Ndaa Ra Rinabadiidxaʼ

◼ Ñee caquiiñeʼ gúninu oración ora gúʼndanenu binni de Biblia ra puertaʼ lidxi la?

Stale ni ribeendunu ora gúninu oración para guzulú gúʼndanenu binni de Biblia ne ora gúninu ni para guilúxenu. Ora guni orarnu rinábanu Jiobá gudii espíritu santu stiʼ laanu ora maʼ cayúʼndanenu binni (Luc. 11:13). Ne zacá zusihuínninu risaca para laanu gúʼndanenu binni Biblia ne rusíʼdinu laacaʼ guni orarcaʼ (Luc. 6:40). Nga runi, dede ora nacubi cayúʼndanenu binni galán gúninu ni. Peru cumu gadxé gadxé nga ni zazaaca ora chigánnanu binni la? cada tobi naquiiñeʼ guiníʼ ique chaahuiʼ pa naquiiñeʼ guni orar ora guʼndané binni ra puertaʼ lidxi.

Ti cosa ni naquiiñeʼ guidúʼyanu nga lugar ra cadúʼndanenu binni ca. Pa rácani guiráʼ semana ne cadi stálepeʼ binni nuu raqué la? zanda gaca ti oración ora guzulú ne guiluxe ni, peru gácani nachucu ne cadi gudiipeʼ binni cuenta. Peru pa pur laani nabé guyadxí binni laanu o guituí lú binni ni cayúʼndanenu, jma galán cuézanu dede ora maʼ nuunu ti lugar ra huaxiéʼ binni. Ratiica gúʼndanenu binni, naquiiñeʼ guiníʼ ique chaahuinu pora maʼ zanda guni orarnenu laa (biiyaʼ Xhiiñaʼ Reinu ni Rúninu marzo 2005, yaza 4).