Iquiiñenu jneza ca libru ne ca revista ni rusiene ni na Biblia
1, 2. Ximodo ruuyaʼ stale binni ca libru ne ca revista stinu, ne xi zanda inabadiidxanu.
1 «Dede 1965 bizuluáʼ cayuundaʼ ca libru ne ca revista stitu. Ora ruundaʼ cani ruyubeʼ iráʼ textu zeeda ndaaniʼ Biblia ni cá lu cani, ne biáʼsipeʼ nuu cani ne ni na Biblia. Maʼ xadxí napa gana gannaʼ ni dxandíʼ de Dios ne de Jesús, ne yánnaruʼ caziideʼ de laacabe pur ca libru, revista stitu ne Biblia.» Zacá uníʼ ti hombre ni bicaa ra nuu Betel stiʼ Brooklyn stiʼ ca testigu stiʼ Jiobá para inábabe tuuxa chiguundané laabe.
2 Cásica hombre riʼ, millón de binni de idubi naca guidxilayú rudiicabe xquíxepeʼ pur ca libru ne ca revista ni rudii «mozo ni nuu xpiaani ne ni runi jneza» para ganda guiénecabe Biblia (Mat. 24:45). Irá iza riree stálepeʼ libru ne revista para acané binni ni dxandíʼ nuu iziidiʼ ne «ganna ca ni dxandíʼ» (1 Tim. 2:4). Ximodo zanda iquiiñenu ca libru ne ca revista riʼ jneza yaʼ.
3. Xi zanda gúninu ti cadi gápasinu ca revista ca yaʼ.
3 Inábanu biaʼ caquiiñenu. Zándaca ra zidiʼdiʼ dxi idale ca revista stinu ne maʼ qué ganda iquiiñenu iráʼ cani. Xi zanda gúninu ti cadi gápasinu ca revista ca yaʼ. Inábanu libru ne revista biaʼ iquiiñesinu para chigucheechenenu diidxaʼ. Zanda inábanu chupa chonna si ne ora maʼ birá ni bisaananenu binni la? zanda inábanu xhupa. Zacá qué zadale cani ra lídxinu. Peru pa gúʼyanu cadale ca revista ca la? galán nga inábanu huaxiéʼ.
4. Xi zanda aca pa ra ridagulisaanu nuu stale revista o libru ni maʼ irutiʼ tu nibee.
4 Xi gúninu ne laacani. Pa ca neza binni ridagulisaa ca nápacabe stale libru ne revista la? ni rudii revista ca riquiiñeʼ gúʼyabe pa nuu stuudxi neza binni ridagulisaa gaxha caquiiñeʼ cani ti udiibe cani laacaʼ. Cani rucheeche diidxaʼ zanda udiicabe ca revista ni cadi nacúbipeʼ ca binnilídxicabe ni qué ruundaʼ Biblia ne cani cayuundanécabe Biblia ne stuudxi binni ganda udiicabe ni. Laaca zanda iquiiñeʼ cani deruʼ cayé ca endaridagulisaa ca cani pa racaláʼdxicaʼ gápacaʼ iráʼ ca revista o ca libru ca ra lídxicaʼ.
5. Ximodo zanda usihuínninu rusisácanu ca revista ne ca libru ricaanu yaʼ.
5 Racaláʼdxinu acané ca revista ne ca libru ca binni ni dxandíʼ riuulaʼdxiʼ iziidiʼ jma de iráʼ cosa sicarú naguixhe ique Jiobá guni. Cásica Jesús qué nusaʼbi ca endaró biaanaʼ ora biyaanabe ca binni que dxi bíʼnibe ti milagru, laanu laaca riquiiñeʼ iquiiñenu ca revista ne ca libru ni nabé risaca ni cudiicabe laanu riʼ jneza (Juan 6:11-13). Ca diidxaʼ para ilá binni ni riuulaʼdxiʼ guni ni jneza, qué ziuu diʼ cani ndaaniʼ ladxidóʼcabe pa cutálesinu ca revista ca ra lídxinu, o ndaaniʼ portafolio stinu o ndaaniʼ xpólsanu ni rigucheechenenu diidxaʼ. Nga runi, gúʼyanu pabiáʼ nga zaquiiñenu ora inábanu revista o libru para chigucheechenu diidxaʼ, ne iquiiñenu cani jneza para ganda acané ni sti binni (Fili. 4:5).