Cani zabeendunu pa chuunu ra Riuundaʼ Libru stiʼ ca Binni Ridagulisaa
1. Xi ribeendunu ora riuunu guiráʼ ca guendaridagulisaa ni raca guiráʼ semana.
1 Ndaaniʼ ti semana rápanu gaayuʼ guendaridagulisaa. Gadxé gadxé modo racanécani laanu ne modo raca cada tobi de laacani. Nabé risaca chuunu guiráʼ cani, purtiʼ pur laacani zanda «ucáʼ ique nu acané saa nu para ganaxhii nu jma, ne guni nu ni nachaʼhuiʼ» (Heb. 10:24, 25). Xi zabeendunu pa chuunu ra Riuundaʼ Libru stiʼ ca Binni Ridagulisaa.
2. Xi zabeendunu ora chuunu ra nuu ti grupu huiiniʼ ni ruundaʼ libru.
2 Zaniisinu ndaaniʼ xquidxi Dios. Cumu huaxiéʼ binni ridagulisaa ra riuundaʼ libru, ne cadi casi xcaadxi guendaridagulisaa ni la? jma nagueenda zaca xhamígunu cani rié racá ne zanda gacanécabe laanu guiniisinu ndaaniʼ xquidxi Dios (Pro. 18:4). Ñee cayúninu stipa pur gucheechenu diidxaʼ ne cada tobi de cani rié ra ridagulisaanu ti ganda gunibiaʼnu laacaʼ la? Guendaridagulisaa ra riuundaʼ libru ca racaneni binnigola ni rusiidiʼ racá gunibiáʼ ne gacané cada tobi de laanu (Pro. 27:23).
3. Xiñee jma ricabi cani rié ra riuundaʼ libru ne xiñee jma rié cani rúʼndanenu Biblia lugar ca.
3 Ñee maʼ biʼniʼ invitarnu cani rúʼndanenu Biblia guidagulisaanecaʼ laanu ra rúʼndanu libru la? Zándaca qué rinácabe chécabe ca guendaridagulisaa ra rié stale binni, peru ora gúʼyacabe huaxiéʼ tu ridagulisaa ra rúʼndanu libru ne rúninu ni ra lidxi tuuxa la? zándaca gudii gana laacabe chécabe. Laaca qué zadxíbipeʼ cani nahuiiniʼ ne cani deruʼ cayé guicábicaʼ purtiʼ maʼ runibiáʼ saacaʼ. Ne cumu nahuiiniʼ ni la? stale biaje zanda guicábicabe ne zacá gusisácacabe Jiobá (Sal. 111:1).
4. Xiñee jma galán para laanu gaca ra riuundaʼ libru ca gadxé gadxé lugar.
4 Gadxé gadxé lugar ra raca ca guendaridagulisaa ra riuundaʼ libru ne raca cani ra zanda cheʼ cani rucheeche diidxaʼ. Nuu tiru qué zuseendacabe laanu ra nuu ti grupu ni ruundaʼ libru ni nuu gaxha de ra lídxinu. Peru gáxharuʼ ra guseendacabe laanu que ñuunu de ra nuu Yoo stiʼ Reinu. Laaca zanda iquiiñeʼ ca lugar ra riuundaʼ libru para guidagulisaanu ante chigucheechenu diidxaʼ.
5. Ximodo zanda gacané binnigola ni rusiidiʼ ra riuundaʼ libru laanu gucheechenu diidxaʼ jma galán.
5 Racanécabe laanu gucheechenu diidxaʼ. Binnigola ni rusiidiʼ ra riuundaʼ libru racané cada tobi de cani rié ra rusiidibe ne ruuyabe gucheechecaʼ diidxaʼ gatigá, gúnicaʼ ni jneza ne gúnicaʼ ni ne stale guendanayecheʼ. Nga runi, rúnibe stipa pur guireenebe guiráʼ cani rié racá ne racanebe laacaʼ gúnicaʼ xhiiñacaʼ jma galán. Pa raca nagana para laanu guibiguetaʼ chigánnanu binni, galán guinínenu binnigola ca. Zándaca gábibe tobi ni maʼ nanna gucheeche diidxaʼ gacané laanu. Ne pa guʼyaʼ chaahuinu ximodo rusiidiʼ binnigola ca ra ridúʼndanu libru la? zánnanu ximodo gusíʼdinu binni de Biblia jma jneza (1 Cor. 4:17).
6. Xiñee cadi naquiiñeʼ guiáʼdxanu ra riuundaʼ libru.
6 Ti ndaayaʼ naroʼbaʼ nga chuunu ra Riuundaʼ Libru stiʼ ca Binni Ridagulisaa. Guendaridagulisaa ni cudii Jiobá riʼ racaneni laanu guzuhuaa dxiichinu lu ca dxi nagana nabáninu riʼ (Sal. 26:12).