Jiobá cusiidiʼ laanu gúninu xhiiñaʼ jneza

Capítulo 12

Gacanenu guiniisi xhiiñaʼ Reinu ndaaniʼ xquídxinu ne lu guidubi guidxilayú

JESÚS guníʼ zareeche diidxaʼ lu ca últimu dxi riʼ lu «idubi naca guidxilayú», ne ca testigu stiʼ Jiobá cayúnicaʼ ni guniʼbe riʼ (Hech. 1:8; Mat. 24:14). Huaquiiñenu tiempu ne stipa stinu para gusíʼdinu binni ni na Stiidxaʼ Dios. Cumu nánnanu rudii Jiobá guiráʼ ni riquiiñeʼ ca xpinni la? nga runi rúninu primeru ni na Reinu lu xquendanabáninu ne qué riúʼpenu xizaa pur ni guibaninenu (Mat. 6:25-34; 1 Cor. 3:5-9). Cahuinni caguu Jiobá ndaayaʼ dxiiñaʼ riʼ purtiʼ nabé caniisi ni.

CANI RIQUIIÑEʼ PARA GACA XHIIÑAʼ REINU LU GUIDUBI GUIDXILAYÚ

Nuu binni ora guʼyaʼ cani riquiiñeʼ ca testigu stiʼ Jiobá para gucheechecaʼ diidxaʼ ne modo riguiizicaʼ libru ne revista sticaʼ sin guinábacaʼ binni saca cani la? stale de laaca rinabadiidxacaʼ ximodo randa rúnicabe cani. Dxandíʼ, riquiiñeʼ stale bueltu nga para ganda guni ca máquina ni runi ca libru ne ca Biblia ca dxiiñaʼ. Laaca riquiiñeʼ stale bueltu para cuí ne gacachaahuiʼ ca yoo Betel ra nuu ca binni ni racané para guni ca máquina ca dxiiñaʼ. Racaca nga nuu cani ruuyaʼ ximodo cayaca dxiiñaʼ stiʼ Reinu o cani racané lu xcaadxi dxiiñaʼ para guiniisi xhiiñaʼ Reinu. Laaca naquiiñeʼ gánnanu rudiicabe ti ndaa bueltu cani rié sti guidxi roʼ casi ca misioneru, ca precursor especial ni rié ca lugar zitu o ra ridagulisaa huaxiéʼ binni, ne ca binnigola ni riganna ca binni ridagulisaa. Racá ridúʼyanu riquiiñeʼ stálepeʼ bueltu nga para ganda gaca xhiiñaʼ Reinu. Peru, paraa riree guiráʼ bueltu ca yaʼ.

Neca laanu, ca testigu stiʼ Jiobá, qué rinábanu saca ca libru ne revista ni riguíʼzinu la? stale binni rusisaca dxiiñaʼ ni rúninu ne riale de laacaʼ gudiicaʼ laanu bueltu biaʼ náʼ ladxidoʼcaʼ para dxiiñaʼ ni cayaca lu guidubi guidxilayú. Laapenu, ca testigu stiʼ Jiobá, ruséʼndanu bueltu ra nuu ca yoo Betel ni nuu ndaaniʼ xquidxi Dios ne rúninu ni de guidubi ladxidoʼno. Cumu nánnanu caquiiñeʼ gacanenu sicaríʼ la? nga runi rudiʼnu cani nápanu ne zacá rúninu casi biʼniʼ ca xpinni Dios de dxiqué purtiʼ laacaʼ bidiicaʼ ni nápacaʼ para gunda gurí ca yoo ra biʼniʼ adorarcaʼ Jiobá (Éxo. 35:20-29; 1 Cró. 29:9). Nuu tiru stale bueltu nga ni rusigaʼdeʼ binni purtiʼ rusaananecaʼ guiʼchiʼ yoo o guiʼchiʼ layú sticaʼ Betel, peru ca bueltu ruseendaʼ ca neza binni ridagulisaa la? jma huaxiéʼ cani. Guiráʼ xixé bueltu riʼ racané para cadi guiaanadxi dxiiñaʼ ca.

Nga runi, para laanu, ca testigu stiʼ Jiobá la? nabé risaca gucheechenu diidxaʼ peru cadi nga si nga ni risaca para laanu, sínuque laaca risaca iquiiñenu bueltu ne xcaadxi cosa ni nápanu para dxiiñaʼ ca. Dxiqué, Jesús ne ca discípulo stiʼ gúpacaʼ ti cajahuiiniʼ ra guluu chaahuicaʼ bueltu para gacanecaʼ binni pobre ne para xcaadxi cosa ni biquiiñecaʼ (Juan 12:6; 13:28, 29). Biblia laaca ruzeeteʼ de caadxi gunaa ni bidiicaʼ ni biquiiñeʼ Jesús ne ca discípulo stiʼ para bicheechecaʼ diidxaʼ (Mar. 15:40, 41; Luc. 8:3). Apóstol Pablu laaca gucuaa cani bisigaʼdeʼ ca xpinni Cristu laa ne bidiibe xquíxepeʼ laacaʼ purtiʼ nánnabe racaláʼdxicaʼ guiniisi xhiiñaʼ Reinu ne nuucaʼ gacanecaʼ laabe zaqué (Fili. 4:14-16; 1 Tes. 2:9). Ca testigu stiʼ Jiobá laaca rúninu zacaca ne rudiʼnu ni nápanu, nga runi guiráʼ ladu cayábinu binni ni nachaʼhuiʼ «gueda gué nisa ni rudii enda nabani sin quixe gastiʼ» (Apo. 22:17).

RA RIDAGULISAANU

Guiráʼ gastu ni raca ra ridagulisaanu la? riaxa cani ne ca bueltu ni rudii binni de guidubi ladxidóʼ. Qué rinabadícabe guna ne qué riguíxhecabe pabiáʼ gudii cada tobi ne qué rinábacabe bueltu, sínuque nuu caja ca lugar ra raca ca guendaridagulisaa ca ra zanda gusábanu bueltu biaʼ náʼ ladxidoʼno (2 Cor. 9:7).

Bueltu ni rudiicabe ca riquiiñeʼ ni para gacachaahuiʼ Yoo stiʼ Reinu ne para guiá ndaaniʼ cani. Grupu de binnigola ca zándaca guiníʼ íquecaʼ iquiiñeʼ ti ndaa bueltu ca para guseendacaʼ ni Betel ti gacanecaʼ guiniisi xhiiñaʼ Reinu lu guidubi guidxilayú. Ora gúnicabe nga la? ca binni ridagulisaa naquiiñeʼ guiníʼ pabiáʼ nga zanda guseendacaʼ. Stale neza binni ridagulisaa rúnicaʼ zacá ne ruseendacaʼ bueltu gatigá para dxiiñaʼ raca lu guidubi guidxilayú. Nuu tiru zándaca chuʼ xiixa ra iquiiñecabe bueltu, peru pa guiráʼ cani rucheeche diidxaʼ nánnacaʼ riuu gastu la? cadi guiráʼ diʼ ora zieete uguucabe bueltu ndaaniʼ ca caja ca.

XI RÚNICABE NE BUELTU NI RIABA NDAANIʼ CA CAJA CA

Grupu de binnigola ni nuu ndaaniʼ ca neza binni ridagulisaa ca ribícabe chupa binnigola o siervu ministerial para gutopa bueltu ni riaba ndaaniʼ ca caja ca cada guiluxe guendaridagulisaa ne rucaacabe lu ti recibu pagala nga bidopa (2 Cor. 8:20). Grupu de binnigola ca ruuyaʼ guiaapaʼ chaahuiʼ bueltu ca ne guiree ni dede ora maʼ guseendacabe ni Betel o iquiiñeʼ ni ra ridagulisaacabe. Zándaca uguucabe ni bancu ne ucaacabe ni lá neza binni ridagulisaa ca. Hombre ni rugabaʼ bueltu stiʼ ca binni ridagulisaa riʼ ruzeetebe nezalú guiráʼ ca binni riʼ guiráʼ beeu pagala nga nápacabe. Ne cada chonna beeu la? binnigola ni rapa stiʼ ca binni ridagulisaa ruuyabe pa nexheʼ chaahuiʼ ca guiʼchiʼ stiʼ bueltu ni napa ca binni ridagulisaa. Xhiiñaʼ Reinu ni Rúninu rusietenalaʼdxiʼ laacabe pora naquiiñeʼ gúnicabe ni.

CA GUENDARIDAGULISAA DE TI DXI NE DE CHUPA GUBIDXA

Guiráʼ ca gastu ni raca lu ca guendaridagulisaa de ti dxi ne de chupa gubidxa la? riáxacani ne bueltu ni rudii ca Testigu stiʼ guiráʼ ca neza binni ridagulisaa ni rié racá. Ca lugar ra raca ca guendaridagulisaa roʼ laaca ruzuhuaa caja para gusaba binni bueltu, cásica raca ndaaniʼ ca Yoo stiʼ Reinu. Sicaríʼ la? ca xpinni Cristu zanda gusábacaʼ biaʼ náʼ ladxidoʼcaʼ ti gacanecaʼ para ca gastu ni rúnicaʼ. Binnigola ni riganna ca binni ridagulisaa ca zuyubi ti hombre para chiné cuenta stiʼ guiráʼ ca neza binni ridagulisaa rié lugar ca ne hombre riʼ zaguixe guiráʼ ni iquiiñeʼ lugar ca, ne binnigola ni riganna ca binni ridagulisaa ca nga guiníʼ pa zaa guidxela cani.

Ca bueltu ni guiree ndaaniʼ ca caja ni chuʼ ra guendaridagulisaa roʼ ca zaquiiñecabe cani para quíxecabe guiráʼ ni iquiiñecabe racá ne ni guiaana zaguucabe ni lu cuenta ni nápacabe stiʼ guiráʼ neza binni ridagulisaa lugar ca. Pa ora guiluxe ti guendaridagulisaa guiree guzaabicabe la? naquiiñeʼ guicaacabe bueltu ni nápacabe stiʼ guiráʼ neza binni ridagulisaa ca ti quíxecabe ni, cadi naquiiñeʼ gucaacabe ti carta ra nuu guiráʼ binni ridagulisaa para guzeetecabe de laani. Yanna pa qué gápacabe bueltu para quíxecabe guiráʼ ni biquiiñeʼ lu últimu guendaridagulisaa ni gúpacabe o para quíxecabe ni iquiiñeʼ para guzulú ti guendaridagulisaa ni chigápacabe, casi gudiicabe ti ndaa bueltu para iquiiñecabe lugar ca la? binnigola ni riganna ca binni ridagulisaa ca zanda guiniʼbe gacané ca binni ridagulisaa ca para guiaxa ni. Cada grupu de binnigola zaníʼ de laani ne zuuyaʼ pagala zanda gudii ca binni ridagulisaa ra riecaʼ. Despué zuzeetecabe ni nezalú ca binni ridagulisaa ne laacaʼ zaniʼcaʼ pa zanda gudiicaʼ biaʼ maʼ guníʼ stiidxaʼ ca binnigola ca.

Ante gaca xiixa guendaridagulisaa roʼ la? ca binnigola ca ridagulisaacaʼ para gúʼyacaʼ xi gúnicaʼ ne ca bueltu nápacaʼ. Naquiiñeʼ guiníʼ íquecabe xi guiráʼ nga zaquiiñeʼ racá, casi sícabe ni iquiiñeʼ ca binni ridagulisaa ne ca binnigola ni riganna ca binni ridagulisaa. Galán guiníʼ íquecabe pa zanda gudiicabe bueltu para dxiiñaʼ ni cayaca lu guidubi guidxilayú, para Yoo stiʼ Reinu, o para xiixa Yoo ra raca ca Guendaridagulisaa roʼ ni cayaca gaxha de racá o para sti cosa ni caquiiñeʼ.

Guiráʼ ni chisícabe naquiiñeʼ gucaacabe ni lu ti guiʼchiʼ ne ganna ca binnigola ca chiguidxela cani, peru ca cosa ni maca rizíʼcabe cadi naquiiñepeʼ guicá cani lu ti guiʼchiʼ. Ne naquiiñeʼ gucaacabe lu ti guiʼchiʼ pabiaʼpeʼ nga bueltu zaquiiñeʼ, ne cada cueecabe bueltu para guidxela xiixa la? ca binnigola ca nga guiniʼcaʼ pa zaa cueecabe ni. Pa ca binnigola ca qué gánnacaʼ pagala nga chiguiquiiñeʼ la? cadi jneza diʼ nga gudiicabe bueltu ca ne laaca cadi jneza diʼ nga gucaacabe lu guiʼchiʼ ca maʼ qué zadxaa diʼ biaʼ bicaacabe iquiiñeʼ. Bueltu stiʼ guiráʼ neza binni ridagulisaa ca zanda chuʼ chaahuiʼ ni Betel pa cadi caquiiñecabe ni.a

Guiluxe si cada guendaridagulisaa de ti dxi ne de chupa gubidxa la? binnigola ni riganna ca binni ridagulisaa ca zuuyabe pa nexheʼ chaahuiʼ ca guiʼchiʼ stiʼ bueltu ni nápacabe.

GACANENU CANI CAQUIIÑEʼ NI

Tobi de ca razón ni gupa Jesús ne ca discípulo stiʼ para uguu chaahuicaʼ bueltu ndaaniʼ ti caja nga para gacanecaʼ binni pobre (Mar. 14:3-5; Juan 13:29). Jesús guníʼ: «Ca pobre la? qué ziuu dxi guiaadxa ca lade tu», nga runi ca xpinni Cristu ni nuu ca dxi stinu riʼ laaca naquiiñeʼ gacanenu laacabe (Mar. 14:7). Ximodo rúninu ni na Jesús ca dxi stinu riʼ yaʼ.

Nuu tiru, stale de ca xpinni Cristu ni maʼ napa stale iza de cadagulisaanecaʼ laanu caquiiñecaʼ gacanenu laacaʼ purtiʼ maʼ nagólacaʼ, huaracaʼ o cadíʼdicaʼ xiixa guendanagana. Ca bíʼchinu ne bizáʼnanu ni ridagulisaanenu zándaca gánnacabe xi cayácanu, ne zándaca cada tobi de laacabe chinándacabe ni na ca diidxaʼ bicaa apóstol Juan: «Pa nuu tuuxa napa ni caquiiñe ne guʼya qué gapa stobi gastiʼ, ne qué guiá laabe la? ximodo na nadxii Dios [yaʼ]. Xiiñe huiine caʼ, cadi gabi si nu nadxii nu binni sínuque ganaxhii nu laaca de idubi ladxidóʼ no ne usihuinni nu ni ra acané nu laacaʼ» (1 Juan 3:17, 18; 2 Tes. 3:6-12). Para gusihuínninu dxandíʼ zinándanu Cristu la? naquiiñeʼ gacanenu ca bíʼchinu ne ca bizáʼnanu ni cayuni ni na Dios, ne nuu tiru zándaca gudiʼnu bueltu laacabe (Sant. 1:27; 2:14-17).

Lu primé carta ni bicaa apóstol Pablu ra nuu Timoteu que bisiénebe ximodo gacanenu cani caquiiñeʼ gacanécabe laacaʼ. Zanda guidúʼndanu conseju bidiibe ni cá lu 1 Timoteo 5:3-21. Guiráʼ hombre ni zinanda Cristu naquiiñeʼ gudii guiráʼ ni caquiiñeʼ binnilidxi, nga runi cani maʼ nagola ne huará la? naquiiñeʼ guʼyaʼ xiiñicaʼ laacaʼ, xhiágacaʼ o sti binnilídxicaʼ. Nuu biaje gobiernu rudii ti ndaa ni caquiiñecabe o nuu grupu de binni ni racané laacabe. Pa zacá ni la? naquiiñeʼ guyubi ca binnilídxicabe o sti binni ni cayacané laacabe modo guicaacabe ni cudii gobiernu, ne zacá zusihuínnicaʼ nacháʼhuicaʼ. Peru ca binni ridagulisaa ca laaca zanda guidagulisaa para guiniʼcaʼ ximodo zanda gacanecaʼ ca xpinni Cristu ni maʼ xadxí cayuni ni na Dios ne caquiiñeʼ gacanécabe laa. Pa qué gápabe binnilídxibe ni gacané laabe ne nin gobiernu o sti grupu de binni qué náʼ gacané laabe la? grupu de binnigola ca zanda guiníʼ xi gaca para gacanécabe binni ca. Ca xpinni Cristu ni runi ni na Dios nabé riuuláʼdxicaʼ gudiicaʼ ni nápacaʼ ca bíʼchicaʼ ne bizáʼnacaʼ ni caquiiñeʼ ni.

Stale de ca xpinni Cristu zándaca caquiiñecaʼ chuʼ tu gacané laacaʼ purtiʼ nuu tu canazánanda laacaʼ, cadíndecabe xquídxicaʼ, guca xu roʼ ra nuucaʼ, nuu guendarindaana o xcaadxi cosa ni cayaca lu ca últimu dxi nabáninu riʼ (Mat. 24:7-9). Ora ca neza binni ridagulisaa riʼ cadiʼdiʼ lu ca guendanagana riʼ la? qué zanda diʼ gacanésaacaʼ, nga runi Grupu ni Zaniruʼ ca ruuyaʼ xi zanda guni xcaadxi xpinni Cristu para ganda gacané cani cayacaná. Zacagá nga guca ora guyuu ti guendarindaana Judea, ca xpinni Cristu de Asia Menor biseendacaʼ guendaró ra nuu ca bíʼchicaʼ ne ca bizáʼnacaʼ de raqué (1 Cor. 16:1-4; 2 Cor. 9:1-5). Pa gúninu casi modo bíʼnicabe ca la? zusihuínninu nadxiinu ca xpinni Cristu ne zusihuínninu dxandíʼ nácanu xpinni Jesucristu (Juan 13:35).

MODO RUSAANANU LIBRU NE REVISTA RA NUU BINNI

Para guireeche stiidxaʼ Reinu naquiiñeʼ gusaananenu binni revista ne Biblia ni nápanu. Nga runi, grupu de binnigola ca ribícabe ti siervu ministerial para guʼyaʼ cadi guiaadxaʼ libru, folletu ne xcaadxi ni caquiiñecabe, ne ribícabe stobi para quiʼzíʼ revista. Ne zanda guicaa cani rucheeche diidxaʼ guiráʼ ca guiʼchiʼ riʼ, ne maʼ laacaʼ rusaanané cani ca binni ni riuulaʼdxiʼ guʼndaʼ cani.

Ca hombre ni ribícabe riʼ nabé rusisácacaʼ dxiiñaʼ ni gucuaacaʼ. Rinécabe ti lista ra cá xi guiráʼ nápacabe ne nánnacabe gunáʼ nga libru ni zanda guinábacabe ne cani zanda gusaananenu binni ora maʼ zigucheechenu diidxaʼ. Zacá rúnicabe ti ganda gapa ca binni ridagulisaa gadxé gadxé libru ne revista ne gápacaʼ biaʼ caquiiñecaʼ. Cumu maʼ huayúʼyanu pabiáʼ riquiiñeʼ ca guiʼchiʼ ni nápanu ca para gucheechenu diidxaʼ la? nga runi xquidxi Dios cayabi laanu naquiiñeʼ gusaananenu cani binni ora maʼ zigucheechenu diidxaʼ. Lu Xhiiñaʼ Reinu ni Rúninu rieeteʼ gunáʼ nga ni zanda gusaananenu binni guiráʼ beeu, nga racané laanu gucheechenu diidxaʼ ti modo si ne ganda guinínenu guiráʼ xixé binni neza ra rucheechenu diidxaʼ.

Cumu nácanu xpinni Cristu ni maʼ bidiʼnu laanu Dios la? nánnanu Jiobá nga cudii laanu guiráʼ ni nápanu para gúninu xhiiñaʼ, casi tiempu stinu, xquendabiaaninu, stipa stinu ne guiráʼ ca cosa risaca ni nápanu dede xquendanabáninu (Luc. 17:10; 1 Cor. 4:7). Ora riquiiñenu cani nápanu ca jneza la? rusihuínninu nadxiinu Jiobá ne nápanu stale respetu laabe. Racaláʼdxinu gusisácanu laabe ne ca cosa ni risaca ni nápanu, ne nánnanu riéchebe neca intiica gudiʼnu laabe para gusihuínninu dxandíʼ riuuláʼdxinu gúninu ni nabe de guidubi ladxidoʼno (Pro. 3:9; Mar. 14:3-9; Luc. 21:1-4; Col. 3:23, 24). Pa guidúʼyanu ca cosa risaca ni nápanu ca casi modo na Biblia ne gácanu binni ni riuulaʼdxiʼ gudii ni napa la? zanda gúninu casi guníʼ Jesús riʼ: «Qué niguixe tu saca gudixhe irá ndi lu ná tu guni tu. Yanna laguni cani sin guiaxa tu». Ne pa gúninu ni zacá la? zabáninu jma nayecheʼ (Mat. 10:8b; Hech. 20:35).

[Notas]