Guiaʼnu gácanu puntual
1. Ximodo rusiidiʼ Jiobá laanu gácanu puntual.
1 Jiobá naca ti Dios puntual. Laabe racanebe ca xpínnibe ora caquiiñecaʼ tu gacané laacaʼ (Heb. 4:16). Laaca rudiibe laanu guiráʼ ni caquiiñenu para chuʼnu gaxha de laabe órapeʼ caquiiñenu ni (Mat. 24:45). Nga runi, nanna dxíchinu qué zandaa zedanebe fin stiʼ guiráʼ cosa malu (Hab. 2:3). ¡Stale nga ni ribeendunu purtiʼ naca Jiobá ti Dios puntual! (Sal. 70:5.) Peru cumu nácanu binni ruchee ne nabé riuu xhiiñanu la? nuu biaje raca nagana para laanu gúninu xiixa órapeʼ naquiiñeʼ gúninu ni. Xiñee naquiiñeʼ guiaʼnu gácanu puntual yaʼ.
2. Xiñee rusisacanu Jiobá ora puntual laanu.
2 Lu ca últimu dxi nabáninu riʼ, stale binni riníʼ ique puru para laasi ne qué rucueeza laca laa, nga runi maʼ qué lica ricá íquecaʼ gácacaʼ puntual (2 Tim. 3:1-3). Nga runi, ora rindanu tempranu ra dxiiñaʼ, ra biaananenu tuuxa ne ora chuunu ca guendaridagulisaa ca ruuyaʼ binni laanu ne rusisácacaʼ Jiobá (1 Ped. 2:12). Ñee tempranu rindanu ra dxiiñaʼ peru maʼ huadxí rindanu ra guendaridagulisaa la? Zusihuínninu riuulaʼdxinu gúninu ca cosa ca jneza cásica runi Bixhózenu ni nuu guibáʼ pa chindanu tempranu ca guendaridagulisaa ca, ante gúʼndacabe diidxaʼ riuundaʼ ne gaca oración (1 Cor. 14:33, 40).
3. Xiñee zusihuínninu runi respetarnu xcaadxi binni ora gácanu puntual.
3 Ora puntual laanu rusihuínninu runi respetarnu xcaadxi binni (Filip. 2:3, 4). Pa chindanu tempranu ca guendarisagulisaa rápanu dede né ni raca para chigucheechenu diidxaʼ qué zuchíʼñanu xcaadxi xpinni Cristu. Peru pa maʼ biaʼnu chindanu huadxí la? zusihuínninu jma risaca tiempu stinu que stiʼ xcaadxi binni. Ora puntual laanu, rusihuínninu nácanu ti binni ni runi dxiiñaʼ jneza, runi dxiiñaʼ né stale gana ne zanda guni intiica dxiiñaʼ ni gudiicabe laa, nga nga ca guenda ni zusisaca xcaadxi binni.
4. Xi zanda gúninu pa raca nagana para laanu gácanu puntual.
4 Gunabadiidxaʼ laca lii, xiñee puru maʼ huadxí rindaluʼ guiráʼ lugar. Gudixhe chaahuiʼ tiempu stiluʼ para ganda gúniluʼ guiráʼ ni maʼ gudixhe íqueluʼ (Ecl. 3:1; Filip. 1:10). Gunabaʼ Jiobá gacané lii (1 Juan 5:14). Pa guiaʼnu gácanu puntual, zusihuínninu nabé rusisácanu guiropaʼ mandamientu ni zeeda lu Ley: gannaxhiinu Jiobá ne gannaxhiinu binni (Mat. 22:37-39).