Iquiiñenu Biblia jneza
1. Xi para riquiiñenu Biblia.
1 Pa guizíʼdinu iquiiñenu Stiidxaʼ Dios la? zanda gucheechenu diidxaʼ ne zusíʼdinu binni jneza. Laaca zacaneni laanu para gusiénenu xii nga ca cosa runi binni ni cadi cá lu Biblia ne gábinu laacaʼ gunáʼ nga ca costumbre ni qué riuulaʼdxiʼ Dios (2 Tim. 2:15; 1 Ped. 3:15).
2. Xi zanda gúninu para guidxélanu ca textu ca nagueenda.
2 Binibiáʼ chaahuiʼ ni. Cásica jma jneza runi binni dxiiñaʼ ne ti máquina ora maʼ runibiáʼ ni la? zacaca jma zánnaluʼ iquiiñeluʼ Biblia pa gunibiáʼ chaahuiluʼ ni. Pa gúʼndaluʼ guidubi naca Biblia zacaneni lii gannuʼ xidé nga jma ruzeeteni, peru cadi ngasi, sínuque laaca zacaneni lii guiziidiluʼ stale textu ne guidxélaluʼ cani jma nagueenda. Ora jma maʼ ziziidiluʼ cani zeeda lu Stiidxaʼ Dios, jma ne gana zaníʼneluʼ binni ratiica nuuluʼ ne ora maʼ zeluʼ de yoo pur yoo, ne ora maʼ caniʼluʼ zahuinni dxandíʼ ni cusiidiluʼ (1 Tes. 1:5).
3, 4. 1) Xi zanda gúninu para gunibiáʼ chaahuinu Biblia. 2) Xi xcaadxi cosa huayúniluʼ para gunibiáʼ chaahuiluʼ Biblia.
3 Gudixhe ique guyúbiluʼ ca textu ni riníʼcabe ra ridagulisaanu ne yenanda ra cayuundacabe. Ora maʼ cayuundaluʼ stúbiluʼ ne ora maʼ cayuundaluʼ ni chitiidiʼ ra ridagulisaanu, biyubi ca textu ni cadi cá xiná ni zeeda lu párrafo ca ne guníʼ ique xi cusiénecani o ximodo zanda gacanécani lii. Stale tu huayuuyaʼ jma nagueenda ridxela ca textu ca ora maʼ zigucheeche diidxaʼ pa guiaacaʼ guʼndaʼ cani lu Biblia, lugar de guʼndaʼ cani lu computadora o lu xiixa guiʼchiʼ ra biʼniʼ copiárcabe ni (Juan 14:26).
4 Nuu caadxi familia ribee tiempu para guiziidicaʼ chupa chonna textu. Ximodo rúnicabe ni yaʼ. Riquiiñecabe caadxi tarjeta ra rucaacabe textu ca ti ladu ne rucaacabe xiná ni sti ladu. De racá maʼ riníʼ cada tobi de laacabe xi textu ca o xiná ni. Xcaadxi familia rúnicaʼ casi ora zigucheechecaʼ diidxaʼ, ne riquiiñecaʼ Biblia para guicábicaʼ ni guinabadiidxaʼ binni ne ora guiníʼ binni xiixa para gucueeza laacaʼ.
5. Xiñee rápanu gana iquiiñenu Biblia jma jneza.
5 Biblia nga libru ni jma risaca lade guiráʼ ni nuu, purtiʼ laasini rusiéneni «ximodo ilá binni» (2 Tim. 3:15). Peru stale de ca binni ni rinínenu de Dios qué runibiáʼdicaʼ guiráʼ cosa galán zeeda luni, nga runi naquiiñeʼ guʼndaʼ chaahuinu Biblia para ganda guluinu laacabe xipeʼ nga cusiidini (Pro. 2:1-5).