Nadxii ne rizaalaʼdxiʼ Dios ni bizáʼ guiráʼ xixé cosa laanu
1. RUDIIBE LUGAR GUIREE GUBIDXA
¿Ñee riníʼ íqueluʼ ximodo nibani binni pa qué niree Gubidxa la? Pur Gubidxa, napa ca yaga ca bandaga, guieʼ, cuananaxhi ne semiá. Laaca pur Gubidxa ca randa reʼ xcu ca yaga ca nisa ne rié nisa ca de lu ca bandaga stícani ne de racá riree ni casi vapor.
2. RUSÁBABE NISAGUIÉ
Ti regalu nabé galán stiʼ Dios nga nisaguié. Pur laani la? rudii Guidxilayú riʼ ni gó binni. Rusaba Dios nisaguié, rudiibe lugar gudii ca layú ca stale cosecha ti gápanu ni guidoʼno ne rusiéchebe ladxidoʼno.
3. RUDIIBE NI GUIDOʼNO NE NI GÁCUNU
Stale binni ruyubi gudii ni gó ne ni gacu familia stiʼ. Sicaríʼ ná Stiidxaʼ Dios: «Laguuyaʼ chaahuiʼ guiráʼ pájaru ripapa guibáʼ. Qué rudxiibacame ne qué rindísacame cosecha ne qué ruchácame troja, peru rudii Bixhózetu ni nuu guibáʼ ni gócame. ¿Ñee cadi jma risácatu que laacame la?» (Mateo 6:25, 26).
«Laguuyaʼ xi zanda guiziiditu de modo rigaa ca liriu ni nuu lu layú, [...] nin [rey] Salomón qué ñacu lari sicarú casi laacani, neca gupa stale cosa risaca. Yanna, pa zacá rudii Dios ni gacu ca yagahuiiniʼ rigaa lu layú, [...] ¿ñee cadi jmaruʼ si nuu razón para gudiibe ni gácutu la?» (Mateo 6:28-30).
Pa rudii Dios laanu ni guidoʼno ne ni gácunu, laaca zanda gudiibe laanu xcaadxi cosa ni caquiiñenu. Ora rúninu ni riuulaʼdxiʼ Dios, racanebe laanu guidxélanu ni guidoʼno o zanda gacanebe laanu guidxélanu ti dxiiñaʼ para sinu ni caquiiñenu (Mateo 6:32, 33).
Ora riníʼ íquenu Gubidxa, nisaguié, ca pájaru ne ca guieʼ, ¿cadi dxandíʼ nápanu stale razón para gannaxhiinu Dios la? Lu sti tema ca zadúʼyanu ximodo riniʼné Dios binni.