Xiñee naquiiñeʼ chuunu ra nuu Grupuhuiiniʼ ni Ruundaʼ Libru stiʼ ca Binni Ridagulisaa
1. Ximodo bizulú ca Grupuhuiiniʼ ni Ruundaʼ Libru stiʼ ca Binni Ridagulisaa.
1 Lu iza 1895, ca testigu stiʼ Jiobá o casi biree lácabe dxiqué, ca binni ruundaʼ Biblia, guyuucabe pur grupuhuiiniʼ para biindacabe libru, ca grupuhuiiniʼ que biree lácani Grupuhuiiniʼ stiʼ Xpiaaniʼ Dxi para Guiuundaʼ Biblia. Ca guendaridagulisaa ra biindacabe ca libru ni biree lá Millennial Dawn (Xpiaaniʼ Dxi stiʼ ti Mil Iza) riʼ la? despué beeda guiree lácani Grupuhuiiniʼ Bereanu para Guiuundaʼ Biblia (Hech. 17:11). Jma nga uca cani pur grupuhuiiniʼ de binni ni bidagulisaacaʼ ralidxi ca bíchinu ne bíʼnicabe ni ora randa riuu guirácabe. Sicaríʼ nga bizulú ca Grupuhuiiniʼ ni Ruundaʼ Libru stiʼ ca Binni Ridagulisaa ni nuu yanna.
2. Ximodo zacané saanu laanu ora chuunu ra nuu Grupuhuiiniʼ ni Ruundaʼ Libru yaʼ.
2 Racaneni ne riguuni gana laanu. Cumu nahuiiniʼ nga ca grupu riʼ la? cani rie lade cani jma nga zanda guiníʼcabe de ni runi crécabe nezalú xcaadxi. Ne zacá zacané saacabe pur fe stiʼ cada tóbicabe (Rom. 1:12).
3, 4. Ximodo racané chuunu ra nuu grupuhuiiniʼ ni ruundaʼ libru ca para gúninu dxiiñaʼ ni bisaanané Jesús laanu yaʼ.
3 Guʼyachaahuinu modo rusiidiʼ binnigola stiʼ grupu stinu ca la? zazíʼdinu iquiiñenu Stiidxaʼ Dios jnézapeʼ (2 Tim. 2:15). Biiyaʼ ximodo nga ruluiʼbe ra cá ni cayuundatu ca ndaaniʼ Biblia. Zándaca ora ilúxebe guietenalaʼdxinebe laatu cani jma naquiiñeʼ ca ne Biblia si, pa ne libru ca ganda gúnibe ni zacá. Modo rúnibe ca zanda acaneni laanu usiidinu jma jneza ora maʼ ziucheechenu diidxaʼ (1 Cor. 11:1).
4 Binnigola ni rusiidiʼ ra riuundaʼ libru ca la? cadi rusiidisibe guiráʼ semana, sínuque laaca rizanírube lu guendarucheeche diidxaʼ. Laabe ne binnigola ni ruuyaʼ modo rireeche diidxaʼ ca, riguíxhecabe pora zanda chiguireeche diidxaʼ. Ruyúbibe acanebe guiráʼ cani rie lade grupu ca ti ganda gúnicabe dxiiñaʼ ni bidii Cristu laacabe de gucheechecabe diidxaʼ ne gusiidicabe binni sananda Jesús (Mat. 28:19, 20; 1 Cor. 9:16).
5. Ximodo racané ni rusiidiʼ ra riuundaʼ libru ca cada tobi de laanu yaʼ.
5 Binnigola ni rusiidiʼ ra riuundaʼ libru ca ruuyabe de que guiráʼ ni rie lade grupu stibe chuucaʼ galán ne Jiobá. Rusihuínnibe ni ora ridagulisaacabe ne ora maʼ ziucheechecabe diidxaʼ. Ne ora tiica chigánnabe laacaʼ la? riguube gana laacaʼ ti gúnirucaʼ xhiiñaʼ Jiobá. Guirutiʼ napa xidé iníʼ ique de que qué zanda idxíñacaʼ binnigola ni rusiidiʼ ra riuundaʼ libru ca ora tiica iquiiñecaʼ acanebe laacaʼ (Isa. 32:1, 2).
6. 1) Ximodo huayacané ca bíchinu ne ca bizánanu de sti guidxi idagulisaacabe pur grupu jma nahuiiniʼ yaʼ. 2) Ora idagulisaaneluʼ grupuhuiiniʼ ni ruundaʼ libru, ximodo huayacané ni liipeʼ yaʼ.
6 Riguusaanu gana laanu. Ca guidxi ra nucueezacabe xhiiñaʼ ca testigu stiʼ Jiobá, ca bíchinu ne ca bizánanu riuucabe pur grupu ni jma nahuiiniʼ para idagulisaacabe. Ti bíchinu rietenalaʼdxiʼ: «Neca bicueezacabe xhiiñadu casi Testigu la? cada gunda bínidu ca guendaridagulisaa ni raca guiráʼ semana ca pur grupuhuiiniʼ de chii o quinse binni. Ora gúʼndadu Biblia ne ora guiaanadu ti ratu iluxe si ca guendaridagulisaa que, nabé bidii cani stipa laadu para chuʼdu galán ne Jiobá. Ne ora maʼ canidu de ni cazaacadu la? rudiʼdu cuenta de que ngueca nga cani cudxiiludu» (1 Ped. 5:9). Laanu laaca zanda ugusaanu gana laanu ra chuunu ra nuu Grupuhuiiniʼ ni Ruundaʼ Libru stiʼ ca Binni Ridagulisaa sin guiaadxanu (Efe. 4:16).