Ñee rusisácaluʼ ca libru ne ca revista ni ricaanu la?
1. Ximodo zanda chinándanu ejemplu stiʼ Jesús.
1 Despué de biʼniʼ Jesús ti milagru para biyaanaʼ stale binni, biʼniʼ mandarbe guidopa cani biaana que (Mat. 14:19-21). Racá ridúʼyanu bisisácabe ca cosa ni zeeda de Jiobá. Galán chinándanu ejemplu stibe ra gusisácanu guiráʼ ni rudii Jiobá laanu pur «mozo ni nuu xpiaaniʼ». Nga runi na Biblia: «Laudii diuxquixe» laabe (Mat. 24:45-47; Col. 3:15; Luc. 12:42).
2. Xi zanda gúninu para cadi gutálenu revista ralídxinu.
2 Ca revista ni ricaanu. Nuu de laanu nabé rutálenu ca revista ricaanu. Xi zanda gúninu yaʼ. Pa guiráʼ beeu cadale ca revista ca ralídxinu la? galán guinábanu biaʼ caquiiñesinu. Peru xi gúninu ca revista ni maʼ biaana ca yaʼ. Cadi purtiʼ si maʼ napa dxi de beedacani guininu maʼ qué risaca ni cusiidicani. Nga runi, zanda gábinu binnigola ni ruuyaʼ modo rireeche diidxaʼ o sti binnigola gabi laanu modo gusaananenu cani binni.
3, 4. Xi naquiiñeʼ gánnaluʼ pa caníʼ íqueluʼ guinábaluʼ ti libru o sti guiʼchiʼ.
3 Xcaadxi libru. Ora maʼ gadxé ni chigusaananenu binni lu sti beeu, galán guidúʼyanu primeru pa nápanu de laani ralídxinu. Ne pa qué gápanu ni la? zanda guinábanu ni ra ridagulisaanu. Galán guinábanu ni zaquiiñenu ti semana si ne ora guirá ni guinábanu jma.
4 Pa chindeeluʼ ti libru o sti guiʼchiʼ para lii la? galán guinábaluʼ ni dxandíʼ caquiiñesiluʼ. Bicaa laluʼ ndaaniʼ ni ti gannuʼ gunáʼ nga stiluʼ. Pa riquiiñeluʼ CD-ROM Watchtower Library ne aparte nápaluʼ revista stiluʼ la? zándaca maʼ cadi caquiiñeʼ diʼ guinabuʼ ca volúmen stiʼ La Atalaya ne ¡Despertad!
5. Xi naquiiñeʼ guietenaláʼdxinu ora gusaananenu binni xiixa libru o revista.
5 Ora gusaananenu cani binni. Ora maʼ cucheechenu diidxaʼ riuuláʼdxinu gusaananenu ca libru ne ca revista ca binni ni dxandíʼ rapa gana guiziidiʼ de stiidxaʼ Reinu. Naquiiñeʼ gánnanu laanu nga jma naquiiñeʼ gudiʼnu bueltu para gácaruʼ jma de laacani. Neca zacá, ora gusaananenu binni tobi de laacani galán gábinu laacabe laaca zanda gacanécabe gaca dxiiñaʼ riʼ ra gudiicabe biaʼ naʼ ladxidóʼcabe.
6. Xiñee rusisácanu ca libru ne ca revista ni ricaanu, ne xi cadi galán gúninu ne laacani.
6 Neca biʼniʼ Jesús ti milagru para biyaanaʼ stale binni la? jma nga bisiidibe laacaʼ ni caquiiñeʼ gánnacaʼ para chuʼcaʼ gaxha de Dios. Laabe guniʼbe: «Cadi pan si nga ibani né binni sínuque irá ca diidxa ni iree de ruaa Dios» (Mat. 4:4). Ca libru ne ca revista stinu rusiidicani xiná Biblia guni binni para guicaa guendanabani ni qué zaluxe (Juan 17:3). Nabé risácacani para laanu, nga runi ¡cadi galán diʼ gutálesinu cani ralídxinu!