Cadi gunítiluʼ tiempu ora maʼ zigucheecheluʼ diidxaʼ
1 Ca dxi nabáninu riʼ nápanu stale dxiiñaʼ ne huaxiéʼ tiempu nápanu para ganda gúninu guiráʼ cani (Juan 4:35; 1 Cor. 7:29). Peru pa quixhe chaahuinu tiempu stinu ne guiníʼ íquenu modo iquiiñenu ni ora maʼ zigucheechenu diidxaʼ la? qué zunítinu tiempu stinu ora gúninu ni.
2 Ante chigucheechenu diidxaʼ. Ante chetu ra chidagulisaatu para chigucheechetu diidxaʼ, laguyubi xi libru ne revista zaquiiñetu ne laguiziidiʼ chaahuiʼ ni chiguiniʼtu. Casi guiluxe gaca oración, lacheca ra chigucheechetu diidxaʼ. Zacá la? cásica lii zaqueca ni zineluʼ ca qué zunítitu tiempu ni maʼ guleetu para gucheechetu diidxaʼ.
3 Pa gúdxicabe lii cueeluʼ grupu, naquiiñeʼ guzululuʼ guendaridagulisaa ca tempranu ne cadi tan guindaaluʼ: zanda iquiiñeluʼ chii o quince minutu para gúniluʼ ni. Ante gábiluʼ ca binni ca maʼ zanda checaʼ, biiyaʼ pa guirácabe maʼ nápacabe tu guireenécabe ne paraa chigucheechecabe diidxaʼ.
4 Ora maʼ canagucheechenu diidxaʼ. Cadi guiaanaluʼ pa cadi naquiiñeʼ gúniluʼ ni ora guiluxe gápatu guendaridagulisaa stitu para chigucheechetu diidxaʼ; sínuque guyeca ra gúdxicabe lii gúniluʼ dxiiñaʼ. Pa nánnaluʼ ti ratu si chiguireeluʼ la? biyubi ximodo guibiguétaluʼ ti cadi guirácabe guibiguetanécabe lii purtiʼ si maʼ bilúxeluʼ. Ora maʼ canazaneluʼ ti grupu, cadi guindaapeluʼ ti lugar purtiʼ zándaca cabézacabe lii. Nga runi, zanda guyúbiluʼ sti dxi para guibiguétaluʼ chigánnaluʼ binni ni racalaʼdxiʼ guiziidiʼ o biyubi ximodo guchuuguluʼ stiidxaʼ binni ni racalaʼdxiʼ si tinde diidxaʼ (Mat. 10:11).
5 Para cadi gunítiluʼ tiempu ora guibiguetaʼ chigánnaluʼ tuuxa la? biʼniʼ stipa chigánnaluʼ chupa chonna binni nabeza ladu que ante cheluʼ sti ladu. Nuu tiru zanda guinabadiidxaluʼ binni ca pur teléfono pa ziuu ra lidxi ti chigánnaluʼ laa (Pro. 21:5). Pa zineluʼ xhupa xhonna binni ne nánnacaʼ zandaaluʼ la? zanda gucheechecaʼ diidxaʼ gaxha de ra nuuluʼ o zanda guibiguétacaʼ ra nuu tuuxa ni racalaʼdxiʼ guiziidiʼ.
6 Nabáninu ti tiempu ra caquiiñeʼ gusíʼdinu binni de Dios (Mat. 9:37, 38). Maʼ cadi candaa zaluxe dxiiñaʼ riʼ. Nga runi, cadi naquiiñeʼ gunítinu tiempu stinu ora maʼ canagucheechenu diidxaʼ.