Ndaa ra rinabadiidxaʼ

◼ Ñee jneza capananu cada guiluxe ti libana ni tiidiʼ lu Scuela stiʼ cani Rucheeche Diidxaʼ o lu Guendaridagulisaa Stiʼ Dxiiñaʼ Stinu la?

Dxi bizáʼ Jiobá Guidxilayú riʼ, «ca beleguí riree siadóʼ ca gúcacaʼ tobi si para bicaacabe ridxi cayéchecaʼ. Ne guiráʼ xiiñiʼ Dios bizulú bisisácacaʼ laabe ne ridxi nadipaʼ» (Job 38:7) Ca xiiñiʼ Jiobá ni nuunebe guibáʼ bisisácacabe laabe pur guiráʼ ni bizaʼbe, purtiʼ racá bihuinni guendanuuxpiaaniʼ, guendanachaʼhuiʼ ne guendanandxóʼ stibe.

Laanu la? laaca zanda gudiʼnu xquíxepeʼ ca bíʼchinu o bizáʼnanu pur stipa rúnicaʼ para gutiidicaʼ ti libana. Casi ora tiidiʼ ti libana lu ti guendaridagulisaa roʼ ne tiidiʼ tuuxa bíʼchinu o bizáʼnanu guluíʼ ximodo gucheeche diidxaʼ la? rigapananu. Para gúnicabe ca libana ca la? riquiiñeʼ stale tiempu ne stipa, nga runi, ora rigapananu la? cadi rudíʼsinu xquíxepeʼ ca bíʼchinu pur libana bitiidicaʼ, sínuque laaca rudiʼnu xquíxepeʼ Jiobá pur cusiidiʼ laanu ni cá lu Stiidxaʼ ne pur caquiiñeʼ mozo nuu xpiaaniʼ para gúnini (Isa. 48:17; Mat. 24:45-47).

Yanna yaʼ, zanda capananu lu Scuela stiʼ cani Rucheeche Diidxaʼ ne lu Guendaridagulisaa Stiʼ Dxiiñaʼ Stinu la? Gastiʼ naca pa málasi guiale de ndaaniʼ ladxidoʼno capananu, casi ora gutiidiʼ tuuxa primé libana stiʼ lu Scuela. Peru zándaca chaahuidugá guiaʼnu capananu pur intiica si cosa. Nga runi, huaxiéʼ rigapananu ora guiluxe tiidiʼ ti libana lu ca guendaridagulisaa ca.

Nécapeʼ qué rigapananu ora guiluxe ca libana tiidiʼ lu Scuela stiʼ cani Rucheeche Diidxaʼ ne nin lu guendaridagulisaa stiʼ Dxiiñaʼ Stinu la? nuu xcaadxi modo zanda guluinu cusisácanu ni cazíʼdinu ne cusisácanu stipa ni biʼniʼ ca bíʼchinu pur gutiidicaʼ libana sticaʼ. Casi ora maʼ cutiidicabe ti libana galán cadi gásinu ne gucaadiaga chaahuinu. Ne ora guiluxe guendaridagulisaa ca la? zanda guidxíñanu ca bíʼchinu para gudiʼnu xquíxepeʼ laacabe ne zacá guluinu cusisácanu stipa bíʼnicabe (Efe. 1:15, 16).