Ximodo racané Scuela stiʼ cani Rucheeche Diidxaʼ laanu
1 Xquidxi Jiobá napa ti guenda izáʼ sicarú purtiʼ laapebe rusiidibe laacaʼ (Isa. 54:13; Juan 6:45). Ne biaʼ stipa gúninu la? biaʼ ca nga zacané ni laanu. Ñee maʼ bidiiluʼ cuenta pabiáʼ racané Scuela stiʼ cani Rucheeche Diidxaʼ ca lii para iniisiluʼ jma lu Stiidxaʼ Dios la?
2 Caníʼcabe galán de laani. Stale binnigola ni rutiidiʼ scuela ca huayuuyacabe, de que ra gúʼndanu modo ininu jnézapeʼ ca huayacaneni ca binni ridagulisaa ucheechecaʼ diidxaʼ jma jneza. Sti binnigola laaca uníʼ, dede dxi ca binni ridagulisaa ca maʼ ricábicaʼ ora rinabadiidxacabe ra bibí ra biuundaʼ Biblia la? jma stale de laaca zinándacaʼ ra riuundaʼ Biblia iráʼ semana. Ne stale de cani ridiʼdiʼ lu iropa libana caniʼcaʼ jma galán modo raca ni, purtiʼ maʼ que ruyúbicabe xi iníʼcabe ora uzulúcabe ne ora ilúxecabe, ne zacá ricá íquecabe gúʼndacabe jma galán (1 Tim. 4:13).
3 Racaneni iranu. Icábinu lu ca endaridagulisaa ca zusiecheʼ ni laanu (Pro. 15:23). Cumu dede ante nápanu ca endarinabadiidxaʼ ni zaquiiñeʼ dxi guietenaláʼdxinu ni maʼ bizíʼdinu la? zanda acané cani laanu gánnanu xi icábinu ora maʼ guietenaláʼdxinu ni maʼ bizíʼdinu. Ne dede lu La Atalaya 1 stiʼ enero 2004 la? maʼ bizulú caree caadxi ni jma risaca stiʼ ca capítulo ra guiuundaʼ Biblia stiʼ ca semana ni chitiidiʼ lu Scuela stiʼ cani Rucheeche Diidxaʼ. Cani zeeda lu La Atalaya riʼ huayacané cani stale de laanu icábinu modo uguʼnu gana xcaadxi ora inabadiidxacabe lu cani bibí ra biuundaʼ Biblia.
4 Risaca nga guenda ni napa cani cá lá para udiicaʼ libana lu Scuela stiʼ cani Rucheeche Diidxaʼ ne uyúbicaʼ modo utiidicaʼ ni. Iranu racané ca diidxaʼ galán ni riníʼ binnigola ni rutiidiʼ scuela ca. Ne cani maʼ ridiʼdiʼ lu scuela la? laaca racané binnigola ni rutiidiʼ scuela ca laacabe ora maʼ stubi sícabe paraa naquiiñeʼ gúnicabe dxiiñaʼ. Ne stobi ni racané laacabe nga ca ejerciciu ni cá ra riluxe cada modo iníʼcabe jnézapeʼ stiʼ libru Benefíciese de la Escuela del Ministerio Teocrático.
5 Iráʼ biaje guietenaláʼdxiluʼ xiixa ni zaquiiñeʼ lii o xiixa ni zeeda lu Biblia, zándaca ora cayaca endaridagulisaa ca o despué de iluxe ni la? bicaa ni lu libru Benefíciese stiluʼ. Uníʼ ique ni maʼ biziidiluʼ ca ne biiyaʼ ximodo ni cusiidiʼ Jiobá laanu ca zacaneni lii iniisiluʼ jma lu Stiidxabe.