7 ndaa: Oración ni rúninu ora rúʼndanenu binni
Gúʼndanenu binni modo ganda iniisi jma lu Stiidxaʼ Dios
1. 1) Xiñee nga jma galán uzulunu ne iluxenenu oración ora gúʼndanenu tuuxa. 2) Xi zanda gúninu ti uzulunu guni orarnenu cani cayúʼndanenu.
1 Riquiiñenu ndaayaʼ stiʼ Jiobá para iniisi cani cayúʼndanenu ca lu Stiidxabe (1 Cor. 3:6). Nga runi galán nga uzulunu ne iluxenenu oración ora gúʼndanenu binni. Zanda uzulú gúninu oración ne ca binni ni maca riuláʼdxicaʼ iziidicaʼ de Dios dede primé gúʼndanenu laacaʼ. Ne nuu binni naquiiñeʼ uyúbipenu ximodo ti uzulú guninenu laacabe oración. Zanda gúʼndanenu laacabe Salmo 25:4, 5 ne 1 Juan 5:14 ti guiénecabe xiñee nga naquiiñeʼ aca orar, laaca zanda gúʼndanenu laacabe Juan 14:6 para usiénenu laacabe pabiáʼ nga risaca inínenu Jiobá de lu lá Jesús.
2. Tuu ndiʼ guni oración ca ora maʼ chiguundanécabe tuuxa pa ti bíchinu ni maʼ uyuunisa ireené ti bizánanu. Yanna, tu guni oración ca ora ti ni rucheeche diidxaʼ ni caʼruʼ chúʼnisa ireené laabe yaʼ.
2 Tuu ndiʼ naquiiñeʼ guni oración. Pa ti bíchinu ni maʼ uyuunisa ne ti bizánanu chiguundanecaʼ tuuxa la? bíchinu riʼ nga naquiiñeʼ guni ni, nécapeʼ bizánanu ca zanda gúʼndanebe binni zigánnacabe ca pa uchiibe xiixa íquebe (1 Cor. 11:5, 10). Peru, pa ti ni rucheeche diidxaʼ ni caʼruʼ chúʼnisa nga ireené laabe la? bizánanu ca nga guni oración ca. Ne laaca naquiiñeʼ uchiibe xiixa íquebe para guni orarbe ne para gúʼndanebe ni zigánnacabe ca.
3. Xii ndiʼ galán uzeetenu ora guni orárnenu ni cayúʼndanenu ca.
3 Xi inábanu ora guni orarnu. Ora guni orárnenu ni cayúʼndanenu ca cadi gúnidinu ni ziuulaʼ, peru ininu xipeʼ nga racaláʼdxinu. Neca zanábanu ndaayaʼ stiʼ Jiobá pur ni chigúʼndanu ne zudiʼnu xquíxepeʼ laabe pur cani cazíʼdinu la? laaca galán nga usisácanu Jiobá purtiʼ laabe nga Cusiidibe laanu (Isa. 54:13). Laaca zanda uzeetenu xiixa ni usihuinni racaláʼdxinu iniisi ni cayúʼndanenu ca lu Stiidxaʼ Dios ne udiʼnu xquíxepeʼ Jiobá pur xquídxibe ni caquiiñebe yanna (1 Tes. 1:2, 3; 2:7, 8). Ne laaca zacané stale nga inábanu Jiobá cuʼ ndaayaʼ stipa cayuni ni cayúʼndanenu ca pur chinanda cani caziidiʼ, purtiʼ zacá zuuyabe pabiáʼ nga risaca «guni [be] ni na ca diidxa ca» (Sant. 1:22).
4. Ximódoruʼ racané guni orarnu ora uzulunu ne ora iluxe gúʼndanenu binni.
4 Oración ca nabé racaneni, ne rudiini ndaayaʼ stiʼ Dios laanu (Luc. 11:13). Rusihuínnini pabiáʼ nga risaca gúʼndanu Stiidxaʼ Dios. Ni cayúʼndanenu ca zaziidibe guni orarbe ora gunadiágabe laanu modo rúninu ni. Ne ora riree ca oración ca de ladxidoʼno ne luni rusihuínninu nadxiinu Jiobá ne rudiʼnu xquíxepeʼ laabe pur ca guenda ni nápabe ca la? racaneni cani cayúʼndanenu idxíñacabe jma Jiobá.