Guininu modo chuulaʼdxiʼ binni gucaadiaga

1. Xi rizíʼdinu de modo guiniʼné ca primé xpinni Cristu que gadxé gadxé binni.

¹ Ca primé xpinni Cristu guníʼnecaʼ binni de guiráʼ guidxi ne de gadxé gadxé religión de ca diidxaʼ nacubi ne galán (Col. 1:23). Neca de Reinu stiʼ Dios nga guníʼ guirácabe la? peru gadxé gadxé modo guniʼnécabe cada binni. Casi ora guniʼné apóstol Pedru caadxi judíu, bizulube guníʼnebe laacaʼ de Joel, ni riguixhená que, purtiʼ nánnabe nabé runi respetarcaʼ Stiidxaʼ Dios (Hech. 2:14-17). Yanna, lu Hechos 17:22-31 ridúʼyanu maʼ gadxé modo guniʼné Pablu caadxi griegu. Ca dxi stinu riʼ, nuu binni ni runi respetar Biblia, nga runi zanda iquiiñenu ni ora maʼ zigucheechenu diidxaʼ de yoo pur yoo. Peru naquiiñeʼ gánnanu ximodo guinínenu ca binni ni huaxiéʼ riuulaʼdxiʼ guundaʼ Biblia o cani nuu ndaaniʼ ca religión ni qué runi cré cani bisiidiʼ Cristu o ni qué riuulaʼdxiʼ ganna de religión.

2. Ximodo zanda iquiiñenu ca guiʼchiʼ ni gusaananenu binni cada beeu para gacanenu cani runi cré Biblia ne cani qué runi cré.

² Naquiiñeʼ gánnanu ximodo iquiiñenu ca guiʼchiʼ ni chigusaananenu binni. Lu iza dxiiñaʼ biuʼnu riʼ, cada chupa beeu zadxaa ca guiʼchiʼ ni chigusaananenu binni ora maʼ zigucheechenu diidxaʼ, ziuu biaje zusaananu revista, tratadu ne folletu. Dede ca binni ni qué riuulaʼdxiʼ ganna de Biblia, zanda guinínenu laacaʼ de sti tema ni chuuláʼdxicaʼ. Pa tuuxa binni riuulaʼdxiʼ ganna jma, neca qué guzéʼtenu xiixa textu o qué guidúʼndanenu laacaʼ nin ti textu de lu Biblia la? zanda guibiguétanu para gacanenu laacaʼ gápacaʼ fe Dios ni bizáʼ laacaʼ ne guni crecaʼ Stiidxabe. Yanna, pa guinínenu binni ni runi respetar Stiidxaʼ Dios, zanda iquiiñenu ni ora guinínenu laacaʼ ne gusaananenu laacaʼ xiixa guiʼchiʼ. Ne zanda gusaananenu laacaʼ libru Xipeʼ ndiʼ cusiidiʼ Biblia ne folletu Bicaadiaga Dios o Bicaadiaga Dios ne qué ziuu dxi gátiluʼ, neca cadi laacani cusaananenu binni beeu ca. Ni jma risaca nga guyúbinu modo guinínenu binni ti chuulaʼdxiʼ gucaadiaga.

3. Ximodo zeeda gaca ladxidóʼ binni casi ti layú.

³ Ni naquiiñeʼ gúninu para gacanenu binni. Ladxidóʼ binni zeeda gácani casi ti layú (Luc. 8:15). Nuu layú jma caquiiñeʼ gaca dxiiñaʼ lú para guicaa xcu bidxii ni gudxiibacabe luni ne igaa. Zacaca nga rizaaca né caadxi binni para guiaaziʼ ni na Stiidxaʼ Dios ndaaniʼ ladxidoʼcaʼ. Ca xpinni Cristu ni bibani lu primé siglu que guleenducaʼ ni galán ra gucanecaʼ stale clase binni para chindá ni na Stiidxaʼ Dios, ni zeeda gaca casi biidxiʼ ca, ndaaniʼ ladxidóʼcabe, ne dxiiñaʼ ni bíʼnicabe que nabé bisiécheni laacabe (Hech. 13:48, 52). Laanu laaca ngaca zabeendunu pa guiníʼ íquenu ximodo naquiiñeʼ gusíʼdinu laacabe ni na Stiidxaʼ Dios.