼ cuartu ndaaniʼ hotel ra rúnibe dxiiñaʼ uniʼbe sicaríʼ: «Jma nga riuláʼdxidu gápadu ca xpínnitu raríʼ, purtiʼ laacabe nga jma ruzuubacabe diidxaʼ que xcaadxi binni. Ca gunaa ni rusiá ndaaniʼ ca cuartu ca nabé riniʼcaʼ pabiáʼ galán modo laacabe ne saca nagaʼndaʼ ni rusaanacabe para laacaʼ, ¡iráʼ ni nuu raríʼ riulaʼdxiʼ guni dxiiñaʼ semana reedatu!» Sti binni ni runi dxiiñaʼ ndaaniʼ sti hotel uníʼ sicaríʼ: «Ca binni ni jma qué rudii dxiiñaʼ nga ca testigu stiʼ Jiobá». Zándaca riníʼcabe sicaríʼ purtiʼ ruzuubaluʼ diidxaʼ. Bixuíʼ lú si pabiáʼ nayecheʼ runi sentir Jiobá ora rusisácanu laabe pur modo laanu (1 Ped. 2:12).
10 Jiobá caquiiñeʼ «mozo ni nuu xpiaaniʼ ne ni runi jneza» para usiidibe xquídxibe de laabe lu ca guendaridagulisaa roʼ ni chigaca ra maʼ ziluxe iza riʼ (Luc. 12:42). Zándaca zudii dxiiñaʼ laanu para quixhe chaahuinu cani chigúninu ti ganda chuunu guionna gubidxa ca, peru zabeendunu stale ni galán. Guendaridagulisaa de Chonna Gubidxa «Guzúʼbanu Stiidxaʼ Dios» ni chigaca iza riʼ zacaneni laanu cadi liica uchaʼnu ni maʼ udixhe íquenu de gúninu ni na Jiobá ti cadi chuʼ dxi usaana de gúninu ni. Yanna la? quixhe íquenu chinándanu conseju stiʼ David: «Lade stale binni ridagulisaa lagusisaca Dios» (Sal. 68:26).
[Box on page 7]
Hora
Viernes ne sábadu
9.30 siadóʼ - 5.05 huadxí
Domingu
9.30 siadóʼ - 4.10 huadxí
[Box on page 8]
Ximodo acanenu cani Ruyubi ra Guiaananu
◼ Biaana ndaaniʼ ca hotel ni cá si lu lista stiʼ iza riʼ. Cadi cuídxiluʼ ndaaniʼ stiʼ hotel para inabadiidxuʼ pa jma baratu cuquíxecabe cuartu para cani cheʼ guendaridagulisaa roʼ ca. Nuu hotel huaníʼ baratu, neca cadi zeedacaʼ lu lista.
◼ Para guʼnuʼ cani maca nexheʼ aca ora icaguí xiixa yoo la? cadi guiaana diʼ jma de tapa binni ndaaniʼ ti cuartu, neca nahuiinicabe, peru pa cá gadxé lu lista ra caníʼ de «Binni huaniisi» la? la chinanda ni nani.
◼ Pa qué idxeʼluʼ cuartu ndaaniʼ iráʼ ca hotel ni cá lu lista ca o cadi cayuni tendércabe lii jneza ndaaniʼ tobi de laacani la? gudxi ni secretariu ni nuu ra ridagulisaaluʼ. Laabe zaníʼnebe cani ruyubi ra guiaana cani cheʼ guendaridagulisaa roʼ, ra chinándabe cani cá ra ruzulú lista ca. Ti cadi cuidxuʼ ndaaniʼ sti hotel ni cadi zeeda lu lista ca la? uleza gueeda sti lista ni jma nacubi.
◼ Unabaʼ ca cuartu si ni dxandíʼ zaquiiñeluʼ.
◼ Para gánnacabe dxandíʼ zaquiiñuʼ ni la? naquiiñeʼ useenduʼ bueltu para cada cuartu ni inabuʼ ndaaniʼ hotel ca. Pa qué guʼnuʼ zacá la? hotel ca zanda udiini sti binni.
◼ Cadi uchaaluʼ ni maca unabuʼ.
◼ Pa ca binni ridagulisaa ra rieluʼ ca zápacaʼ guendaridagulisaa de chupa gubidxa semana guiuundaʼ carta ra cá padxí aca guendaridagulisaa de chonna gubidxa stitu la? secretariu ca zanda cueebe copia stiʼ lista ra cá lá iráʼ ca hotel ra zanda guiaanatu ne udiibe tobi cada binnigola ni rusiidiʼ ra riuundaʼ libru, ne maʼ laaca uluíʼ cani ca binni rié ra nuucaʼ. Qué zaree diʼ copia stiʼ lista ca para icaa cani rucheeche diidxaʼ.
[Box on page 8]
Ximodo jma jneza inabuʼ cuartu ndaaniʼ ti hotel
1. Uníʼ pur teléfono hora dxiiñaʼ, ne biquiiñeʼ númeru ni cá lu lista stiʼ ca hotel ra zanda guiaanaluʼ.
2. Uníʼ cheluʼ guendaridagulisaa roʼ stiʼ ca testigu stiʼ Jiobá.
3. Uníʼ xi dxi nga chiguiaanuʼ ndaaniʼ hotel ca.
4. Pa gastiʼ cuartu nadachi la? uníʼ ndaaniʼ sti hotel ni zeeda lu lista ca.
5. Cadi quíxediluʼ pa inábacabe lii jma de ni cá lu lista ca.
6. Unabaʼ xcuártuluʼ, ne unabaʼ númeru ni rudiicabe para gannuʼ pa dxandíʼ uleecabe ni para lii.
7. Udixené tarjeta de créditu, cheque, o ne ti giro postal ne biseendaʼ ni ndaaniʼ chii gubidxa. Cadi useenduʼ bueltu. Pa quiʼxuʼ ne cheque o ne giro postal la? bicaa nezalú ni númeru ni udii hotel ca lii.