Cadi gúnisinu invite
1. Ximodo zanda gúninu ni na ca diidxaʼ ni zeeda lu 1 Corintios 9:26 ora gucheechenu diidxaʼ.
1 Apóstol Pablu bicaa: «Rune tirá ruxooñe casi tobi ni cá ique guni ganar, ne laca rune casi tobi ni rucaa, ni qué runi si invite» (1 Cor. 9:26). Né ca diidxaʼ bicaa Pablu riʼ, bisihuinni racalaʼdxiʼ ugaanda cani maʼ gudixhe ique guni lu xhiiñaʼ Dios. Peru laaca zanda gúninu ni na ca diidxaʼ riʼ ora rucheechenu diidxaʼ, purtiʼ qué racaláʼdxinu gúnisinu «invite», sínuque racaláʼdxinu cueendunu ni galán. Ximodo zanda gúninu ni yaʼ.
2. Ximodo zanda gúninu casi biʼniʼ Pablu ne xcaadxi xpinni Cristu ora quixhe íquenu pora ne paraa gucheechenu diidxaʼ.
2 Chuunu ra nuu binni. Pablu ne xcaadxi xpinni Cristu ni bicheeche diidxaʼ lu primé siglu que guyecaʼ ra nánnacaʼ zadxélacaʼ binni (Hech. 5:42; 16:13; 17:17). Pa jma riuu binni huaxhinni neza ra rucheechenu diidxaʼ la? zándaca óraca nga jma galán gucheechenu diidxaʼ de yoo pur yoo. Yanna, xi zanda guininu de ca lugar ra riree carru ne tren yaʼ. Ñee jma riuu binni ca lugar ca siadóʼ ora maʼ zecaʼ dxiiñaʼ ne huadxí ora guibiguétacaʼ la? Pora nga jma nuu binni ra nuu ca negocio ni nuu neza ra rucheechenu diidxaʼ. Zándaca óraca nga jma galán gucheechenu diidxaʼ lu calle.
3. Xi zanda gúninu para cadi gúnisinu «invite» ora gucheechenu diidxaʼ.
3 Naquiiñeʼ gánnanu modo gucheechenu diidxaʼ. Sti modo gusihuínninu cadi cayúnisinu «invite» nga guʼyaʼ chaahuinu ximodo cayúninu dxiiñaʼ neza ra rucheechenu diidxaʼ. Nuu biaje guiráʼ cani chigucheecheʼ diidxaʼ riecaʼ ti lugar si, neca stálecaʼ. Peru ora raca nga, riquiiñeʼ stale tiempu ne rudii dxiiñaʼ para ganda gusiénecabe laacaʼ ximodo gucheechecaʼ diidxaʼ ne cadi guníticaʼ tiempu. Nga runi, ora stálecabe la? jma galán chécabe pur grupu huiiniʼ. Ne ora chigucheechecabe diidxaʼ ndaaniʼ xcaadxi guidxi huiiniʼ, galán cheʼ chupa chonna si de cani rucheeche diidxaʼ ndaaniʼ cada carru, zacá jma nagueenda zalúxecabe ne jma stale binni zuiʼnécabe diidxaʼ. Ne laaca zanda guinábanu ti lugar gaxha de ralídxinu para gucheechenu diidxaʼ laasinu, zacá qué zunítipenu tiempu para chindanu.
4. Xi zanda gacané laanu gúninu xhiiñanu jneza.
4 Jesús na zeeda gaca cani rucheeche diidxaʼ casi tuuxa ni rié «guuzeʼ, peru para [chiyúbicaʼ] binni» (Mar. 1:17). Ti hombre ni nanna guni guuzeʼ benda, qué rulaa si tarraya stiʼ ndaaniʼ nisa, sínuque ruyubi pora ne paraa zanda guinaazeʼ benda ne qué runiti tiempu para guni ni. Jnézapeʼ runi hombre ca xhiiñaʼ. Cásica hombre ca, laanu laaca naquiiñeʼ gúninu xhiiñanu jneza (Heb. 6:11).