Zaguu ndaayaʼ Jiobá laanu pa gacanenu de guidubi ladxidoʼno
1. Ximodo bisihuinni David ne Nehemías rápacaʼ gana gacanecaʼ de guidubi ladxidoʼcaʼ.
1 Dxi bicaalú Goliat ca soldadu stiʼ Israel que la? ñándaca nucaalú tutiica soldadu laabe, peru guirutiʼ ñuni ni. Laga ti hombrehuiiniʼ ni cadi naca soldadu biale de ndaaniʼ ladxidóʼ gucaalú laabe (1 Sam. 17:32). Dxi bibiguetaʼ ca judíu que Jerusalén la? qué nucuicaʼ lindaa stini, ngue runi ti hombre ni biʼniʼ dxiiñaʼ ndaaniʼ palaciu stiʼ rey de guidxi Persia biale de ndaaniʼ ladxidóʼ cheʼ Jerusalén para guʼyaʼ ximodo gaca dxiiñaʼ que (Neh. 2:5). Jiobá guluu ndaayaʼ David ne Nehemías, purtiʼ biale de ndaaniʼ ladxidoʼcaʼ gúnicaʼ ni nabe (1 Sam. 17:45, 50; Neh. 6:15, 16).
2. Xiñee naquiiñeʼ guyúbinu modo gacanenu de guidubi ladxidoʼno.
2 Lu ca últimu dxi riʼ, stale binni qué riale diʼ de laa gacané purtiʼ nabé nuu xhiiñacaʼ ne ruyúbicaʼ puru para laasicaʼ (2 Tim. 3:1, 2). Cumu jma ricá ique binni guni xhiiñaʼ ne xcaadxi cosa ni racalaʼdxiʼ la? qué liica ránnacaʼ pora nga caquiiñeʼ gacanecaʼ binni. Peru laanu qué rúninu zacá, sínuque rúninu stipa pur guyúbinu modo gacanenu casi biʼniʼ Cristu, purtiʼ dxi guyuube lu Guidxilayú riʼ gucanebe binni de guidubi ladxidoʼbe (Juan 5:5-9; 13:12-15; 1 Ped. 2:21). Yanna, ximodo zanda gacanenu, ne xi ndaayaʼ zacaanu yaʼ.
3. Ora gacanenu, ximodo racaneni ca binni ni nuu ra ridagulisaanu.
3 Gacanenu ca bíʼchinu ne ca bizáʼnanu. Racanenu xcaadxi xpinni Cristu guiene chaahuicaʼ Stiidxaʼ Dios ora guicábinu lu ca libana ni ridiʼdiʼ lu ca guendaridagulisaa ni rápanu (Rom. 1:11). Ora ricábinu la? rusisácanu Jiobá, riaana ndaaniʼ íquenu ne ndaaniʼ ladxidoʼno guiráʼ ni rizíʼdinu ne jma riuuláʼdxinu chuʼnu lu ca guendaridagulisaa ca (Sal. 26:12). Zacanenu pa gudiʼnu ti libana ora tuuxa guiaadxaʼ lu Scuela stiʼ cani Rucheeche Diidxaʼ ne ora gúninu nga la? zazíʼdinu modo gusíʼdinu jma jneza.
4. Ximódoruʼ zanda gusihuínninu racaláʼdxinu gacanenu.
4 Ca hombre ca zusihuínnicaʼ riuuláʼdxicaʼ gacanecaʼ ora gúnicaʼ stipa pur ugaandacaʼ xiixa dxiiñaʼ ndaaniʼ xquidxi Dios (Isa. 32:2; 1 Tim. 3:1). Pa guyúbinu modo gacanenu lu intiica dxiiñaʼ gaca lu ca guendaridagulisaa roʼ ni rápanu la? ca guendaridagulisaa ca zácacani jneza. «Zacané saa nu» laanu ora de guidubi ladxidoʼno gucheechenenu binnigola ni riganna ca binni ridagulisaa diidxaʼ o guni invitarnu laabe ti guendaró (Rom. 1:12). Riguu ndaayaʼ Jiobá laanu ne riuʼnuʼ nayecheʼ ora ruyúbinu modo gacanenu cani qué gapa bixhoze ne jñaa, cani maʼ guti xheelaʼ, cani huará, cani napa baʼduhuiiniʼ ne xcaadxi binni ni caquiiñeʼ gacanenu laacaʼ (Pro. 19:17; Hech. 20:35).
5. Cumu cayuu stale binni ndaaniʼ xquidxi Dios, xi naquiiñeʼ gaca.
5 Laaca zanda iquiiñenu tiempu ne stipa stinu para gacanenu guiá Yoo stiʼ Reinu o para gaca chaahuini. Cumu yanna riʼ cayuu stale binni ndaaniʼ xquidxi Dios la? nga runi caquiiñeʼ gaca xcaadxi Yoo stiʼ Reinu, ne laaca caquiiñeʼ chuʼ tu gacané para cuícani. Ti guendaxheelaʼ yegacané lu dxiiñaʼ ni runi Grupu de Binnigola ni Ruuyaʼ Cuí Yoo stiʼ Reinu neca qué gánnacaʼ gúnicaʼ dxiiñaʼ ni cayaca raqué. Peru guyuu tu bisiidiʼ laacabe ne yanna maʼ randa racanécabe guicá ladriu. Gunaa que guníʼ: «Ra bineniáʼ ca bizanaʼ ne ca bendaʼ dxiiñaʼ la? gupaʼ jma xhamigaʼ ne xhamiguaʼ. Neca ora guilúxedu ti dxi dxiiñaʼ maʼ bidxágadu, peru guizáʼ sicarú runi sentirdu purtiʼ cayúnidu xhiiñaʼ Jiobá».
6. Xi rúninu para gusihuínninu nabé risaca gucheechenu diidxaʼ.
6 Ora gucheechenu diidxaʼ. Dxiiñaʼ ni jma naquiiñeʼ gaca yanna nga gucheechenu stiidxaʼ Reinu stiʼ Dios. Ora gusiénenu tuuxa ni cá lu Biblia ne gacanenu laa gúnicani la? binni ca zanna xi guni lu xquendanabani ne zudiini stipa laabe para gucaanabe intiica viciu gápabe. Laaca riziidibe xi chiguni Dios xcaadxi huiiniʼ si. Ora rusíʼdinu binni ni cá lu Biblia la? riuʼnuʼ nayecheʼ ne racanenu laabe gápabe ti guendanabani ni qué zaluxe (Juan 17:3; 1 Tim. 4:16). Zándaca gudiʼnu cuenta nápanu tiempu para gucheechenu diidxaʼ jma ne gácanu precursor auxiliar o regular, chuunu ra huaxiéʼ tu rucheeche diidxaʼ o guizíʼdinu sti diidxaʼ.
7. Xiñee naquiiñeʼ guiale de ndaaniʼ ladxidoʼno gacanenu.
7 Rey David guníʼ ora guidxiña dxi guni mandar Mesías la? guiráʼ ni cayuni ni na Dios zúnicani ne stale guendanayecheʼ (Sal. 110:3, laguuyaʼ ni cá ñee yaza). Cumu jma maʼ cutale Jiobá binni ndaaniʼ xquidxi ca últimu dxi riʼ la? cayuu jma dxiiñaʼ ni caquiiñeʼ gaca ne laanu riquiiñeʼ guiale ndaaniʼ ladxidoʼno gacanenu (Isa. 60:22). Ñee riniʼluʼ: «¡Raríʼ nuaaʼ! Biseendaʼ naa» la? (Isa. 6:8.) Ora riale de ndaaniʼ ladxidoʼno gacanenu la? rusiéchenu Jiobá ne ricaanu stale ndaayaʼ.