Gusíʼdinu ca xiiñinu gusisácacaʼ Jiobá
1. Ñee zanda gusisaca ca hombrehuiiniʼ ne ca dxaapahuiiniʼ ca Jiobá la?
1 Salmo 148:12, 13 cayábini cani nahuiiniʼ gusisácacaʼ Jiobá. Ndaaniʼ Biblia cá stale ejemplu stiʼ hombrehuiiniʼ ne dxaapahuiiniʼ ni bisisaca Dios. Casi, «Samuel dede nahuiiniʼ biʼniʼ xhiiñaʼ Jiobá» (1 Sam. 2:18). Ne laaca ti dxaapahuiiniʼ nga gudxi xheelaʼ Naamán nuu ti ni riguixhená stiʼ Jiobá ndaaniʼ guidxi Israel ni zanda gusianda lepra ni napa xheelaʼ (2 Rey. 5:1-3). Ora guyuu Jesús ndaaniʼ yuʼduʼ que ne biʼniʼ milagru la? laaca ca baʼduʼ ni nuu raqué nga bicaacaʼ ridxi: «¡Lausisaca xiiñi rey David!» (Mat. 21:15). Yanna, ximodo zanda gusiidiʼ binni xiiñiʼ ti ganda gusisácacaʼ Jiobá yaʼ.
2. Xiñee naquiiñeʼ gusihuinni cani napa xiiñiʼ ca galán nga guni binni xhiiñaʼ Jiobá.
2 Ne ejemplu. Dxiqué Jiobá gudxi ca israelita ni napa xiiñiʼ laapecaʼ nga naquiiñeʼ gannaxhiicaʼ Laabe primeru ne gápacaʼ ley stibe ndaaniʼ ladxidoʼcaʼ, ti ganda gusiidicaʼ xiiñicaʼ gúnicaʼ ni (Deu. 6:5-9). Pa cani napa xiiñiʼ guiniʼcaʼ galán nga chigucheeche binni diidxaʼ ne gúʼyacabe ni casi ti dxiiñaʼ ni naquiiñeʼ gaca guiráʼ semana la? xiiñicabe laaca ziuuláʼdxicaʼ chigucheechecaʼ diidxaʼ ne zusisácacaʼ ni.
3. Ximodo gucané ejemplu stiʼ bixhoze ne jñaa ti gunaa Testigu laa.
3 Ti gunaa Testigu nabé riecheʼ ora guieetenalaʼdxiʼ modo bisiniisicabe laa: «Dxi nahuiineʼ la? guiráʼ sábadu ne domingu rigucheeche binnilidxeʼ diidxaʼ. Bixhozeʼ ne jñaa riuuláʼdxicaʼ chigucheechecaʼ diidxaʼ. Zaqué dede nahuiinidu guyuuláʼdxidu chigucheechedu diidxaʼ». Dxi gúpabe gadxe iza gúcabe ti ni rucheeche diidxaʼ ni caʼruʼ chúʼnisa, yanna maʼ zinebe treinta y dos iza de nácabe precursora.
4. Ximodo zanda gacané binni xiiñiʼ para cadi gusaana de gucheeche diidxaʼ.
4 Cadi gusaana de gacanetu laacabe. Cani napa xiiñiʼ, lagudii lugar guni ca xiiñitu xiixa ora maʼ canagucheechetu diidxaʼ. Zanda guxhídxicabe timbre stiʼ ti yoo, gudiicabe ti tratadu o gúʼndacabe ti textu. Zacá ziuuláʼdxicabe chigucheechecabe stiidxaʼ Reinu ne qué zadxíbicabe neca nahuiinicabe. Ora maʼ ziguiniisicabe la? jma riquiiñeʼ gucheechecabe diidxaʼ. Nga runi, lagacané laacabe guiniisicabe jma lu Stiidxaʼ Dios ne quixhe íquecabe gúnicabe xiixa dxiiñaʼ ndaaniʼ xquidxi Jiobá.
5. Xi naquiiñeʼ guni cani nahuiiniʼ para gácacaʼ ti ni rucheeche diidxaʼ ni caʼruʼ chúʼnisa.
5 Ora gúʼyatu maʼ zanda gaca xiiñitu ti ni rucheeche diidxaʼ ni caʼruʼ chúʼnisa ne laacabe maʼ gunábacabe gácacabe ni la? laguiniʼné ca binnigola. Ora guzulú gucheechecabe diidxaʼ zudiicabe cuenta caquiiñepeʼ gusisácacabe Jiobá. Cadi guiaandaʼ laatu, cadi naquiiñeʼ diʼ gánnacabe biaʼ nanna ti binni huaniisi para gácacabe ti ni rucheeche diidxaʼ. Ñee maʼ nánnabe de cani jma risaca zeeda lu Biblia la? Nabánibe casi modo na ca Ley stiʼ Dios ni zeeda lu Biblia la? Racaláʼdxibe chigucheechebe diidxaʼ ne gácabe ti testigu stiʼ Jiobá la? Pa zacá ni, ca binnigola ca zuuyacaʼ maʼ zanda gácabe ti ni rucheeche diidxaʼ ni caʼruʼ chúʼnisa (biiyaʼ ni rizaané Xhiiñaʼ Reinu ni Rúninu stiʼ diciembre 2006, yaza 3 dede 6).
6. Xiñee nabé risácapeʼ nga gusiidiʼ binni xiiñiʼ.
6 Stale stipa nga runi cani napa xiiñiʼ para gusiidicaʼ xiiñicaʼ gusisácacaʼ Jiobá. Nabé riecheʼ bixhoze ne jñaa binni ora gúʼyacaʼ caniisi xiiñicaʼ lu Stiidxaʼ Dios. Peru jma riecheʼ Jiobá ora guʼyaʼ caníʼ cani nahuiiniʼ ca de ca cosa sicarú ni bizaʼbe.