Xi ribeendú cani rucheeche diidxaʼ ora rireenecaʼ grupu sticaʼ
1. Xii nga cani guleendunu dxi guyuu Grupu ni Ruundaʼ Libru stiʼ ca Binni Ridagulisaa ne laaca zápanu lade grupu ni rucheechenenu diidxaʼ yanna.
1 Ñee nuu xiixa ni nabé guyuuláʼdxiluʼ dxi guyuu Grupu ni Ruundaʼ Libru stiʼ ca Binni Ridagulisaa la? Cumu nahuiiniʼ ca grupu que la? gunda bidxaaganu xcaadxi xpinni Cristu ni gucané laanu chuʼnu jma gaxha de Jiobá (Prov. 18:24). Binnigola ni rusiidiʼ ra riuundaʼ libru que gunda biiyaʼ xi caquiiñenu ne gucané laanu (Prov. 27:23; 1 Ped. 5:2, 3). Peru yanna laaca zacá ni lade grupu ni rucheechenenu diidxaʼ.
2. Xi zanda gúniluʼ ti ganda gaca xhamíguluʼ cani nuu lu grupu ni rucheecheneluʼ diidxaʼ para gacanecaʼ lii chuʼluʼ gaxha de Jiobá.
2 Biyubi ximodo guidxaagaluʼ laacabe. Biaʼca ca grupu ra ruundaʼ libru dxiqué nga ca grupu ni rucheechenenu diidxaʼ yanna. Ora chuʼnu tobi si para gucheechenu diidxaʼ, jma zaca xhamígunu cani nuu lu grupu stinu (Filip. 1:27). Tu guiráʼ maʼ bicheecheneluʼ diidxaʼ lade grupu stiluʼ. Xiñee qué quixeʼ íqueluʼ gunibiaʼluʼ guirácabe ne chigucheecheneluʼ laacabe diidxaʼ yaʼ (2 Cor. 6:13). Laaca zanda guni invitarnu tuuxa de grupu stinu chitó gueta ralídxinu o guni invitarnu laabe gueelaʼ runi adorarnu Dios né binnilídxinu. Nuu neza binni ridagulisaa naguíxhecaʼ gudii cada grupu ni rucheeche diidxaʼ ni gó tuuxa ni chigudii libana ra nuucaʼ. Ora gacaʼ tocar ti grupu la? ridagulisaacabe para chúʼcabe nayecheʼ ti ratu, neca ni chigudii libana ca qué ganda chuʼ né laacabe.
3. Ximodo zanda gacané ca binnigola laanu chuʼnu gaxha de Jiobá.
3 Cadi purtiʼ maʼ chupa biaje si ridagulisaanu lu ti semana guininu maʼ huaxiéʼ zacané ca binnigola ca laanu chuʼnu gaxha de Jiobá. Dxiiñaʼ stiʼ ca binnigola ni runi tender grupu nga uguucabe gana cada tobi de ca xpinni Cristu, gacanécabe laacaʼ lu ni caquiiñecaʼ ne guluíʼcabe laacaʼ ximodo chuʼcaʼ listu dede ante para gucheechecaʼ diidxaʼ. Pa binnigola ni runi tender grupu stiluʼ qué huayanda gucheechené lii diidxaʼ, xiñee qué guinábaluʼ laabe guireenebe lii yaʼ. Ne binnigola ni ruuyaʼ modo rireeche diidxaʼ ca rigánnabe ti grupu sábadu ne domingu ti biaje lu ti beeu. Ne pa nahuiiniʼ neza binni ridagulisaa ca la? zándaca zigánnabe laacaʼ chupa biaje lu ti iza. Ñee riguixhe chaahuiluʼ tiempu stiluʼ para chigucheecheluʼ diidxaʼ ora chigánnabe grupu stiluʼ la?
4. 1) Ximodo naquiiñeʼ gaca ca guendaridagulisaa ni raca ante chigucheechenu diidxaʼ. 2) Xiñee naquiiñeʼ guiníʼ íquenu gudiʼnu lídxinu para gaca ca guendaridagulisaa ca.
4 Nuu stale cosa ni ribeendunu purtiʼ ridagulisaanu pur grupu ca sábadu ne ca domingu. Cumu gadxé gadxé lugar nga ra ridagulisaa ca grupu ca ne casi ngueca hora raca cani la? jma nagueenda rindá cani rucheeche diidxaʼ ra ridagulisaacaʼ ne laaca rindacaʼ nagueenda ra chigucheechecaʼ diidxaʼ. Ne stobi nga binnigola ni runi tender grupu ca jma zanda gúʼyabe xi caquiiñeʼ cada tobi de laacaʼ. Peru nuu biaje zanda guidaaguʼ chupa o jma grupu. Pa neza binni ridagulisaa ca riuu tobi si para chigucheeche diidxaʼ primé sábadu stiʼ beeu o guiluxe si guiuundaʼ Torre stiʼ ni rapa la? jma galán cuiʼ cani rucheeche diidxaʼ né grupu sticaʼ ne guicaa binnigola ni runi tender laacabe chupa chonna minutu para quixhe chaahuiʼ ximodo chigucheechecabe diidxaʼ ante gaca oración para guireecabe. (Biiyaʼ cuadru ni láʼ «Ñee zanda gudiiluʼ lídxiluʼ para guidagulisaacabe la?».)
5. Neca maʼ gastiʼ Grupu ni Ruundaʼ Libru stiʼ ca Binni Ridagulisaa yanna, xi ndaayaʼ zacaanu.
5 Neca maʼ gastiʼ Grupu ni Ruundaʼ Libru stiʼ ca Binni Ridagulisaa yanna la? cudiiruʼ Jiobá laanu guiráʼ ni caquiiñenu para gúninu ni na (Heb. 13:20, 21). Laabe zuuyabe gastiʼ guiaadxaʼ laanu (Sal. 23:1). Zacaanu stale ndaayaʼ pa chuʼnu tobi si né grupu stinu. Nga runi, cadi guiaandaʼ laanu, ni «udxiiba stale la? ricaa stale» (2 Cor. 9:6).
[Cuadru ni zeeda lu yaza 6]
Ñee zanda gudiiluʼ lídxiluʼ para guidagulisaacabe la?
Nuu neza binni ridagulisaa tobi si ra riuucaʼ para chigucheechecaʼ diidxaʼ ca sábadu ne ca domingu, purtiʼ qué gapa ca grupu ca xcaadxi lugar ra guidagulisaacaʼ. Ca guendaridagulisaa ni rápanu para chigucheechenu diidxaʼ ca nga sti lugar ra rizíʼdinu, nga runi risaca nga gácani ralídxinu. Ñanda nudiiluʼ lídxiluʼ para nidagulisaacabe la? Cadi naquiiñeʼ gaca lídxiluʼ de luju para gudiiluʼ ni. Ni chiguuya ca binnigola ca nga paraa riaana ni ne xcaadxi cosa ni biiyacabe dxi biyúbicabe paraa chuʼ ca Grupu ni Ruundaʼ Libru stiʼ ca Binni Ridagulisaa dxiqué. Pa racaláʼdxiluʼ gudiiluʼ lídxiluʼ, gudxi ni binnigola ni runi tender grupu stiluʼ.