Gacanenu binni gucaadiaga Dios
1. Gunáʼ nga ca folletu ni biree lu guendaridagulisaa de chonna gubidxa ni biree lá «Biseendaʼ Reinu stiluʼ», ne xiñee qué zaca nagana para laanu iquiiñenu ni.
1 Lu guendaridagulisaa de chonna gubidxa ni biree lá «Biseendaʼ Reinu stiluʼ» que, biree chupa folletu. Tobi de laacani láʼ Bicaadiaga Dios ne qué ziuu dxi gátiluʼ ne sti folletu casi laani ni né chupa chonna si diidxaʼ láʼ Bicaadiaga Dios. Cumu huaxiéʼ diidxaʼ nécani la? qué zaca nagana para gutiixhicabe cani lu sti diidxaʼ. Ne dxi biree ca folletu ca maʼ nexheʼ gutiixhicabe cani lu 431 diidxaʼ.
2. Tuu nga ca binni ni zacané ca folletu ca.
2 Guidúʼyanu chupa chonna de ca binni ni zacané ca folletu ca:
• Ti xpinni Cristu ni caniʼné tuuxa, zándaca ora canagucheeche diidxaʼ o zándaca ora yeganna laabe sti biaje, bidii cuenta qué gánnabe gúʼndabe o nagana rácani para laabe.
• Ti xpinni Cristu ni rucheeche diidxaʼ ra nuu binni ni qué gapa xiixa guiʼchiʼ ni caníʼ de Dios lu stiidxaʼ o huaxiéʼ si de laacani napa. O zándaca stale de ca binni ca qué gánnacaʼ gúʼndacaʼ lu diidxaʼ ni riniʼcaʼ.
• Ti xpinni Cristu cayuni seña para guiniʼné ca binni ni qué runadiaga neza ra rucheeche diidxaʼ.
• Ti xpinni Cristu ni racalaʼdxiʼ gusiidiʼ xiiñihuiiniʼ ni caʼruʼ guiziidiʼ guʼndaʼ.
3. Xii nga caadxi cosa ni zeeda lu folletu Bicaadiaga Dios.
3 Cani zeeda lu ca folletu ca. Folletu ni láʼ Bicaadiaga Dios ca nabé huaxiéʼ diidxaʼ nápani. Ra riluxe si cada yaza stini cá chupa chonna si diidxaʼ ne ti textu ni zeeda lu Biblia ni cusihuinni xii nga ni jma naquiiñeʼ ganna binni de cada tema. Xiñee yaʼ. Bixuiʼlú bidii tuuxa lii ti folletu ni cá lu sti diidxaʼ, zándaca nápani stale letra ni qué runibiaʼluʼ. Yanna, ñéneluʼ ni nani neca ñápani caadxi dibuju nabé sicarú la? Zándaca qué ñéneluʼ ni. Ngaca nga rizaaca né ca binni ni qué ganna guʼndaʼ ora gúʼyacaʼ xiixa guiʼchiʼ ni napa stale letra. Nga runi, lu ca folletu ca jma zeeda dibuju, ne biiyaʼ chaahuicabe xi dibuju guicá luni. Ne cá caadxi flecha huiiniʼ para gánnanu gunáʼ nga dibuju ni zeeda primé ne ni zeeda despué.
4. Bizeeteʼ caadxi cosa ni zeeda lu folletu Bicaadiaga Dios ne qué ziuu dxi gátiluʼ.
4 Lu folletu Bicaadiaga Dios ne qué ziuu dxi gátiluʼ laaca zeeda ca dibuju ni cá lu folletu Bicaadiaga Dios luni. Folletu ca guca ni para ca binni ni qué ruundaʼ chaahuiʼ o deruʼ caziidiʼ guʼndaʼ. Laaca zanda iquiiñenu ni pa cayuundanenu tuuxa folletu Bicaadiaga Dios para gacaneni laanu gusíʼdinu laabe. Cada ndaa napa chupa yaza. Ra ruzulú cada ndaa nuu ti guendarinabadiidxaʼ, ne lu guiropaʼ yaza stícani zacabi guendarinabadiidxaʼ ni zeeda lúcani. Lu ca dibuju stícani cá caadxi diidxaʼ ne textu ni zeeda lu Biblia. Ra riluxe stale de ca yaza ca zeeda ti cuadru ra cá caadxi diidxaʼ ne textu ni zeeda lu Biblia ni zanda gúʼndanenu binni ni cusíʼdinu ca pa guidúʼyanu nagueenda caziidiʼ.
5. Pora zanda gusaananenu binni ca folletu ca ne ximodo.
5 Ximodo zanda iquiiñenu cani. Pa guidúʼyanu zanda gusaananenu tobi de ca folletu ca binni ora chigucheechenu diidxaʼ la? galán gúninu ni, neca cadi nexheʼ gusaananenu cani binni beeu ca (biiyaʼ cuadru ni láʼ «Ximodo gusaananenu cani binni»). Ora chigánnanu tuuxa sti biaje la? zanda gábinu laa nápanu xiixa para gusaananenu laa ne de racá gudiʼnu ni laabe.
6. Ximodo zanda iquiiñenu ca folletu ca para gúʼndanenu binni.
6 Cumu folletu Bicaadiaga Dios ca qué gápani nin ti guendarinabadiidxaʼ la? qué zanabadiidxanu binni ne cuézanu guicábibe casi rúninu ora ridúʼndanenu binni libru Xipeʼ ndiʼ cusiidiʼ Biblia. Cumu guiráʼ binni riuulaʼdxiʼ gunadiaga historia la? nga runi zanda iquiiñeluʼ ca dibuju nécani para güíneluʼ binni ni cayuundaneluʼ de ca historia ni zeeda lu Stiidxaʼ Dios. Bisiene laabe xi riníʼ cada dibuju. Ne byuiʼné laabe diidxaʼ né gana ne biyubi modo guiniʼbe xi cayuuyabe ne xi riníʼ íquebe. Biindaʼ ca textu ni zeeda ra riluxe ti yaza ne bisiene cani laabe. Gunabadiidxaʼ laabe xiixa ni gucaa laabe guiniʼbe ne biiyaʼ guiénebe ni cusiidiluʼ laabe. Pa napa binni ni cayuundaneluʼ ca folletu Bicaadiaga Dios ne qué ziuu dxi gátiluʼ la? biindané laabe ca oración ni zeeda lu cada dibuju ne textu ni zeeda luni.
7. Ximodo zanda gacanenu ca binni ni cayúʼndanenu guiniisicaʼ lu stiidxaʼ Dios.
7 Gacanenu cani cayúʼndanenu guiniisicaʼ lu stiidxaʼ Dios. Ora guidúʼndanenu binni zucaa nga laabe chuuláʼdxibe guiziidibe gúʼndabe ti zacá gánnabe jma de Jiobá (Mat. 5:3; Juan 17:3). Nga runi, pa cayuundaneluʼ tuuxa folletu Bicaadiaga Dios la? chaahuidugá zanda gacaneluʼ laabe guiziidibe gúʼndabe guiʼchiʼ ora gúʼyaluʼ maʼ zanda guiziidibe, de racá maʼ zanda guzulú gúʼndaneluʼ laabe folletu Bicaadiaga Dios ne qué ziuu dxi gátiluʼ. Neca gúʼndaneluʼ laabe tobi de ca folletu ca la? caʼruʼ chuʼbe listu para chúʼnisabe. Para chúʼnisabe la? naquiiñeʼ gúʼndaneluʼ laabe libru Xipeʼ ndiʼ cusiidiʼ Biblia o sti libru ni gacané laabe guiene chaahuibe Stiidxaʼ Dios.
8. Xiñee nayecheʼ nuunu pur ca folletu nacubi ca.
8 Pa racalaʼdxiʼ binni guibani sin qué chuʼ dxi gati la? naquiiñeʼ gucaadiágacabe Jiobá, Dios ni jma nandxóʼ lu guidubi naca guibáʼ ne Guidxilayú (Isa. 55:3). Jiobá racalaʼdxiʼ gucaadiaga «irá binni» laa, dede né cani qué ganna guiʼchiʼ (1 Tim. 2:3, 4). ¡Nabé nayecheʼ nuunu purtiʼ nápanu ca folletu cubi ca para gusíʼdinu binni gucaadiaga Dios!
[Cuadru ni zeeda lu yaza 3]
Ximodo gusaananenu cani binni
Biluíʼ laabe yaza 2 ne 3, ne gunabadiidxaʼ laabe: «Ñuuláʼdxiluʼ nibániluʼ ti lugar sicaríʼ la? [Guleza guicábibe.] Lu Biblia [o, libru risaca riʼ] cudii stiidxaʼ Dios laanu maʼ cadi candaa zúnibe Guidxilayú riʼ ti lugar nabé sicarú ne maʼ guirutiʼ tu zadinde luni; ne maʼ qué ziuu guendapobre nin guendahuará. Biiyaʼ xiná raríʼ naquiiñeʼ gúninu para guibáninu lu guidxilayú cubi ca. [Biindaʼ ni cá ra ruzulú yaza 3, ra cusiene ni na Isaías 55:3.] Raríʼ na naquiiñeʼ gucaadiáganu Dios. Peru ximodo zanda gucaadiáganu laabe yaʼ». Biyubi yaza 4 ne 5, ne biindané laabe cani cá lu ca yaza ca para guicábiluʼ ni gunabadiidxaluʼ laabe ca. Pa nuu xhiiñabe la? bisaanané laabe folletu ca ne gudxi laabe xi dxi zabiguétaluʼ para gúʼndatu ni.