Gaayuʼ cosa ni zanda gúniluʼ para guidxélaluʼ tuuxa binni ni gúʼndaneluʼ
1. Xi naquiiñeʼ gúninu pa caʼruʼ guidxélanu tuuxa ni gúʼndanenu Biblia, ne xiñee.
1 Ñee raca nagana para lii guidxélaluʼ tuuxa ni riuulaʼdxiʼ guiziidiʼ de Biblia la? Cadi gusaana de guyúbiluʼ, purtiʼ Jiobá riguu ndaayaʼ cani qué rusaana de guni ni na (Gál. 6:9). Raríʼ chiguidúʼyanu gaayuʼ cosa ni zacané laanu.
2. Xi zanda gúninu ti guidúʼndanenu binni primeca biaje chigánnanu laa.
2 Primeca biaje gudxi binni pa zuundaneluʼ laa Biblia. Stale binni nanna rusaananu revista Torre stiʼ ni rapa ne ¡Despertad!, peru nuu tu qué ganna pa rusíʼdinu binni de Biblia. Sti biaje chigucheecheluʼ diidxaʼ, xiñee qué gábiluʼ binni pa zuundaneluʼ laa de Biblia. Laaca zanda gábiluʼ ni ca binni ni rigánnaluʼ. Pa qué nácabe la? zándaruʼ chisaanaluʼ ca guiʼchiʼ stinu ra nuucabe ne gacaneluʼ laacabe chuuláʼdxicabe guiziidicabe jma. Ti xpinni Cristu maʼ napa iza de risaana revista ra nuu ti guendaxheelaʼ. Ti dxi yesaanabe ca revista ni jma nacubi ra nuucaʼ, gúdxisibe laacaʼ maʼ chebe, oraqueruʼ gunabadiidxabe laacaʼ: «Ñuuláʼdxitu ñuundatu Biblia la?». Dede bidxagayaabe ora gúdxicaʼ laabe zuundacaʼ, ne yanna maʼ guyuunisa guirópacaʼ.
3. Xiñee naquiiñeʼ gánnanu nuu binni ni ridagulisaané laanu qué ruundanécabe laacaʼ.
3 Guniʼné cani riganna laanu ra Yoo stiʼ Reinu. Naquiiñeʼ gánnanu nuu binni ni ridagulisaané laanu qué ruundanécabe laacaʼ. Ti xpinni Cristu guníʼ sicaríʼ: «Stale de cani huayuundaniáʼ bidxelaʼ laacaʼ ra Yoo stiʼ Reinu». Ti gunaa ni nabé natuí guyé biaʼ quince iza ra Yoo stiʼ Reinu né ca xiiñidxaapaʼ ni maʼ guyuunisa. Riuube órapeʼ maʼ chiguzulú guendaridagulisaa que ne casi guiluxe ni maca zebe. Ti dxi, gudxi ti gunaa xpinni Cristu laabe pa zuundané laabe. Gunaa que guníʼ zaa gúʼndanebe laa ne despué guyuunisa. Sicaríʼ bicaa xpinni Cristu que: «¡Guizáʼ riuubaʼ ladxiduáʼ purtiʼ gulezaʼ quince iza para gudxeʼ laabe pa zuundaniáʼ laabe!».
4. Xi zanda gúniluʼ para ganda guidxélaluʼ tu gúʼndaneluʼ.
4 Biyubi gacaneluʼ xcaadxi. Ti gunaa xpinni Cristu, rinebe cani riguundané binni Biblia. Ora guiluxe guundanécabe tuuxa rinabadiidxabe binni que pa runibiáʼ tuuxa ni ñuulaʼdxiʼ ñuundanécabe laa Biblia, peru ante rinabadiidxabe xpinni Cristu ni zinebe ca pa zaa gúnibe ni. Stobi ni zanda gúninu nga guinabadiidxanu cani rigánnanu ni maʼ bisaanenu laacaʼ libru Xipeʼ ndiʼ cusiidiʼ Biblia pa runibiaʼcaʼ tuuxa binni ni ñuulaʼdxiʼ ñapa libru ca. Ne nuu de cani rucheeche diidxaʼ ne ca precursor qué zanda guundanecaʼ tuuxa ni bidxélacaʼ ra rucheechecaʼ diidxaʼ. Nga runi, zanda gábiluʼ xcaadxi xpinni Cristu racaláʼdxiluʼ gúʼndaneluʼ tuuxa Biblia.
5. Xiñee galán guinínenu xheelaʼ ca Testigu, ni qué ruundanécabe laacaʼ, pa ñuuláʼdxicaʼ ñuundanenu laacaʼ Biblia.
5 Guniʼné xheelaʼ ca xpinni Cristu ni qué ruundaʼ Biblia. Ñee nuu tuuxa ni rucheeche diidxaʼ ni cadi naca xheelaʼ Testigu la? Nuu tu laa qué riuulaʼdxiʼ guiniʼné xheelaʼ laa de Dios, peru ñuulaʼdxiʼ ñuundané sti binni laa de Biblia. Ni jma galán gúninu nga guinínenu xheelabe, ni naca Testigu ca, ante ti gánnanu ximodo guidxíñanu laabe.
6. Xiñee nabé risaca nga guni orarnu ti ganda guidxélanu tuuxa ni racalaʼdxiʼ gúʼndanenu laa Biblia.
6 Gunabaʼ gacané Jiobá lii. Cadi guiaandaʼ lii nabé racané oración laanu (Sant. 5:16). Jiobá na zucaadiaga laanu pa guinábanu ni riuuláʼdxibe gaca (1 Juan 5:14). Sicaríʼ bizaaca ti xpinni Cristu ni nabé riuu xhiiñaʼ, gunábabe Jiobá gacané laabe guidxélabe ti binni gúʼndanebe. Peru xheelabe guyuu xizaa pa zápabe tiempu para gúʼndanebe binni ca, ne jmaruʼ si pa ni gúʼndanebe ca napa stale guendanagana. Ngue runi, ora gunábabe Jiobá gacané xheelabe guidxelaʼ tu guʼndané, bizeetebe xii ngue naguu xizaa laabe. Gudiʼdiʼ chupa semana para bicabi Jiobá oración stícabe. Ti precursora ni nuu ra ridagulisaacabe bidxela ti hombre ni racalaʼdxiʼ guʼndanécabe laa Biblia, ngue runi gúdxibe xpinni Cristu riʼ guʼndané hombre que. Xheelaʼ xpinni Cristu ca guníʼ sicaríʼ: «Cani riníʼ ique nagana nga gúʼndanecaʼ tuuxa la? galán guiniʼcaʼ xi racaláʼdxicaʼ ora guni orarcaʼ, ne cadi gusaanacaʼ de gúnicaʼ ni. Qué ñuu dxi niníʼ íquedu pabiáʼ nayecheʼ ziuudu pur gacanedu binni». Pa lii qué guireeluʼ gana la? zanda guidxélaluʼ tuuxa ni gúʼndaneluʼ laa Biblia ne ziuuluʼ nayecheʼ pur gacaneluʼ laabe sabe lu «neza ni zé lu enda nabani» (Mat. 7:13, 14).