Ra gutiʼ Jesús pur laanu zanda guibani cani maʼ guti

Racané Conmemoración laanu para guiníʼ íquenu guiráʼ cosa galán zápanu ra gutiʼ Jesús pur laanu. Tobi de laacani nga guiasa binni de lade gueʼtuʼ. Cadi bizáʼ diʼ Jiobá laanu para gátinu. Nga runi, yuubaʼ ni jma naná runi sentir ti binni lu xquendanabani nga ora gatiʼ ti familia stiʼ (1Co 15:26). Nabé gucaná Jesús ora biʼyaʼ cayuunaʼ ca discípulo stiʼ pur guti Lázaro (Jn 11:33-35). Cumu bisihuinni Jesús ximodo nga Bixhoze la? nga runi nánnanu laaca racaná Jiobá ora guʼyaʼ cayúʼnanu pur guti tuuxa binni ni nadxiinu (Jn 14:7). Racalaʼdxiʼ Jiobá guedandá tiempu ra guindisaʼ ca xpinni ni bizuubaʼ stiidxaʼ, ne ngaca nga ni racaláʼdxinu (Job 14:14, 15).

Cumu nácabe ti Dios ni riuulaʼdxiʼ gata chaahuiʼ guirá cosa la? nga riníʼ laaca maʼ naguixhe chaahuibe xi chigúnibe ora guindísabe ca gueʼtuʼ ca (1Co 14:33, 40). Lugar de guidúʼnanu pur guti tuuxa, laga ziuʼnu nayecheʼ ora guidxaagalunu cani guiasa lade gueʼtuʼ. Ñee riquiiñeluʼ tiempu stiluʼ para guiníʼ íqueluʼ lu ni chiguni Dios riʼ, jmaruʼ si ora gatiʼ tuuxa la? (2Co 4:17, 18). Ñee rudiiluʼ xquíxepeʼ Jiobá pur ni cusigaʼdeʼ laanu riʼ ne pur cayabi laanu lu Biblia ziasa cani maʼ guti la? (Col 3:15).

• Tu binnilídxiluʼ o xhamíguluʼ riuuláʼdxiluʼ gúʼyaluʼ sti biaje.

• Tu binni rieeteʼ lu Biblia ñuuláʼdxiluʼ ñuuyaluʼ.