Jiobá cusiidiʼ laanu gúninu xhiiñaʼ jneza
Capítulo 13
«Laguni irá [cosa] para usisaca tu Dios»
GUIRÁʼ ca binni ni maʼ bidii laa Jiobá la? zinecaʼ labe, nga runi nápacaʼ xidé gusihuínnicaʼ rusisácacaʼ laabe lu guiráʼ ni rúnicaʼ ne ni riniʼcaʼ. Apóstol Pablu bidii conseju riʼ ne naquiiñeʼ chinándanu ni, nabe: «Ndi nga laani: pa go to o pa gue tu, o intiisi guni tu, laguni irá [cosa] para usisaca tu Dios» (1 Cor. 10:31). Para gúninu ni la? naquiiñeʼ chinándanu ni na ca ley ni naguixhe Jiobá, purtiʼ laacani nga rusihuínnicani qué rucheedibe (Col. 3:10). Cumu nácanu ti guidxi nayá ni gulí Dios para guni ni na la? naquiiñeʼ gácanu casi laabe (Efe. 5:1, 2).
Apóstol Pedru biluiʼbe ca xpinni Cristu pabiáʼ risaca nga gúnicaʼ zacá, ngue runi gúdxibe laacaʼ sicaríʼ: «Lagaca casi baʼdu ni ruzuuba diidxaʼ, ne ma cadi guni tu ni na ique tu casi biʼni tu dxi caʼru gunibiáʼ tu Dios. Lagaca nachaʼhui de irá ni guni tu casi nachaʼhui Dios ni uníʼ né laatu para gaca tu xpinni. Casi cá lú Xquiʼchi Dios ra na: “Lagaca nachaʼhuiʼ, purti zacá naa”» (1 Ped. 1:14-16). Cásica guidxi Israel de dxiqué la? ca xpinni Cristu ni nuu yanna laaca cayabi Stiidxaʼ Dios laacaʼ gácacaʼ nachaʼhuiʼ o chuʼcaʼ nayá nezalú Dios, ne cadi gúnicaʼ guiráʼ cosa qué iquiiñeʼ ni runi binni ni qué runibiáʼ Dios. Ora gúnicabe sicaríʼ la? Jiobá ribí laacabe para gúnicabe xhiiñaʼ (Éxo. 20:5).
Para chuʼnu nayá de ca cosa ni runi biidiʼ binni nezalú Dios la? naquiiñeʼ gúninu ni na ca ley ne conseju stiʼ Jiobá, ne Stiidxabe nga cusiene chaahuiʼ laanu xi laacani (2 Tim. 3:16). Ora bidúʼndanu ca ley ca binibiaʼnu Jiobá ne gúnnanu ximodo nga ca neza stibe, ne pur nga bidxíñanu ra nuube. Para gunda guyuʼnu ndaaniʼ xquidxi Jiobá la? cadi gunísinu zúninu chupa chonna si de cani rusiidiʼ Stiidxaʼ Dios ne mácaca guyuunísanu. Coʼ, sínuque biindaʼ chaahuinu Biblia, zacá bidúʼyanu naquiiñeʼ guyúbinu primeru Reinu stiʼ Dios ne gúninu primeru ni na Jiobá lu xquendanabáninu (Mat. 6:33; Rom. 12:2). Dxandipeʼ nga bichaʼnu modo nabáninu para gúninu ni na Dios (Efe. 4:22-24).
CHUʼNU NAYÁ NEZALÚ DIOS NE GÚNINU NI JNEZA
Nuu tiru raca nagana para laanu gúninu ni na Jiobá ne chinándanu ni na ca ley stibe. Ni runi ni nagana nga Binidxabaʼ, xhenemígunu, purtiʼ laa racalaʼdxiʼ guxheleʼ laanu de Jiobá. Stobi ni laaca rúnini nagana nga guiráʼ ni raca ndaaniʼ guidxilayú qué iquiiñeʼ riʼ ne purtiʼ laaca binni gulené donda laanu. Pur guiráʼ ndiʼ naquiiñeʼ guzuhuaʼnu dxiichiʼ ti cadi guiábanu. Stiidxaʼ Dios cayabi laanu cadi guidxagayaanu ora gucaalúcabe laanu o tiidinu xiixa guendanagana, purtiʼ zacananu pur gúninu ni jneza (2 Tim. 3:12). Ora tiidinu xiixa guendanagana la? zanda chuʼnu nayecheʼ, purtiʼ cusihuínninu cayúninu ni na Dios (1 Ped. 3:14-16; 4:14-16).
Neca qué ñalené diʼ Jesús donda la? biziidiʼ guzuubaʼ diidxaʼ pur guiráʼ guendananá ni gudiʼdiʼ. Qué ñuu dxi ñúnibe guiráʼ ni biquiinde Binidxabaʼ laabe gúnibe ne qué ñuuláʼdxibe ñácabe tuuxa binni risaca ndaaniʼ guidxilayú riʼ (Mat. 4:1-11; Juan 6:15). Qué ñuu dxi nidiʼdiʼ ndaaniʼ íquebe maʼ qué zanda guni huantarbe. Nécapeʼ gucananalaʼdxiʼ binni laabe purtiʼ qué nucheebe la? qué nusaana de ñúnibe ni na ca ley stiʼ Jiobá. Ante gati Jesús, gudxi ca discípulo stiʼ ziuu tu zacananalaʼdxiʼ laacaʼ, cásica gucananaláʼdxicabe laabe purtiʼ qué ninándabe binni guidxilayú. Dede dxiqué nga cadxaagalú ca discípulo stiʼ Jesús stale guendanagana, peru ni rudii stipa laacabe nga gánnacabe biʼniʼ ganar Xiiñiʼ Dios binni guidxilayú (Juan 15:19; 16:33; 17:16).
Yanna laanu, pa racaláʼdxinu guni ganarnu guidxilayú riʼ la? naquiiñeʼ guni respetarnu ca ley ni naguixhe Jiobá, cásica biʼniʼ Cristu, Señor stinu. Ne para gúninu ni bíʼnibe la? cadi naquiiñeʼ si guixélenu de política stiʼ guidxilayú riʼ, sínuque laaca naquiiñeʼ gucáʼnanu ca cosa feu ni raca ndaaniʼ ni, para nga la? naquiiñeʼ chinándanu conseju ni cá lu Santiago 1:21 riʼ: «Lacuee irá ni nadxaba de ndaani ladxidóʼ to, ne lausaana irá ni cadi jneza. Laucaalaʼdxi chi nanda tu stiidxa Dios ni ma ucuá xcu ndaani ladxidóʼ to, purti nga nga ni zanda ulá laatu». Para ganda guicaa xcu stiidxaʼ Dios ndaaniʼ ladxidoʼno ne lu xquendabiaaninu la? caquiiñeʼ guidúʼndanu Stiidxabe guiráʼ ora ne cadi gusaana de chuunu ca guendaridagulisaa ca, zacá zaguidxi fe stinu, ne zuzúʼbanu stiidxaʼ Jiobá neca tiidinu lu intiica guendanagana ne ora uquiinde laanu gúninu xiixa ni cadi jneza. Cumu guiráʼ ladu chuunu zucaa guidxilayú riʼ laanu gúninu cosa malu la? nga runi qué liica riquiiñeʼ chuuláʼdxinu cani culuiʼni laanu. Xiñee coʼ yaʼ. Para guicábinu nga la? galán guidúʼyanu ximodo caguixhená discípulo Santiagu laanu, nabe: «Ñee qué ganna tu qué zanda ganaxhii nu Dios ne ganaxhii ca nu guidxilayú la? Pa chuʼ né nu binni guidxilayú tobi si la? cucáʼ lú nu Dios» (Sant. 4:4). Ñee rieʼnuʼ pabiáʼ naquiiñeʼ chinándanu ni na ca ley ni naguixhe Jiobá lu Biblia ne pabiáʼ naquiiñeʼ guixélenu de guidxilayú riʼ la?
Stiidxaʼ Dios caguixhená laanu ti cadi guiábanu lu ca cosa ni runi biidiʼ xquendanabáninu ne ca cosa ni cadi jneza. Cayábini laanu «cadi lica guiete enda rapa jnadxii lade [n]u, nin guni [n]u gasti ru ni nadxabaʼ, nin uyubi [n]u gapa [n]u xiixa para laasi [n]u», purtiʼ maʼ xpinni Dios laanu. Nga runi cadi gudiʼnu lugar guiníʼ íquenu cosa dxabaʼ, ne cosa ni cadi jneza, nin guininu de laacani purtiʼ si riuuláʼ dxinu. Ne cadi naquiiñeʼ gucaadiáganu xiixa canción o guidúʼyanu xiixa película ni cadi jneza (Efe. 5:3-5). Zacá nga zusihuínninu racaláʼdxinu chinándanu ca ley stiʼ Jiobá ne rápanu gana guibáninu nayá casi modo riuuláʼdxibe.
GÁCANU NAYÁ
Laanu, ca xpinni Cristu, nánnanu pabiáʼ nga risaca gácanu nayá, cadi nezalú si Dios, ne cadi para si gusihuínninu nabáninu jneza casi na ca ley stibe, sínuque dede ndaaniʼ lídxinu ne ládinu naquiiñeʼ chuʼ nayá. Cumu Dios nayá la? ngue runi gunábabe guidxi Israel gusiacaʼ ra nuucaʼ ti chuʼcaʼ nayá (Deu. 23:14). Ca israelita que gupa xidé bichaacaʼ modo nabánicaʼ para gunda yenándacaʼ modo gudixhe Jiobá gusiacaʼ laacaʼ. Modo nabáninu laaca naquiiñeʼ gusihuínnini nácanu binni nayá, ti cadi guʼyaʼ Jiobá xiixa cosa feu luguianu.
Ora ruzeeteʼ Biblia naquiiñeʼ chuʼnu nayá ne guixélenu de ca cosa ni nabiidiʼ la? laaca cuzeeteni gaca ladi binni nayá. Casi ora bicaa apóstol Pablu ca diidxaʼ riʼ: «Hermanu ni nadxiee caʼ [...] usiá nu laanu de irá ni runi dxaba xcuerpu nu ne espíritu stinu, ti sa nu modo pe naquiiñe sa ca xpinni be, cani ridxibi laabe» (2 Cor. 7:1). Nga runi, ca xpinni Cristu rusiacaʼ ládicaʼ, rázecaʼ ne riguiibicaʼ xhábacaʼ gatigá. Nécapeʼ gadxé gadxé nga modo nabani binni ndaaniʼ ca guidxi roʼ ca la? ca xpinni Cristu ruyúbicaʼ gápacaʼ stale nisa ne xabú ti ganda chuʼcaʼ nayá, laacaʼ ne ca xiiñicaʼ.
Cumu nabé runibiáʼ binni laanu pur rucheechenu diidxaʼ la? nga runi naquiiñeʼ chuʼ lídxinu nayá ne gatachaahuiʼ cani nápanu, cásica ni nápanu ndaaniʼ yoo ne zaqueca ni nápanu fuera, purtiʼ ora gúninu zacá casi ñaca caninenu ca xpesínunu de Stiidxaʼ Dios. Ne guiráʼ binnilídxinu nga naquiiñeʼ gacané para gácani zacá. Ca hombre ni maʼ bichaganáʼ la? jma nga naquiiñeʼ guizaaláʼdxicaʼ guni chaahuicaʼ ra lídxicaʼ ne patiu sticaʼ, purtiʼ nánnacaʼ riníʼ binni galán de Stiidxaʼ Dios ora rihuinni ti yoo ne jardín stiʼ galán. Xaíque yoo ca zusihuinni nanna guni mandar ca binnilidxi, pa guni cani maʼ guninu ca ne gusiidiʼ binnilidxi guni xhiiñaʼ Jiobá (1 Tim. 3:4, 12). Ca gunaa ni maʼ bichaganáʼ laaca naquiiñeʼ guizaaláʼdxicaʼ gápacaʼ lídxicaʼ, ne jma nga ndaaniʼ ni (Tito 2:4, 5). Ca xiiñicabe laaca rusiacaʼ ra rásicaʼ ne riguixhe chaahuicaʼ cani nápacaʼ ne rusiacaʼ ládicaʼ ti chuʼcaʼ nayá, purtiʼ maʼ biziidicabe gúnicabe ni. Nga runi, ora guiráʼ xixé binnilídxinu guni stipa pur gaca nayá la? zacá mápeca cayuucabe listu para guibánicabe ndaaniʼ guidxilayú cubi stiʼ Dios ra chiguni mandar Reinu stiʼ.
Ca dxi stinu riʼ, stale de ca xpinni Jiobá riquiiñecaʼ carru para checaʼ guendaridagulisaa sticaʼ ne ora chigucheechecaʼ diidxaʼ. Nuu lugar la? riquiiñepeʼ gapa binni carru ti ganda chigucheeche diidxaʼ. Nga runi riquiiñeʼ chuʼni nayá ne gúʼyacabe cadi gaca feu ni. Lídxinu ne xcárrunu naquiiñeʼ gusihuinni nuunu ndaaniʼ ti guidxi nayá ne ni gulí Jiobá para laa si.
Modo rácunu lari laaca naquiiñeʼ gusihuinni zinándanu ca conseju stiʼ Jiobá. Pa ñaca ñuunu ra nuu ti binni risaca la? qué ñuudinu ra nuube nácunu lari modo tiica si. ¡Lágaxa ora maʼ cayúninu xhiiñaʼ Jiobá, jmaruʼ si naquiiñeʼ guizaaláʼdxinu modo gácunu lari ora maʼ zigucheechenu diidxaʼ ne ora maʼ cudiʼnu ti libana! Modo guzuchaahuinu zucaani binni guiníʼ ique pa dxandíʼ runi adorarnu Jiobá jneza. Qué racaláʼdxidinu gusihuínninu nabé runi crenu laanu ne qué racaláʼdxinu guiníʼcabe mal de laanu pur ni gúʼyacabe cayúninu (Miq. 6:8; 1 Cor. 10:31-33; 1 Tim. 2:9, 10). Nga runi, ora maʼ cayuʼnu listu para chigucheechenu diidxaʼ o para chuunu guiráʼ ca guendaridagulisaa ni raca para guni adorarnu Dios la? naquiiñeʼ guietenaláʼdxinu xi cuzeeteʼ Stiidxaʼ Dios de modo naquiiñeʼ gusianu laanu ne modo guihuínninu, ti zacá gusisácanu Jiobá ora tiica si.
Laaca naquiiñeʼ chinándanu ni na conseju ca ora chigunibiaʼnu Betel. Galán guietenaláʼdxinu diidxaʼ Betel ca riniʼni «Lidxi Dios». Nga runi, modo gácunu lari ne ni gúninu ca lugar ca naquiiñeʼ gácani cásica ora maʼ ziuunu ndaaniʼ Yoo stiʼ Reinu para guni adorarnu Dios.
ORA GÚNINU XIIXA PARA CHUʼNU NAYECHEʼ
Dxandíʼ nga caquiiñenu guiziiláʼdxinu ne chuʼnu nayecheʼ. Casi ti dxi la? biʼniʼ invitar Jesús ca discípulo stiʼ checaʼ ti lugar ra chuʼcaʼ laasicaʼ ti ganda guiziiláʼdxicaʼ caadxi (Mar. 6:31). Ora guiziilaʼdxiʼ binni ne ora cheʼ xiixa lugar para chichite la? nabé racaneni laa ne rudiini stipa laa para ganda gúniruʼ dxiiñaʼ.
Cumu yanna riʼ nuu stale cosa ni ruuyaʼ binni lu tele ne nuu guiráʼ clase canción ni rucaadiaga la? ca xpinni Cristu naquiiñeʼ cuicaʼ xi gúnicaʼ ne guendabiaaniʼ ne gúnicaʼ ni ruuyaʼ Jiobá jneza. Nécapeʼ galán nga cuee binni tiempu para quite xiixa la? cadi laa diʼ ni nga ni jma risaca lu xquendanabáninu. Biblia caguixhená laanu ne caníʼ ziuu hombre «zuyubi [...] ni chuʼlaʼdxi [...] lugar de nuyubi [...] Dios» «ora mayaca izaa xhi guidxilayú» riʼ (2 Tim. 3:1, 4). Stale de ni runi binni yanna para chuʼ nayecheʼ la? cadi jneza diʼ ni para cani racalaʼdxiʼ chinanda ca ley stiʼ Jiobá.
Ca xpinni Cristu de dxiqué bicaanacaʼ guiráʼ guendaquéiquiiñeʼ ni biʼniʼ ca binni que purtiʼ ca binni que bíʼnicaʼ guiráʼ ni gucaláʼdxisicaʼ. Guiráʼ binni guyé circu stiʼ ca romanu que nabé guyuuláʼdxicaʼ gúʼyacaʼ maʼ cayacaná xcaadxi binni. Cani jma bihuinni ca lugar que para chuʼ guidxi que nayecheʼ nga guendaridinde, guuticabe binni ne chuʼnécabe ca gunaa que, ngue runi ca xpinni Cristu qué liica ñecaʼ ca lugar que. Ca dxi stinu riʼ laaca zacaca nga guiráʼ ni nuu ndaaniʼ guidxilayú riʼ, ni jma ricá ique binni nga guni guiráʼ ni uquiinde beela ládicaʼ laacaʼ. Naquiiñeʼ guʼyaʼ chaahuinu ximodo canazanu, ti guixélenu de ca cosa malu ca ora gacaláʼdxinu guidúʼyanu xiixa película o gucaadiáganu xiixa canción ni cadi jneza (Efe. 5:15, 16; Sal. 11:5). Ne neca galán ni gúninu para chuʼnu nayecheʼ la? stale tiru ora chuʼ binni ni qué runibiáʼ Dios raqué nga ni zándaca gueeda gucaa laanu gúninu xiixa ni cadi jneza (1 Ped. 4:1-4).
Nuu stale cosa galán ni zanda guni ca xpinni Cristu para chuʼcaʼ nayecheʼ ti guiziiláʼdxicaʼ de dxiiñaʼ rúnicaʼ, ne laaca nuu ni zanda gúnicaʼ para guibiguetaʼ stipa sticaʼ ne dede guiziilaʼdxiʼ xquendabiaanicaʼ. Ni huayacané stale de ca xpinni Cristu nga chinándacaʼ ca conseju stiʼ Biblia ne gúnicaʼ xcaadxi de cani rusiidiʼ ca libru ne revista stiʼ ca testigu stiʼ Jiobá.
Nuu tiru raca invitar stale familia para chuʼcaʼ nayecheʼ ne xcaadxi xpinni Cristu, o raca invitar caadxi de ca bíʼchinu ne bizáʼnanu para checaʼ xiixa saa raca ora richaganáʼ tuuxa o sti clase saa gaca (Juan 2:2). Binni ni chiguni saa ca nga naquiiñeʼ guʼyaʼ gaca guirani jneza. Ca xpinni Cristu ni nánnacaʼ zacá ni la? qué runi invitarcaʼ stálepeʼ binni ca lugar ca ne qué rindaapeʼ cani. Ne pa gutiidicabe nisa dxuʼniʼ la? cadi naquiiñeʼ tiidisúcabe (Fili. 4:5). Pa gúnicabe stipa pur gaca cani jneza ne guiníʼcabe dxandíʼ zaguuni gana xcaadxi xpinni Cristu para gúnicaʼ xhiiñaʼ Jiobá la? ni jma zasaca para laanu nga chúʼnenu laacabe ne cadi ni guidoʼno o ni guideʼnu.
Dxandíʼ, ora guidagulisaa grupu jma naroʼbaʼ la? naquiiñeʼ chuʼnu cuidadu ni gúninu. Nuu tu ruuyaʼ ca guendaridagulisaa riʼ casi guendariguite, nga runi rúnicaʼ stale cosa ni qué runi ca xpinni Cristu, ro xaatacaʼ, reʼ xaatacaʼ ne dede huayúnicaʼ sti cosa jma malu.
Sicarú nga guidxaagalunu binni ni ziganna laanu (1 Ped. 4:9). Ora guni invitarnu ti grupu de ca xpinni Cristu ti guendaró ra lídxinu, chiguecaʼ ti nagaʼndaʼ, chizanenu laaca xiixa lugar o para chúʼsinu nayecheʼ ti ratu la? galán guietenaláʼdxinu de ca bíʼchinu ne ca bizáʼnanu ni ridagulisaanenu ni zándaca cadíʼdicaʼ ra jma nagana (Luc. 14:12-14). Pa biʼniʼ invitárcabe laanu la? naquiiñeʼ gúninu casi na Marcos 12:31. Nabé galán nga gudiʼnu xquíxepeʼ binni pur guca nachaʼhuiʼ ne laanu.
Ca xpinni Cristu riéchecaʼ pur guiráʼ cosa ni rudii Dios laacaʼ ne nánnacaʼ zanda gocaʼ, guecaʼ ne guiéchecaʼ pur dxiiñaʼ nadipaʼ ni rúnicaʼ (Ecl. 3:12, 13). Pa ca binni ni guni ca guendaridagulisaa o ca saa riʼ ne cani gaca invitar checaʼ raqué gúnicaʼ ni para guisaca Dios la? guizáʼ galán zuni sentírcabe ora guietenaláʼdxicabe cani, ne zadxá tipa ladxidóʼcabe purtiʼ nabé guluu ni gana laacabe gúnicabe xhiiñaʼ Jiobá.
ORA MAʼ NUUNU RA SCUELA
Xiiñiʼ ca testigu stiʼ Jiobá riecaʼ scuela para guiziidicaʼ ni jma zaquiiñecaʼ lu xquendanabánicaʼ. Riecaʼ scuela purtiʼ racaláʼdxicaʼ guiziidicaʼ gúʼndacaʼ ne gucaacaʼ. Xcaadxi de ni riziidiʼ binni ora rié primaria ne secundaria laaca zanda iquiiñeʼ ca hombrehuiiniʼ ne ca dxaapahuiiniʼ ni naguixhe íquecaʼ ugaandacaʼ xiixa guenda ndaaniʼ xquidxi Jiobá. Ora maʼ canazácabe scuela la? naquiiñeʼ gúnicabe stipa pur guietenaláʼdxicabe de Dios ni bizáʼ laacabe, ne gusihuínnicabe ni ra gúnicabe xhiiñaʼ Jiobá primeru lu xquendanabánicabe (Ecl. 12:1).
Pa ti Testigu nahuiiniruʼ lii ne canazaluʼ scuela la? naquiiñeʼ gapuʼ stale cuidadu. Cadi guidxaaguʼ xcaadxi de cani rizáneluʼ scuela ni qué ruzuubaʼ diidxaʼ ne rúnicaʼ ni na íquecaʼ (2 Tim. 3:1, 2). Nuu stale cosa ni zanda guʼnuʼ para gucaanaluʼ guiráʼ cosa malu ni raca ndaaniʼ guidxilayú riʼ. Jiobá cadi cusaana diʼ laanu guidxaagalunu cani sin gabi laanu ximodo gúninu para gápanu laanu (Sal. 23:4; 91:1, 2). Nga runi galán iquiiñenu guiráʼ ni cudii Jiobá laanu para gápanu laanu de guiráʼ ca cosa malu (Sal. 23:5).
Para cadi guni ca hombrehuiiniʼ ne ca dxaapahuiiniʼ ni naca Testigu guiráʼ ca cosa malu ni runi binni guidxilayú riʼ laga canazárucaʼ scuela la? naquiiñeʼ guiníʼ íquecabe ca cosa malu ni zándaca guidxagalúcabe pa guiaanacabe ra scuela guilúxesi clase para gúnicaʼ xcaadxi cosa casi quítecaʼ. Nécapeʼ ca xcompañéruluʼ ne maestru stiluʼ qué guiénecaʼ xiñee qué riaanaluʼ ra scuela la? ni jma risaca nga guʼnuʼ ni riuulaʼdxiʼ Dios. Para nga la? naquiiñeʼ guietenaláʼdxiluʼ guiráʼ ni maʼ biziidiluʼ de lu Biblia ne cadi guiníʼ íqueluʼ modo riníʼ íquecabe, casi guicá íqueluʼ puru lii si guni ganarluʼ ne gúniluʼ xiixa para gusihuínniluʼ jma risaca xquídxiluʼ, purtiʼ Biblia na cadi jneza diʼ guiráʼ ca nga (Gál. 5:19, 26). Pa gucaadiágaluʼ ca conseju ni zeeda lu Biblia gudii bixhózeluʼ ne jñaaluʼ lii ne guidxaaguʼ xcaadxi de cani ridagulisaaneluʼ ne güiluʼ de ni riziidiluʼ ra ridagulisaaluʼ la? zacanécani lii para chinándaluʼ ca ley ni naguixhe Jiobá.
RA DXIIÑAʼ NE CANI RUNINENU DXIIÑAʼ
Cani naca xaíque stiʼ ti yoo naquiiñeʼ gudiicaʼ ni caquiiñeʼ binnilídxicaʼ purtiʼ zacá nga na Biblia gúnicaʼ (1 Tim. 5:8). Neca zacá la? ca hombre ni zinanda Cristu nánnacaʼ cadi dxiiñaʼ diʼ sticaʼ nga ni nuu primé, laacaʼ ruyúbicaʼ primeru Reinu ca lu xquendanabánicaʼ ne maʼ despué rúnicaʼ xhiiñacaʼ (Mat. 6:33; Rom. 11:13). Pa gusihuínninu runi adorarnu Dios ne nuunu nayecheʼ pur ni nápanu casi ni guidoʼno ne ni gácunu la? nga zacané ti cadi chúʼpenu xizaa ne cadi guicá íquenu puru gápasinu bidxichi purtiʼ nga nga ni jma cá ique binni ndaaniʼ guidxilayú riʼ (1 Tim. 6:6-10).
Cadi cani naca si xaíque yoo nga naquiiñeʼ chinanda ca conseju ni zeeda lu Biblia, sínuque guiráʼ xpinni Cristu ni runi dxiiñaʼ purtiʼ caquiiñeʼ guni cani. Para guni ganarnu ni guibaninenu sin cuánanu la? naquiiñeʼ guixélenu de caadxi dxiiñaʼ ni zucaa laanu guchéʼnenu ley stiʼ Dios o xquídxinu (Rom. 13:1, 2; 1 Cor. 6:9, 10). Laaca galán guietenaláʼdxinu guiráʼ ora cadi jneza diʼ nga guidxaaganu binni ni qué runi ni na Jiobá. Cumu soldadu stiʼ Cristu laanu la? qué riuʼnu lu ca negocio ni na Stiidxaʼ Dios cadi jneza o gúninu xiixa ni guxheleʼ laanu de Jiobá (2 Tim. 2:4). Laaca qué liica riuʼnu gaxha de «Babilonia» «guidxi roʼ», ca religión ni naca xhenemigu Dios (Apo. 18:2, 4; 2 Cor. 6:14-17).
Pa runi respetarnu ca ley stiʼ Jiobá la? qué zuyúbinu chúʼnenu ca xpinni Cristu para si gábinu laaca de cani racaláʼdxinu gápanu o para si gutono xiixa lucaʼ. Ridagulisaanenu ca xpinni Cristu ne ridxaaganu laacaʼ ra raca guiráʼ ca guendaridagulisaa roʼ ca para si guni adorarnu Jiobá, guizíʼdinu guiráʼ ni rieeteʼ raqué ne güínenu ca bíʼchinu ne ca bizáʼnanu diidxaʼ ti gacanésaanu (Rom. 1:11, 12; Heb. 10:24, 25). Ora maʼ nuunenu laacabe ca lugar ra ridagulisaanu la? naquiiñepeʼ nga güínenu laacabe de Stiidxaʼ Dios.
XIMODO CHUʼNU TOBI SI NE CA XPINNI CRISTU
Lade ca ley ni napa Jiobá para ca xpinni la? rieeteʼ «cadi chuʼ dinde [n]u, ti cadi ilaa saa [n]u» (Efe. 4:1-3). Lugar de gúninu ni racaláʼdxisinu la? cada tobi de ca xpinni Cristu ruyúbicaʼ gúnicaʼ ni riuulaʼdxiʼ xcaadxi. Zándaca nga nga ni huayuuyaluʼ lade ca binni ridagulisaa. Neca de intiica raza laanu, intiica guidxi, pabiáʼ bueltu nápanu o pabiáʼ guzanu scuela la? guiranu rinándanu ca ley ni naguixhe Jiobá. Dede ca binni ni qué rúnicaʼ ni na Jiobá rudiicaʼ cuenta pabiáʼ jneza canazá xquídxibe (1 Ped. 2:12).
Apóstol Pablu bizeeteʼ xiñee riuʼnu tobi si ora guníʼ: «Ti cuerpu si napa Cristu, ne nga nga ca xpinni, ne tobi si Espíritu nuu, ne laca tobi si ni chi udii Dios irá nu. Tobi si Señor nuu, ne tobi si ni runi cre nu, ne tobi si xi pur riuu nisa irá[nu]. Laca tobi si Dios nuu, ne laa nga Bixhoze irá nu, ne riquiiñe laanu para guni nu xhiiñaʼ» (Efe. 4:4-6). Nga runi naquiiñeʼ guni respetarnu ni na Jiobá ne gánnanu laabe nga nápabe derechu de guni mandarbe guiranu ne naquiiñeʼ gusihuínninu tobi si ni runi crenu, cásica lu cani bizíʼdinu primé ne zaqueca lu cani jma nagana ni zeeda lu Biblia. Para nga la? Jiobá cusiidiʼ xquidxi cani zeeda lu Stiidxaʼ, ne pur nga nuunu tobi si para gúninu ni na Jiobá (Sof. 3:9).
Ora runi ca binni ridagulisaa dxiiñaʼ tobi si ne qué riuu guendaridinde ládecaʼ la? rudii nga stipa guiráʼ cani cayuni adorar Jiobá. Cadúʼyanu cayaca ni bizabiruaa Jiobá riʼ: «Tobi si zaguaa laatu, casi riuu dendxuʼ ndaaniʼ currá» (Miq. 2:12). Qué racaláʼdxidinu guiniti guendariuudxi ni nuu ládenu ne racaláʼdxinu gúninu dxiiñaʼ tobi si ne zanda gúninu ni pa guibáninu casi binni nachaʼhuiʼ ne chinándanu guiráʼ ora ca ley stiʼ Jiobá.
Nabé nayecheʼ nga nuu guiráʼ cani nuu ndaaniʼ xquidxi Jiobá purtiʼ laabe maʼ gulibe laacaʼ para gácacaʼ xpínnibe. Guiréʼ lanu testigu stiʼ Jiobá ca jma risaca ni qué intiica cosa ni bisaananu dxiqué. Nga runi, laga cayúninu stipa para cadi gusaana de chuʼnu galán ne laabe la? laaca naquiiñeʼ gúninu stale stipa pur chinándanu ca ley stiʼ Jiobá ne gábinu binni laaca galán guni chinanda cani (2 Cor. 3:18, NM).