Ndaa Ra Rinabadiidxaʼ

◼ Tu zanda gusaananenu ca guiʼchiʼ stinu

Zusaananu libru, revista ne xcaadxi guiʼchiʼ ni caníʼ de Biblia ra nuu ca binni ni riuulaʼdxiʼ guiziidiʼ jma de Dios. Pa gúʼyanu riuulaʼdxiʼ binni ni caninenu ca gucaadiaga laanu la? zanda gusaananenu laabe chupa revista, ti folletu, ti libru o sti guiʼchiʼ casi laani neca ruluíʼ huaxiéʼ bueltu nápabe para gudiibe pur dxiiñaʼ ni cayaca lu guidubi naca Guidxilayú o qué liica gápabe gastiʼ (Job 34:19; Apo. 22:17). Peru qué zusaananu ca guiʼchiʼ stinu ra nuu ca binni ni qué rusisaca cani (Mat. 7:6).

Yanna, ximodo zanda gudiʼnu cuenta pa riuulaʼdxiʼ tuuxa guiziidiʼ jma de Dios yaʼ. Zudiʼnu cuenta ora gucaadiágabe laanu ne ora güibe diidxaʼ. Guicábibe cani guinabadiidxanu laabe, guiniʼbe xi riníʼ íquebe de ni caninu. Ne pa gucaadiágabe laanu ora guidúʼndanu xiixa textu ni zeeda lu Biblia la? zusihuinni nga runi crebe ni na Stiidxaʼ Dios. Nuu tiru, galán guinabadiidxanu laabe pa zuundabe guiʼchiʼ chigusaananenu laabe. Naquiiñeʼ gánnanu pora nga rusihuinni binni riuulaʼdxiʼ guiziidiʼ jma de Dios. Nga runi, ora maʼ canagucheechenu diidxaʼ lu calle, qué zusaananenu ca guiʼchiʼ stinu tutiica binni tiidiʼ. Pa raca nagana para laanu gudiʼnu cuenta pa riuulaʼdxiʼ binni ca gucaadiaga la? jma galán gusaananenu laabe ti tratadu o tobi de ca guiʼchiʼ huiiniʼ stinu.

Para gánnanu panda libru, revista ne xcaadxi guiʼchiʼ zanda cueenu ra ridagulisaanu la? cadi caquiiñeʼ diʼ gúʼyanu panda zanda quíxenu saca, sínuque panda caquiiñenu para chigucheechenenu diidxaʼ. Bueltu rudii binni cadi riquiiñeʼ diʼ ni para guiaxa saca guiʼchiʼ, sínuque para ganda gaca guiráʼ dxiiñaʼ stiʼ Reinu lu guidubi naca Guidxilayú. Yanna, pa rusisácanu xhiiñaʼ Reinu la? zucaa ni laanu gudiʼnu biaʼ nápanu ne gúninu ni de guidubi ladxidoʼno, ti ganda gacanenu gaca dxiiñaʼ ca, neca qué gápanu stale bueltu para gudiʼnu (Mar. 12:41-44; 2 Cor. 9:7). Laaca zucaa ni laanu guicaanu ca libru, revista ne xcaadxi guiʼchiʼ ni caquíʼñesinu para gucheechenenu diidxaʼ, ti iquiiñenu ca cosa ni napa xquidxi Dios jneza.

[Blurb on page 2]

Naquiiñeʼ gánnanu pora nga rusihuinni binni riuulaʼdxiʼ guiziidiʼ jma de Dios